< ಪ್ರಕಾಶಿತಂ 12 >
1 ತತಃ ಪರಂ ಸ್ವರ್ಗೇ ಮಹಾಚಿತ್ರಂ ದೃಷ್ಟಂ ಯೋಷಿದೇಕಾಸೀತ್ ಸಾ ಪರಿಹಿತಸೂರ್ಯ್ಯಾ ಚನ್ದ್ರಶ್ಚ ತಸ್ಯಾಶ್ಚರಣಯೋರಧೋ ದ್ವಾದಶತಾರಾಣಾಂ ಕಿರೀಟಞ್ಚ ಶಿರಸ್ಯಾಸೀತ್|
2 ಸಾ ಗರ್ಭವತೀ ಸತೀ ಪ್ರಸವವೇದನಯಾ ವ್ಯಥಿತಾರ್ತ್ತರಾವಮ್ ಅಕರೋತ್|
3 ತತಃ ಸ್ವರ್ಗೇ ಽಪರಮ್ ಏಕಂ ಚಿತ್ರಂ ದೃಷ್ಟಂ ಮಹಾನಾಗ ಏಕ ಉಪಾತಿಷ್ಠತ್ ಸ ಲೋಹಿತವರ್ಣಸ್ತಸ್ಯ ಸಪ್ತ ಶಿರಾಂಸಿ ಸಪ್ತ ಶೃಙ್ಗಾಣಿ ಶಿರಃಸು ಚ ಸಪ್ತ ಕಿರೀಟಾನ್ಯಾಸನ್|
4 ಸ ಸ್ವಲಾಙ್ಗೂಲೇನ ಗಗನಸ್ಥನಕ್ಷತ್ರಾಣಾಂ ತೃತೀಯಾಂಶಮ್ ಅವಮೃಜ್ಯ ಪೃಥಿವ್ಯಾಂ ನ್ಯಪಾತಯತ್| ಸ ಏವ ನಾಗೋ ನವಜಾತಂ ಸನ್ತಾನಂ ಗ್ರಸಿತುಮ್ ಉದ್ಯತಸ್ತಸ್ಯಾಃ ಪ್ರಸವಿಷ್ಯಮಾಣಾಯಾ ಯೋಷಿತೋ ಽನ್ತಿಕೇ ಽತಿಷ್ಠತ್|
5 ಸಾ ತು ಪುಂಸನ್ತಾನಂ ಪ್ರಸೂತಾ ಸ ಏವ ಲೌಹಮಯರಾಜದಣ್ಡೇನ ಸರ್ವ್ವಜಾತೀಶ್ಚಾರಯಿಷ್ಯತಿ, ಕಿಞ್ಚ ತಸ್ಯಾಃ ಸನ್ತಾನ ಈಶ್ವರಸ್ಯ ಸಮೀಪಂ ತದೀಯಸಿಂಹಾಸನಸ್ಯ ಚ ಸನ್ನಿಧಿಮ್ ಉದ್ಧೃತಃ|
6 ಸಾ ಚ ಯೋಷಿತ್ ಪ್ರಾನ್ತರಂ ಪಲಾಯಿತಾ ಯತಸ್ತತ್ರೇಶ್ವರೇಣ ನಿರ್ಮ್ಮಿತ ಆಶ್ರಮೇ ಷಷ್ಠ್ಯಧಿಕಶತದ್ವಯಾಧಿಕಸಹಸ್ರದಿನಾನಿ ತಸ್ಯಾಃ ಪಾಲನೇನ ಭವಿತವ್ಯಂ|
7 ತತಃ ಪರಂ ಸ್ವರ್ಗೇ ಸಂಗ್ರಾಮ ಉಪಾಪಿಷ್ಠತ್ ಮೀಖಾಯೇಲಸ್ತಸ್ಯ ದೂತಾಶ್ಚ ತೇನ ನಾಗೇನ ಸಹಾಯುಧ್ಯನ್ ತಥಾ ಸ ನಾಗಸ್ತಸ್ಯ ದೂತಾಶ್ಚ ಸಂಗ್ರಾಮಮ್ ಅಕುರ್ವ್ವನ್, ಕಿನ್ತು ಪ್ರಭವಿತುಂ ನಾಶಕ್ನುವನ್
8 ಯತಃ ಸ್ವರ್ಗೇ ತೇಷಾಂ ಸ್ಥಾನಂ ಪುನ ರ್ನಾವಿದ್ಯತ|
9 ಅಪರಂ ಸ ಮಹಾನಾಗೋ ಽರ್ಥತೋ ದಿಯಾವಲಃ (ಅಪವಾದಕಃ) ಶಯತಾನಶ್ಚ (ವಿಪಕ್ಷಃ) ಇತಿ ನಾಮ್ನಾ ವಿಖ್ಯಾತೋ ಯಃ ಪುರಾತನಃ ಸರ್ಪಃ ಕೃತ್ಸ್ನಂ ನರಲೋಕಂ ಭ್ರಾಮಯತಿ ಸ ಪೃಥಿವ್ಯಾಂ ನಿಪಾತಿತಸ್ತೇನ ಸಾರ್ದ್ಧಂ ತಸ್ಯ ದೂತಾ ಅಪಿ ತತ್ರ ನಿಪಾತಿತಾಃ|
