Kwadwom 3
1 Mene ɔbarima a mahunu amane wɔ nʼabufuo abaa ano.
Mene ɔbarima a mahu amane wɔ nʼabufuw abaa ano.
2 Wapam me afiri ne ho ama manante sum mu na ɛnyɛ hann mu;
Wapam me afi ne ho ama manantew sum mu na ɛnyɛ hann mu;
3 Ampa ara wama nsa so atia me mpɛn bebree, ɛda mu nyinaa.
Ampa ara wama nsa so atia me mpɛn bebree, da mu nyinaa.
4 Wama me wedeɛ ne me nam anyini Na wabubu me nnompe.
Wama me were ne me nam anyin Na wabubu me nnompe.
5 Waka me ahyɛ mu, ɔde nwononwono ne ahokyere atwa me ho ahyia.
Waka me ahyɛ mu, na watua me ano ɔde nweenwen ne ahokyere atwa me ho ahyia.
6 Wama matena esum mu sɛ wɔn a wɔawuwu dada no.
Wama matena sum mu sɛ wɔn a wɔawuwu dedaw no.
7 Wato ɔfasuo atwa me ho ahyia enti mentumi nnwane; wagu me nkɔnsɔnkɔnsɔn ama matɔ baha.
Wato ɔfasu atwa me ho ahyia enti mintumi nguan; wagu me nkɔnsɔnkɔnsɔn ama matɔ beraw.
8 Mpo sɛ mefrɛ anaasɛ mebɔ mpaeɛ srɛ mmoa a ɔsi me mpaeɛbɔ ano.
Mpo sɛ mefrɛ anaasɛ mebɔ mpae srɛ mmoa a osiw me mpaebɔ ano.
9 Ɔde abotan asi me ɛkwan; wama mʼakwan ayɛ kɔntɔnkye.
Ɔde abotan asiw me kwan; wama mʼakwan ayɛ kɔntɔnkye.
10 Te sɛ sisi a ɔda hɔ retwɛn, te sɛ gyata a watɛ,
Te sɛ sisi a ɔda hɔ retwɛn, te sɛ gyata a watɛw,
11 ɔtwee me firi ɛkwan no mu dwerɛɛ me na ɔgyaa me a menni mmoa biara.
ɔtwee me fii ɔkwan no mu bebaree me na ogyaw me a minni mmoa biara.
12 Ɔkuntunuu ne tadua mu na ɔde ne bɛmma kyerɛɛ me so.
Okuntun ne ta mu na ɔde ne bɛmma kyerɛɛ me so.
13 Ɔde bɛmma a ɛfiri ne kotokuo mu hwiree mʼakoma mu.
Ɔde bɛmma a efi ne kotoku mu hwirew me koma mu.
14 Meyɛɛ asredeɛ maa me nkurɔfoɔ nyinaa; wɔto akutia nnwom de di me ho fɛ ɛda mu nyinaa.
Meyɛɛ akyiwade maa me nkurɔfo nyinaa; wɔto akutia nnwom de di me ho fɛw da mu nyinaa.
15 Ɔde nhahan nwononwono ahyɛ me ma. Wama me bɔnwoma anom.
Ɔde nhaban nweenwen ahyɛ me ma. Wama me bɔnwoma anom.
16 Ɔde aboseaa abubu me se; na watiatia me so wɔ mfuturo mu.
Ɔde mmosea abubu me se; na watiatia me so wɔ mfutuma mu.
17 Wɔama asomdwoeɛ abɔ me; na mewerɛ afiri yiedie.
Wɔama asomdwoe abɔ me; na me werɛ afi yiyedi.
18 Enti mese, “Mʼanimuonyam asa, deɛ mede mʼani too so Awurade mu no nyinaa.”
Enti mise, “Mʼanuonyam asa, nea mede mʼani too so Awurade mu no nyinaa.”
19 Mekae mʼamanehunu wɔ mʼakyinkyini mu, nwononwono ne bɔnwoma mu.
Mekae mʼamanehunu wɔ mʼakyinkyinakyinkyin mu, nweenwen ne bɔnwoma mu.
20 Mekae yie, na me kra aboto wɔ me mu.
Mekae yiye, na me kra abotow wɔ me mu.
21 Nanso, mekae yei ne saa enti, mewɔ anidasoɔ.
Nanso midwen eyi ho; saa nti mewɔ anidaso.
22 Awurade dɔ kɛseɛ enti yɛnnsɛeɛ. Nʼayamhyehyeɛ nni hwammɔ.
Awurade dɔ kɛse nti yɛnsɛee ɛ. Nʼayamhyehye nni huammɔ.
23 Ɛyɛ foforɔ anɔpa biara; wo nokorɛdie yɛ kɛseɛ.
Ɛyɛ foforo anɔpa biara; wo nokwaredi yɛ kɛse.
