Zaburi 112

1 Msifuni Bwana. Heri mtu yule amchaye Bwana, mtu yule apendezwaye sana na amri zake.

Msifuni Yahwe. Amebarikiwa mtu yule anaye mtii Yahwe, apendezwaye sana na amri zake.

2 Watoto wake watakuwa wenye uwezo katika nchi, kizazi cha watu waadilifu kitabarikiwa.

Kizazi chake kitakuwa ni chenye nguvu duniani; kizazi cha mcha Mungu kitabarikiwa.

3 Nyumbani mwake kuna mali na utajiri, haki yake hudumu milele.

Nyumbani mwake mna utajiri na mali; na haki yake itadumu milele.

4 Hata gizani nuru humzukia mtu mwadilifu, yule mwenye rehema, huruma na haki.

Nuru huangazia gizani kwa ajili ya mtu mcha Mungu; yeye ni wa fadhili, huruma, na haki.

5 Mema yatamjia mtu yule aliye mkarimu na mwenye kukopesha bila riba, anayefanya mambo yake kwa haki.

Heri atendaye fadhili na kukopesha, afanyaye mambo yake kwa uaminifu.

6 Hakika hatatikisika kamwe, mtu mwenye haki atakumbukwa milele.

Kwa maana hataondoshwa kamwe; mwenye haki atakumbukwa milele.

7 Hataogopa habari mbaya, moyo wake ni thabiti, ukimtegemea Bwana.

Haogopi habari mbaya; ni jasiri, akimtumainia Yahwe.

8 Moyo wake ni salama, hatakuwa na hofu, mwishoni ataona ushindi dhidi ya adui zake.

Moyo wake ni mtulivu, hana woga, mpaka aonapo ushindi dhidi ya watesi wake.

9 Ametawanya vipawa vyake kwa ukarimu akawapa maskini; haki yake hudumu milele; pembe yake itatukuzwa kwa heshima.

Huwapa masikini kwa ukarimu; haki yake yadumu milele; atainuliwa kwa heshima.

10 Mtu mwovu ataona na kuchukizwa, atasaga meno yake na kutoweka, kutamani kwa mtu mwovu kutaishia patupu.

Mtu mwovu ataona haya na kukasirika; atasaga meno yake na kuyeyuka; tamaa ya wasio haki itapotea.