Nnwom 26

1 Dawid dwom. Bu me bem, Awurade, efisɛ, mabɔ bra a asɛm nni ho: mede me ho too Awurade so na manhinhim.

Dawid dwom. Bu me bem, Ao Awurade, ɛfiri sɛ, mabɔ bra a asɛm nni ho: mede me ho too Awurade so na manhinhim.

2 Sɔ me hwɛ, Awurade, hwehwɛ me koma ne mʼadwene mu.

Sɔ me hwɛ, Ao Awurade, hwehwɛ mʼakoma ne mʼadwene mu.

3 Wʼadɔe wɔ mʼanim daa na mɛnantew wo nokware mu.

Wʼadɔeɛ wɔ mʼanim daa na mɛnante wo nokorɛ mu.

4 Me ne nnaadaafo ntena na me ne nyaatwomfo nso nni hwee yɛ.

Me ne nnaadaafoɔ ntena na me ne nyaatwomfoɔ nso nni hwee yɛ.

5 Mikyi nnebɔneyɛfo guabɔ na mempɛ sɛ me ne amumɔyɛfo tena.

Mekyiri nnebɔneyɛfoɔ dwabɔ na mempɛ sɛ me ne amumuyɛfoɔ tena.

6 Mehohoro me nsa wɔ bembu mu, na mekɔ wʼafɔremuka ho ahyia, Awurade,

Mehohoro me nsa wɔ bembuo mu, na makɔ wʼafɔrebukyia ho ahyia, Ao Awurade,

7 na mepae mu ka wʼayeyi na meka wʼanwonwade nyinaa.

na mepae mu ka wʼayɛyie na meka wʼanwanwadeɛ nyinaa.

8 Mʼani gye ofi a wote mu ho, Awurade, faako a wʼanuonyam wɔ no.

Mʼani gye efie a wote mu ho, Ao Awurade, baabi a wʼanimuonyam wɔ no.

9 Mfa me kra nka nnebɔneyɛfo de ho nkɔ, ne me nkwa nka mogyapɛfo de ho,

Mfa me kra nka nnebɔneyɛfoɔ deɛ ho nkɔ. Mfa me nkwa nka mogyapɛfoɔ deɛ ho,

10 wɔn a amumɔyɛ nhyehyɛe wɔ wɔn nsam na adanmude ayɛ wɔn nsa nifa ma.

wɔn a amumuyɛ nhyehyɛeɛ wɔ wɔn nsam na adanmudeɛ ayɛ wɔn nsa nifa ma.

11 Nanso mebɔ ɔbra a ho tew; hu me mmɔbɔ na gye me nkwa.

Nanso mebɔ ɔbra a ɛho teɛ. Hu me mmɔbɔ na gye me nkwa.

12 Mʼanan sisi asase tamaa so; na guabɔ kɛse ase na mɛkamfo Awurade.

Me nan sisi asase tamaa so; na dwabɔ akɛseɛ ase na mɛkamfo Awurade.