Nnwom 26

1 Dawid dwom. Bu me bem, Ao Awurade, ɛfiri sɛ, mabɔ bra a asɛm nni ho: mede me ho too Awurade so na manhinhim.

Dawid dwom. Bu me bem, Awurade, efisɛ, mabɔ bra a asɛm nni ho: mede me ho too Awurade so na manhinhim.

2 Sɔ me hwɛ, Ao Awurade, hwehwɛ mʼakoma ne mʼadwene mu.

Sɔ me hwɛ, Awurade, hwehwɛ me koma ne mʼadwene mu.

3 Wʼadɔeɛ wɔ mʼanim daa na mɛnante wo nokorɛ mu.

Wʼadɔe wɔ mʼanim daa na mɛnantew wo nokware mu.

4 Me ne nnaadaafoɔ ntena na me ne nyaatwomfoɔ nso nni hwee yɛ.

Me ne nnaadaafo ntena na me ne nyaatwomfo nso nni hwee yɛ.

5 Mekyiri nnebɔneyɛfoɔ dwabɔ na mempɛ sɛ me ne amumuyɛfoɔ tena.

Mikyi nnebɔneyɛfo guabɔ na mempɛ sɛ me ne amumɔyɛfo tena.

6 Mehohoro me nsa wɔ bembuo mu, na makɔ wʼafɔrebukyia ho ahyia, Ao Awurade,

Mehohoro me nsa wɔ bembu mu, na mekɔ wʼafɔremuka ho ahyia, Awurade,

7 na mepae mu ka wʼayɛyie na meka wʼanwanwadeɛ nyinaa.

na mepae mu ka wʼayeyi na meka wʼanwonwade nyinaa.

8 Mʼani gye efie a wote mu ho, Ao Awurade, baabi a wʼanimuonyam wɔ no.

Mʼani gye ofi a wote mu ho, Awurade, faako a wʼanuonyam wɔ no.

9 Mfa me kra nka nnebɔneyɛfoɔ deɛ ho nkɔ. Mfa me nkwa nka mogyapɛfoɔ deɛ ho,

Mfa me kra nka nnebɔneyɛfo de ho nkɔ, ne me nkwa nka mogyapɛfo de ho,

10 wɔn a amumuyɛ nhyehyɛeɛ wɔ wɔn nsam na adanmudeɛ ayɛ wɔn nsa nifa ma.

wɔn a amumɔyɛ nhyehyɛe wɔ wɔn nsam na adanmude ayɛ wɔn nsa nifa ma.

11 Nanso mebɔ ɔbra a ɛho teɛ. Hu me mmɔbɔ na gye me nkwa.

Nanso mebɔ ɔbra a ho tew; hu me mmɔbɔ na gye me nkwa.

12 Me nan sisi asase tamaa so; na dwabɔ akɛseɛ ase na mɛkamfo Awurade.

Mʼanan sisi asase tamaa so; na guabɔ kɛse ase na mɛkamfo Awurade.