10 ತತಃ ಪರಂ ಸ್ವರ್ಗೇ ಉಚ್ಚೈ ರ್ಭಾಷಮಾಣೋ ರವೋ ಽಯಂ ಮಯಾಶ್ರಾವಿ, ತ್ರಾಣಂ ಶಕ್ತಿಶ್ಚ ರಾಜತ್ವಮಧುನೈವೇಶ್ವರಸ್ಯ ನಃ| ತಥಾ ತೇನಾಭಿಷಿಕ್ತಸ್ಯ ತ್ರಾತುಃ ಪರಾಕ್ರಮೋ ಽಭವತ್ಂ|| ಯತೋ ನಿಪಾತಿತೋ ಽಸ್ಮಾಕಂ ಭ್ರಾತೃಣಾಂ ಸೋ ಽಭಿಯೋಜಕಃ| ಯೇನೇಶ್ವರಸ್ಯ ನಃ ಸಾಕ್ಷಾತ್ ತೇ ಽದೂಷ್ಯನ್ತ ದಿವಾನಿಶಂ||
11 ಮೇಷವತ್ಸಸ್ಯ ರಕ್ತೇನ ಸ್ವಸಾಕ್ಷ್ಯವಚನೇನ ಚ| ತೇ ತು ನಿರ್ಜಿತವನ್ತಸ್ತಂ ನ ಚ ಸ್ನೇಹಮ್ ಅಕುರ್ವ್ವತ| ಪ್ರಾಣೋಷ್ವಪಿ ಸ್ವಕೀಯೇಷು ಮರಣಸ್ಯೈವ ಸಙ್ಕಟೇ|
12 ತಸ್ಮಾದ್ ಆನನ್ದತು ಸ್ವರ್ಗೋ ಹೃಷ್ಯನ್ತಾಂ ತನ್ನಿವಾಮಿನಃ| ಹಾ ಭೂಮಿಸಾಗರೌ ತಾಪೋ ಯುವಾಮೇವಾಕ್ರಮಿಷ್ಯತಿ| ಯುವಯೋರವತೀರ್ಣೋ ಯತ್ ಶೈತಾನೋ ಽತೀವ ಕಾಪನಃ| ಅಲ್ಪೋ ಮೇ ಸಮಯೋ ಽಸ್ತ್ಯೇತಚ್ಚಾಪಿ ತೇನಾವಗಮ್ಯತೇ||
13 ಅನನ್ತರಂ ಸ ನಾಗಃ ಪೃಥಿವ್ಯಾಂ ಸ್ವಂ ನಿಕ್ಷಿಪ್ತಂ ವಿಲೋಕ್ಯ ತಾಂ ಪುತ್ರಪ್ರಸೂತಾಂ ಯೋಷಿತಮ್ ಉಪಾದ್ರವತ್|
14 ತತಃ ಸಾ ಯೋಷಿತ್ ಯತ್ ಸ್ವಕೀಯಂ ಪ್ರಾನ್ತರಸ್ಥಾಶ್ರಮಂ ಪ್ರತ್ಯುತ್ಪತಿತುಂ ಶಕ್ನುಯಾತ್ ತದರ್ಥಂ ಮಹಾಕುರರಸ್ಯ ಪಕ್ಷದ್ವಯಂ ತಸ್ವೈ ದತ್ತಂ, ಸಾ ತು ತತ್ರ ನಾಗತೋ ದೂರೇ ಕಾಲೈಕಂ ಕಾಲದ್ವಯಂ ಕಾಲಾರ್ದ್ಧಞ್ಚ ಯಾವತ್ ಪಾಲ್ಯತೇ|
15 ಕಿಞ್ಚ ಸ ನಾಗಸ್ತಾಂ ಯೋಷಿತಂ ಸ್ರೋತಸಾ ಪ್ಲಾವಯಿತುಂ ಸ್ವಮುಖಾತ್ ನದೀವತ್ ತೋಯಾನಿ ತಸ್ಯಾಃ ಪಶ್ಚಾತ್ ಪ್ರಾಕ್ಷಿಪತ್|
16 ಕಿನ್ತು ಮೇದಿನೀ ಯೋಷಿತಮ್ ಉಪಕುರ್ವ್ವತೀ ನಿಜವದನಂ ವ್ಯಾದಾಯ ನಾಗಮುಖಾದ್ ಉದ್ಗೀರ್ಣಾಂ ನದೀಮ್ ಅಪಿವತ್|
17 ತತೋ ನಾಗೋ ಯೋಷಿತೇ ಕ್ರುದ್ಧ್ವಾ ತದ್ವಂಶಸ್ಯಾವಶಿಷ್ಟಲೋಕೈರರ್ಥತೋ ಯ ಈಶ್ವರಸ್ಯಾಜ್ಞಾಃ ಪಾಲಯನ್ತಿ ಯೀಶೋಃ ಸಾಕ್ಷ್ಯಂ ಧಾರಯನ್ತಿ ಚ ತೈಃ ಸಹ ಯೋದ್ಧುಂ ನಿರ್ಗತವಾನ್|
