Mga Awit 150

1 Purihin si Yahweh. Purihin ang Diyos sa kaniyang banal na lugar; purihin siya sa matataas na kalangitan.

Purihin ninyo ang Panginoon. Purihin ninyo ang Dios sa kaniyang santuario: purihin ninyo siya sa langit ng kaniyang kapangyarihan.

2 Purihin siya dahil sa kaniyang dakilang mga gawain; purihin siya sa kaniyang kadakilaang walang katumbas.

Purihin ninyo siya dahil sa kaniyang mga makapangyarihang gawa: purihin ninyo siya ayon sa kaniyang marilag na kadakilaan.

3 Purihin siya sa ihip ng tambuli; purihin siya gamit ang plawta at alpa.

Purihin ninyo siya ng tunog ng pakakak: purihin ninyo siya ng salterio at alpa.

4 Purihin siya gamit ang tamburin at sayawan; purihin siya gamit ang mga instrumentong may kuwerdas at mga instrumentong hinihipan.

Purihin ninyo siya ng pandereta at sayaw: purihin ninyo siya ng mga panugtog na kawad at ng flauta.

5 Purihin siya gamit ang maiingay na pompyang; purihin siya gamit ang matitinis na pompyang.

Purihin ninyo siya ng mga matunog na simbalo. Purihin ninyo siya sa pinaka matunog na mga simbalo.

6 Purihin si Yahweh ng lahat ng may hininga. Purihin si Yahweh.

Purihin ng bawa't bagay na may hininga ang Panginoon. Purihin ninyo ang Panginoon.