Книга пророка Исаии 34

1 Приступите, языцы, и услышите, князи: да слышит земля и живущии на ней, вселенная и людие, иже на ней.

2 Зане ярость Господня на вся языки и гнев на число их, еже погубити их и предати я на заклание.

3 И язвении их повергнутся и мертвецы, и взыдет их смрад, и намокнут горы кровию их:

4 и истают вся силы небесныя, и свиется небо аки свиток, и вся звезды спадут яко листвие с лозы, и якоже спадает листвие смоковницы.

5 Упися мечь Мой на небеси: се, на Идумею снидет и на люди пагубныя с судом.

6 Мечь Господень наполнися крове, растолсте туком, от крове козлов и агнцев и от тука козлов и овнов: яко жертва Господеви в Восоре, и заклание велие во Идумеи.

7 И падут с ними сильнии, и овны и юнцы, и упиется земля от крове и от тука их насытится:

8 день бо суда Господня, и лето воздаяния суда Сионя.

9 И обратятся дебри его в смолу, и земля его в жупел,

10 и будет земля его горящи яко смола днем и нощию, и не угаснет в вечное время, и взыдет дым ея высоце, в роды своя опустеет.

11 И во время много птицы и ежеве, совы и вранове возгнездятся в нем: и возложат нань уже землемерно пустыни, и онокентаври вселятся в нем.

12 Князи его не будут: царие бо и вельможи его будут в пагубу.

13 И возникнут во градех их терновая древеса и во твердынех его, и будут селения сирином и селища струфионом:

14 и срящутся беси со онокентавры и возопиют друг ко другу, ту почиют онокентаври, обретше себе покоища:

15 тамо возгнездится ежь, и сохранит земля дети его со утверждением: тамо елени сретошася и увидеша лица друг друга.

16 Числом преидоша, и един и них не погибе, друг друга не взыска, яко Господь заповеда им, и дух Его собра я.

17 И Той вержет им жребия, и рука Его раздели пастися: в вечное время наследите, в роды родов почиют в нем.