Zaburi 116
1 Nampenda Yahwe kwa kuwa anasikia sauti yangu na kuomba kwangu kwa ajili ya huruma.
Ninampenda Bwana kwa maana amesikia sauti yangu; amesikia kilio changu ili anihurumie.
2 Kwa sababu alinisikiliza, nitamuita yeye ningali ninaishi.
Kwa sababu amenitegea sikio lake, nitamwita siku zote za maisha yangu.
3 Kamba za mauti zilinizunguka, na mitego ya kuzimu ilinikabili; niliona dhiki na huzuni. (Sheol h7585)
Kamba za mauti zilinizunguka, maumivu makuu ya kuzimu yalinipata, nikalemewa na taabu na huzuni. (Sheol h7585)
4 Kisha niliita kwa jina la Yahwe: “Tafadhali Yahwe, uiokoe nafsi yangu.”
Ndipo nikaliitia jina la Bwana: “Ee Bwana, niokoe!”
5 Yahwe ni mwenye neema na haki; Mungu wetu ni mwenye huruma.
Bwana ni mwenye neema na haki, Mungu wetu ni mwingi wa huruma.
6 Yahwe huwalinda wasio na hila; nilishushwa chini akaniokoa.
Bwana huwalinda wanyenyekevu, nilipokuwa katika shida kubwa, aliniokoa.
7 Nafsi yangu inaweza kurudi mahali pake pa kupumzika, kwa kuwa Yahwe amekuwa mwema kwangu.
Ee nafsi yangu, tulia tena, kwa kuwa Bwana amekuwa mwema kwako.
8 Kwa maana uliokoa uhai wangu dhidi ya kifo, mcho yangu dhidi ya machozi, na miguu yangu dhidi ya kujikwaa.
Kwa kuwa wewe, Ee Bwana, umeniokoa nafsi yangu na mauti, macho yangu kutokana na machozi, miguu yangu kutokana na kujikwaa,
9 Nitamtumikia Yahwe katika nchi ya walio hai.
ili niweze kutembea mbele za Bwana, katika nchi ya walio hai.
10 Nilimwamini yeye, hata niliposema, “nimeteswa sana.”
Niliamini, kwa hiyo nilisema, “Mimi nimeteseka sana.”
11 Kwa haraka nilisema, “Watu wote ni waongo.”
Katika taabu yangu nilisema, “Wanadamu wote ni waongo.”
12 Nimlipeje Yahwe kwa wema wake wote kwangu?
Nimrudishie Bwana nini kwa wema wake wote alionitendea?
13 Nitakiinua kikombe cha wokovu, na kuliitia jina la Yahwe.
Nitakiinua kikombe cha wokovu na kulitangaza jina la Bwana.
14 Nitatimiza viapo vyangu kwa Yahwe katika uwepo wa watu wake wote.
Nitazitimiza nadhiri zangu kwa Bwana mbele za watu wake wote.
15 Mauti ya wacha Mungu ina thamani machoni pa Mungu.
Kifo cha watakatifu kina thamani machoni pa Bwana.
16 Ee Yahwe, hakika, mimi ni mtumishi wako; mimi ni mtumishi wako, mwana wa mjakazi wako; umefungua vifungo vyangu.
Ee Bwana, hakika mimi ni mtumishi wako, mimi ni mtumishi wako, mwana wa mjakazi wako; umeniweka huru toka katika minyororo yangu.
17 Nitakutolea dhabihu ya shukrani na nitaliitia jina la Yahwe.
Nitakutolea dhabihu ya kukushukuru na kuliita jina la Bwana.
18 Nitatimiza viapo vyangu kwa Yahwe katika uwepo wa watu wake wote,
Nitazitimiza nadhiri zangu kwa Bwana mbele za watu wake wote,
19 katika nyua za nyumba ya Yahwe, katikati yako, Yerusalemu. Msifuni Yahwe.
katika nyua za nyumba ya Bwana, katikati yako, ee Yerusalemu. Msifuni Bwana.