24 Meka kyerɛ me ho sɛ, “Awurade yɛ me kyɛfa, enti mɛtwɛn no.”
Meka kyerɛ me ho se, “Awurade yɛ me kyɛfa, enti mɛtwɛn no.”
25 Awurade yɛ ma wɔn a wɔn anidasoɔ wɔ ne mu, onipa a ɔhwehwɛ noɔ no;
Awurade ye ma wɔn a wɔn anidaso wɔ ne mu, onipa a ɔhwehwɛ no no;
26 Ɛyɛ sɛ wɔyɛ komm de twɛn Awurade nkwagyeɛ.
Eye sɛ wɔyɛ komm de twɛn Awurade nkwagye.
27 Ɛyɛ ma ɔbarima sɛ ɔsoa kɔnnua no wɔ ne mmeranteɛ ɛberɛ mu.
Eye ma ɔbarima sɛ ɔsoa konnua no wɔ ne mmerantebere mu.
28 Ma ɔntena ase komm, ɛfiri sɛ Awurade de ato no so.
Ma ɔntena ase komm, efisɛ Awurade de ato ne so.
29 Ma ɔmfa nʼanim nsie wɔ mfuturo mu, ebia anidasoɔ wɔ hɔ.
Ma ɔmfa nʼanim nsie wɔ mfutuma mu, ebia anidaso wɔ hɔ.
30 Ma ɔmfa nʼafono mma deɛ ɔpɛɛ sɛ ɔbɔ no na ɔnhyɛ no aniwuo.
Ma ɔmfa nʼafono mma nea ɔpɛɛ sɛ ɔbɔ no no na ɔnhyɛ no aniwu.
31 Na Awurade nto nnipa ntwene koraa.
Na Awurade ntow onipa biara nkyene koraa.
32 Ɛwom, ɔde awerɛhoɔ ba deɛ, nanso ɔbɛnya ayamhyehyeɛ. Ne dɔ kɛseɛ no to rentwa da.
Ɛwɔ mu, ɔde awerɛhow ba de, nanso obenya ayamhyehye. Ne dɔ kɛse no to rentwa da.
33 Ɔfiri amemenemfe mu de amanehunu anaa awerɛhoɔ brɛ nnipa mma.
Ofi amemenemfe mu de amanehunu anaa awerɛhow brɛ nnipa mma.
34 Sɛ wɔde wɔn nan dwerɛ nneduafoɔ a wɔwɔ asase no so a,
Sɛ wɔde wɔn nan dwerɛw nneduafo a wɔwɔ asase no so a,
35 sɛ wɔtiatia obi ahofadie so wɔ Ɔsorosoroni no anim a,
sɛ wotiatia obi ahofadi so wɔ Ɔsorosoroni no anim a,
36 anaa sɛ wɔbu obi ntɛnkyea a, Awurade nhunu saa nneɛma yi anaa?
anaa sɛ wobu obi ntɛnkyew a, Awurade renhu saa nneɛma yi ana?
37 Hwan na ɔbɛtumi aka na wama aba mu wɔ ɛberɛ a ɛnyɛ Awurade na ɔhyɛeɛ?
Hena na obetumi aka na wama aba mu wɔ bere a ɛnyɛ Awurade na ɔhyɛe?
38 Ɛnyɛ Ɔsorosoroni no anom na musuo ne nnepa firi anaa?
Ɛnyɛ Ɔsorosoroni no anom na mmusu ne nnepa fi ana?
39 Adɛn enti na ɛsɛ sɛ ɔteasefoɔ nwiinwii ɛberɛ a wɔatwe nʼaso wɔ ne bɔne ho?
Adɛn nti na ɛsɛ sɛ ɔteasefo nwiinwii bere a wɔatwe nʼaso wɔ ne bɔne ho?
40 Momma yɛnhwehwɛ yɛn akwan mu na yɛnsɔ nhwɛ, na yɛnsane nkɔ Awurade nkyɛn.
Momma yɛnhwehwɛ yɛn akwan mu na yɛnsɔ nhwɛ, na yɛnsan nkɔ Awurade nkyɛn.
41 Momma yɛmma yɛn akoma ne yɛn nsa so, nkyerɛ Onyankopɔn wɔ ɔsoro, na yɛnka sɛ:
Momma yɛmma yɛn koma ne yɛn nsa so, nkyerɛ Onyankopɔn wɔ ɔsoro, na yɛnka se:
42 “Yɛayɛ bɔne, na yɛate atua na woamfa ankyɛ.
“Yɛayɛ bɔne, na yɛatew atua na wamfa ankyɛ.
43 “Wode abufuo akata wo ho ataa yɛn; na wakunkum a woannya ahummɔborɔ.
“Wode abufuw akata wo ho ataa yɛn; na woakunkum a woannya ahummɔbɔ.
