< 1 කරින්ථිනඃ 3 >
1 හේ භ්රාතරඃ, අහමාත්මිකෛරිව යුෂ්මාභිඃ සමං සම්භාෂිතුං නාශක්නවං කින්තු ශාරීරිකාචාරිභිඃ ඛ්රීෂ්ටධර්ම්මේ ශිශුතුල්යෛශ්ච ජනෛරිව යුෂ්මාභිඃ සහ සමභාෂේ|
2 යුෂ්මාන් කඨිනභක්ෂ්යං න භෝජයන් දුග්ධම් අපායයං යතෝ යූයං භක්ෂ්යං ග්රහීතුං තදා නාශක්නුත ඉදානීමපි න ශක්නුථ, යතෝ හේතෝරධුනාපි ශාරීරිකාචාරිණ ආධ්වේ|
3 යුෂ්මන්මධ්යේ මාත්සර්ය්යවිවාදභේදා භවන්ති තතඃ කිං ශාරීරිකාචාරිණෝ නාධ්වේ මානුෂිකමාර්ගේණ ච න චරථ?
4 පෞලස්යාහමිත්යාපල්ලෝරහමිති වා යද්වාක්යං යුෂ්මාකං කෛශ්චිත් කෛශ්චිත් කථ්යතේ තස්මාද් යූයං ශාරීරිකාචාරිණ න භවථ?
5 පෞලඃ කඃ? ආපල්ලෝ ර්වා කඃ? තෞ පරිචාරකමාත්රෞ තයෝරේකෛකස්මෛ ච ප්රභු ර්යාදෘක් ඵලමදදාත් තද්වත් තයෝර්ද්වාරා යූයං විශ්වාසිනෝ ජාතාඃ|
6 අහං රෝපිතවාන් ආපල්ලෝශ්ච නිෂික්තවාන් ඊශ්වරශ්චාවර්ද්ධයත්|
7 අතෝ රෝපයිතෘසේක්තාරාවසාරෞ වර්ද්ධයිතේශ්වර ඒව සාරඃ|
8 රෝපයිතෘසේක්තාරෞ ච සමෞ තයෝරේකෛකශ්ච ස්වශ්රමයෝග්යං ස්වවේතනං ලප්ස්යතේ|
9 ආවාමීශ්වරේණ සහ කර්ම්මකාරිණෞ, ඊශ්වරස්ය යත් ක්ෂේත්රම් ඊශ්වරස්ය යා නිර්ම්මිතිඃ සා යූයමේව|
10 ඊශ්වරස්ය ප්රසාදාත් මයා යත් පදං ලබ්ධං තස්මාත් ඥානිනා ගෘහකාරිණේව මයා භිත්තිමූලං ස්ථාපිතං තදුපරි චාන්යේන නිචීයතේ| කින්තු යේන යන්නිචීයතේ තත් තේන විවිච්යතාං|
11 යතෝ යීශුඛ්රීෂ්ටරූපං යද් භිත්තිමූලං ස්ථාපිතං තදන්යත් කිමපි භිත්තිමූලං ස්ථාපයිතුං කේනාපි න ශක්යතේ|
12 ඒතද්භිත්තිමූලස්යෝපරි යදි කේචිත් ස්වර්ණරූප්යමණිකාෂ්ඨතෘණනලාන් නිචින්වන්ති,
13 තර්හ්යේකෛකස්ය කර්ම්ම ප්රකාශිෂ්යතේ යතඃ ස දිවසස්තත් ප්රකාශයිෂ්යති| යතෝ හතෝස්තන දිවසේන වහ්නිමයේනෝදේතව්යං තත ඒකෛකස්ය කර්ම්ම කීදෘශමේතස්ය පරීක්ෂා බහ්නිනා භවිෂ්යති|
14 යස්ය නිචයනරූපං කර්ම්ම ස්ථාස්නු භවිෂ්යති ස වේතනං ලප්ස්යතේ|
15 යස්ය ච කර්ම්ම ධක්ෂ්යතේ තස්ය ක්ෂති ර්භවිෂ්යති කින්තු වහ්නේ ර්නිර්ගතජන ඉව ස ස්වයං පරිත්රාණං ප්රාප්ස්යති|
16 යූයම් ඊශ්වරස්ය මන්දිරං යුෂ්මන්මධ්යේ චේශ්වරස්යාත්මා නිවසතීති කිං න ජානීථ?
17 ඊශ්වරස්ය මන්දිරං යේන විනාශ්යතේ සෝ(අ)පීශ්වරේණ විනාශයිෂ්යතේ යත ඊශ්වරස්ය මන්දිරං පවිත්රමේව යූයං තු තන්මන්දිරම් ආධ්වේ|
18 කෝපි ස්වං න වඤ්චයතාං| යුෂ්මාකං කශ්චන චේදිහලෝකස්ය ඥානේන ඥානවානහමිති බුධ්යතේ තර්හි ස යත් ඥානී භවේත් තදර්ථං මූඪෝ භවතු| (aiōn )
19 යස්මාදිහලෝකස්ය ඥානම් ඊශ්වරස්ය සාක්ෂාත් මූඪත්වමේව| ඒතස්මින් ලිඛිතමප්යාස්තේ, තීක්ෂ්ණා යා ඥානිනාං බුද්ධිස්තයා තාන් ධරතීශ්වරඃ|
20 පුනශ්ච| ඥානිනාං කල්පනා වේත්ති පරමේශෝ නිරර්ථකාඃ|
21 අතඒව කෝ(අ)පි මනුජෛරාත්මානං න ශ්ලාඝතාං යතඃ සර්ව්වාණි යුෂ්මාකමේව,
22 පෞල වා ආපල්ලෝ ර්වා කෛඵා වා ජගද් වා ජීවනං වා මරණං වා වර්ත්තමානං වා භවිෂ්යද්වා සර්ව්වාණ්යේව යුෂ්මාකං,
23 යූයඤ්ච ඛ්රීෂ්ටස්ය, ඛ්රීෂ්ටශ්චේශ්වරස්ය|