Nnwom 124

1 Ɔsoroforɔ dwom. Dawid deɛ. Sɛ anka Awurade nni yɛn afa a, ma Israel nka.

Ɔsoroforo dwom. Dawid de. Sɛ anka Awurade nni yɛn afa a, ma Israel nka,

2 Sɛ anka Awurade nni yɛn afa ɛberɛ a nnipa to hyɛɛ yɛn so,

Sɛ anka Awurade nni yɛn afa bere a nnipa tow hyɛɛ yɛn so,

3 ɛberɛ a wɔn abufuo sɔree tiaa yɛn a, anka wɔmenee yɛn anikann;

bere a wɔn abufuw sɔre tiaa yɛn a anka wɔmemenee yɛn anikann;

4 anka nsuyire no bu faa yɛn so, anka ɔhweam no twee yɛn kɔeɛ,

anka nsuyiri no bebu afa yɛn so, anka ɔhweam no bɛtwe yɛn akɔ,

5 anka nsuo a ano yɛ den no afa yɛn kɔ.

anka nsu a ano yɛ den no bɛpra yɛn kɔ.

6 Nkamfoɔ nka Awurade a wɔamma ho kwan amma wɔamfa wɔn se antete yɛn mu.

Ayeyi nka Awurade a wamma ho kwan amma wɔamfa wɔn se antetew yɛn mu.

7 Yɛadwane sɛ anomaa afiri afirisumfoɔ afidie mu; afidie no mu abubu, ama yɛanya ɛkwan adwane.

Yɛaguan sɛ anomaa afi ofirisumfo afiri mu; wɔabubu afiri no, ama yɛaguan.

8 Yɛn mmoa wɔ Awurade din mu, ɔsoro ne asase Yɛfoɔ no.

Yɛn mmoa wɔ Awurade din mu, ɔsoro ne asase Yɛfo no.