Faarfannaa 147

1 Haalleluuyaa. Faarfannaadhaan Waaqa galateeffachuun akkam gaarii dha; isa galateeffachuun akkam gammachiisaa fi kan maluu dha!

2 Waaqayyo Yerusaalemin ni ijaara; Israaʼeloota boojiʼamanis walitti qaba.

3 Warra garaan cabe ni fayyisa; madaa isaaniis walitti hodha.

4 Inni baayʼina urjiiwwanii ni beeka; tokkoo tokkoo isaaniis maqaa maqaadhaan waama.

5 Gooftaan keenya guddaa dha; humni isaas jabaa dha; hubannaan isaas dhuma hin qabu.

6 Waaqayyo warra gad qabaman ni jiraachisa; hamoota garuu lafatti darbata.

7 Galata galchaa Waaqayyoon faarfadhaa; baganaadhaanis Waaqa keenyaaf weeddisaa.

8 Inni samiiwwani duumessaan haguuga; lafaafis bokkaa kenna; tulluuwwan irrattis marga biqilcha.

9 Horiidhaaf waan isaan dheedan, yommuu ilmaan arraagessaa iyyanitti nyaata isaaniif ni kenna.

10 Inni jabina fardaatti hin gammadu; yookaan miilli namaa isa hin gammachiisu;

11 Waaqayyo warra isa sodaatanitti, warra araara isaa abdatanitti ni gammada.

12 Yaa Yerusaalem, Waaqayyoon galateeffadhu; Yaa Xiyoon Waaqa kee galateeffadhu.

13 Inni danqaraa karra keetii ni jabeessaatii; ijoollee kees si keessatti eebbisa.

14 Daarii keetiif nagaa kenna; qamadii qulqulluudhaanis si quubsa.

15 Inni ajaja isaa gara lafaatti ni erga; dubbiin isaas ni ariifata.

16 Inni cabbii akkuma suufiitti diriirsa; qorras akkuma daaraatti bittinneessa.

17 Dhagaa cabbii akkuma cirrachaa gad darbata. Dhaamocha isaa dura eenyutu dhaabachuu dandaʼa?

18 Inni dubbii isaa ergee isaan baqsa; bubbee isaa ni kaasa; bishaanonnis ni yaaʼu.

19 Inni dubbii isaa Yaaqoobitti, seeraa fi sirna isaa immoo Israaʼelitti mulʼiseera.

20 Waan kana saba biraa tokkoof iyyuu hin goone; isaan seera isaa hin beekan. Haalleluuyaa.