44 Wode wo ho asie omununkum mu enti mpaeɛbɔ biara nnuru wo nkyɛn.
Wode wo ho asie omununkum mu nti mpaebɔ biara nnu wo nkyɛn.
45 Woayɛ yɛn atantanneɛ ne wira wɔ amanaman no mu.
Woayɛ yɛn atantanne ne nwura wɔ amanaman no mu.
46 “Yɛn atamfoɔ nyinaa abae wɔn anom tɛtrɛɛ de tia yɛn.
“Yɛn atamfo nyinaa abaa wɔn anom tɛtrɛɛ de tia yɛn.
47 Yɛabrɛ ne ahunahuna ne akukuruhweaseɛ, mmubuiɛ ne ɔsɛeɛ.”
Yɛabrɛ ne ahunahuna ne akukuruhwease, mmubui ne ɔsɛe.”
48 Me nisuo sene sɛ asutene ɛfiri sɛ wɔasɛe me nkurɔfoɔ.
Me nusu sen sɛ asuten efisɛ wɔasɛe me nkurɔfo.
49 Me nisuo bɛsene ara, na ɛrennyae,
Me nusu bɛsen ara, na ɛrennyae,
50 kɔsi sɛ Awurade bɛhwɛ afiri ɔsoro, na wahu.
kosi sɛ Awurade bɛhwɛ afi ɔsoro, na wahu.
51 Deɛ mehunu no ma me kra werɛ ho me kuropɔn no mu mmaa nyinaa enti.
Nea mihu no ma me kra werɛ how, me kuropɔn no mu mmea nyinaa nti.
52 Mʼatamfoɔ a menyɛɛ wɔn hwee pampam me sɛ anomaa.
Mʼatamfo a menyɛɛ wɔn hwee pampam me sɛ anomaa.
53 Wɔpɛɛ sɛ wɔtwa me nkwa so na wɔsi me aboɔ wɔ amena mu;
Wɔpɛɛ sɛ wotwa me nkwa so na wosiw me abo wɔ amoa mu;
54 nsuo bu faa me tiri so, na ɛyɛɛ me sɛdeɛ wɔrewie me.
nsu bu faa me ti so, na ɛyɛɛ me sɛnea wɔrewie me.
55 Mebɔɔ wo din, Ao Awurade firi amena no ase tɔnn.
Mebɔɔ wo din, Awurade fii amoa no ase tɔnn.
56 Wotee me sufrɛ: “Nsi wʼaso wɔ me gyeɛ sufrɛ ho.”
Wotee me sufrɛ: “Nsiw wʼaso wɔ me gye sufrɛ ho.”
57 Wotwe bɛnee me ɛberɛ a mefrɛɛ woɔ no, na wokaa sɛ, “Nsuro.”
Wutwiw bɛn me bere a mefrɛɛ wo no, na wokae se, “Nsuro.”
58 Ao Awurade, wodii mʼasɛm maa me; na wogyee me nkwa.
Wo Awurade, wudii mʼasɛm maa me; na wugyee me nkwa.
59 Woahunu bɔne a wɔayɛ me, Ao Awurade. Di mʼasɛm ma me!
Woahu bɔne a wɔayɛ me, Awurade. Di mʼasɛm ma me!
60 Woahunu wɔn aweretɔ no mu den, wɔn pɔ a wɔbɔ tia me no nyinaa.
Woahu wɔn aweretɔ no mu den, wɔn pɔw a wɔbɔ tia me no nyinaa.
61 Ao Awurade, woate wɔn sopa, wɔn pɔ a wɔbɔ tia me no nyinaa,
Awurade, woate wɔn ntwirii, wɔn pɔw a wɔbɔ tia me no nyinaa,
62 deɛ mʼatamfoɔ ka no sɛ asomusɛm na wɔka no brɛoo de tia me da mu nyinaa.
nea mʼatamfo ka no asomsɛm na wɔka no brɛoo de tia me da mu nyinaa.
63 Hwɛ wɔn! Sɛ wɔgyinagyina hɔ anaa sɛ wɔtete hɔ, wɔto akutia nnwom de di me ho fɛw.
Hwɛ wɔn! Sɛ wogyinagyina hɔ anaasɛ wɔtete hɔ, wɔto akutia nnwom de di me ho fɛw.
64 Fa deɛ ɛfata tua wɔn so ka, Ao Awurade, deɛ wɔn nsa ayɛ enti.
Fa nea ɛfata tua wɔn so ka, Awurade, nea wɔn nsa ayɛ nti.
65 Pirim wɔn akoma, na ma wo nnome mmra wɔn so.
Pirim wɔn koma, na ma wo nnome mmra wɔn so.
66 Fa abufuo taa wɔn, na sɛe wɔn firi Awurade sorosoro ase.
Fa abufuw taa wɔn, na sɛe wɔn fi Awurade ɔsorosoro ase.
