Nnwom 130

1 Ɔsoroforo dwom. Awurade, mifi bun mu su frɛ wo;

Ɔsorokorɔ dwom. Ao Awurade, mefiri ebunu mu resu frɛ wo;

2 Awurade, tie me nne. Wɛn wʼaso ma me nkotosrɛ.

Ao Awurade tie me nne. Wɛn wʼaso ma me nkotosrɛ.

3 Awurade, sɛ wubu yɛn bɔne ho nkontaa a, anka hena na obetumi agyina ano?

Ao Awurade, sɛ wobu yɛn bɔne ho nkonta a, anka hwan na ɔbɛtumi agyina ano?

4 Nanso wowɔ bɔnefakyɛ; ɛno nti wosuro wo.

Nanso, wowɔ bɔnefakyɛ; ɛno enti wɔsuro wo.

5 Metwɛn Awurade, me mu ade nyinaa twɛn, na nʼasɛm mu na mede mʼanidaso ahyɛ.

Metwɛn Awurade, me kra twɛn, na nʼasɛm mu na mede mʼanidasoɔ ahyɛ.

6 Metwɛn Awurade sen sɛnea awɛmfo twɛn adekyee, sen sɛnea awɛmfo twɛn adekyee.

Me kra twɛne Awurade sene sɛdeɛ awɛmfoɔ twɛne adekyeɛ, sene sɛdeɛ awɛmfoɔ twene adekyeɛ.

7 Israel, ma wʼani nna Awurade so, efisɛ Awurade wɔ adɔe a enni huammɔ na ogye ankasa wɔ ne mu.

Ao Israel, ma wʼani nna Awurade so, ɛfiri sɛ Awurade wɔ adɔeɛ a ɛwɔ hɔ daa na ɔgyeɛ amapa wɔ ne mu.

8 Ɔno ankasa begye Israel afi wɔn bɔne nyinaa mu.

Ɔno ankasa bɛgye Israel afiri wɔn bɔne nyinaa mu.