Nnwom 41

1 Wɔde ma dwonkyerɛfo. Dawid dwom. Nhyira ne onipa a mmɔborɔni asɛm ho hia no; Awurade gye no wɔ amanehunu bere mu.

Wɔde ma dwomkyerɛfoɔ. Dawid dwom. Nhyira ne onipa a mmɔborɔni asɛm ho hia no. Awurade gye no wɔ amanehunu berɛ mu.

2 Awurade bɛbɔ ne ho ban na wakora ne kra; obehyira no wɔ asase no so; ɔrennyaa no mma nʼatamfo apɛde.

Awurade bɛbɔ ne ho ban na wakora ne kra. Ɔbɛhyira no wɔ asase no so; ɔrennyaa no mma nʼatamfoɔ apɛdeɛ.

3 Awurade bɛhwɛ no wɔ ne yare mpa so na wagye no asi hɔ.

Awurade bɛhwɛ no wɔ ne yadeɛ mpa so na wagye no asi hɔ.

4 Mekae se, “Ao Awurade hu me mmɔbɔ; sa me yare, efisɛ mayɛ bɔne atia wo.”

Mekaa sɛ, “Ao Awurade hunu me mmɔbɔ; sa me yadeɛ, ɛfiri sɛ mayɛ bɔne atia wo.”

5 Mʼatamfo de adwene bɔne ka fa me ho se: “Da bɛn na obewu ama ne din ayera?”

Mʼatamfoɔ de adwene bɔne ka wɔ me ho sɛ: “Da bɛn na ɔbɛwu ama ne din ayera?”

6 Bere biara a obi ba me nkyɛn no, ɔka atosɛm, na ne koma hɔre dinsɛe; ofi adi kɔ a, ɔde kodi nseku.

Ɛberɛ biara a obi ba me nkyɛn no, ɔka atorɔsɛm, na nʼakoma hɔre dinsɛeɛ; ɔfiri adi kɔ a, ɔde kɔdi nsekuro.

7 Mʼatamfo nyinaa keka asomsɛm fa me ho; wosusuw bɔne ma me na wɔka se:

Mʼatamfoɔ nyinaa keka asomusɛm fa me ho; wɔsusu bɔne ma me na wɔka sɛ:

8 “Ɔyare bɔne bi abɔ no; ɔrensɔre mfi nea ɔda hɔ bio.”

“Yare bɔne bi abɔ no; ɔrensɔre mfiri deɛ ɔda hɔ bio.”

9 Mpo me yɔnko pa ara a mede me ho too no so, nea me ne no too nsa didii no, asɔre atia me.

Mpo me yɔnko pa ara a mede me ho too ne soɔ, deɛ me ne no too nsa didiiɛ no, asɔre atia me.

10 Nanso wo, Awurade, hu me mmɔbɔ; ma me so, na mintua wɔn so ka.

Nanso wo, Awurade, hunu me mmɔbɔ; pagya me, na mentua wɔn so ka.

11 Minim sɛ wʼani sɔ me, na me tamfo renni me so nkonim.

Menim sɛ wʼani sɔ me, na me ɔtamfoɔ renni me so nkonim.

12 Me nokwaredi mu, wukura me mu na wode me gyina wʼanim afebɔɔ.

Me nokorɛdie mu, wokura me mu na wode me gyina wʼanim afebɔɔ.

13 Nhyira nka Awurade, Israel Nyankopɔn, nnɛ ne daa nyinaa.

Nhyira nka Awurade, Israel Onyankopɔn, ɛnnɛ ne daa nyinaa.