Holy Bible Aionian Edition® ~ Sakachep---Sakachep-Bible ~ Luke Chapter 1

< Luke 1 >

1 Moroitak Theophilus, ei lâia roi juong tung, mi tamtak ngeiin theidôr miziek rangin an pûta. 2 Aphut renga ha neinunngei amu ngeiin kin lei ril le chong lei phuong anghan an miziek ani. 3 Masikin nangma Mirittak, abul renga jâttin ânthârlaka sûiin adônin inthârlakin nata rangin miziek ronga ki ti ani. 4 Tienna thurchi nang an lei ril hah adiktak ani iti na riet theina rangin. 5 Judea rama Herod rêngin an lallâiin, ochai a riming Zakariah a oma, ama hah ochai Abijah rûia mi ania, a lômnu riming chu Elizabeth ania, Aaron ochairûia mi ani. 6 An ruonin Pathien mitmun mi diktakin an omma, demnaboiin Pumapa balam le a chong jômin an om ani. 7 Hannisenla Elizabeth aching sikin nâi nei maka, an ruonin an tar ok zoia. 8 Hanchu sûnkhat chu Zakariah hah nîngtina asin ngâi angin Biekina ochai sin a thoa. 9 Ochaingei balam angin mirimhoi hâl rangin taruo sânin ama hah thangin a oma, masikin Pumapa Biekina a sea. 10 Mirimhoi a hâl lâiin mipui ngeiin apêntieng chubai an lei thoa. 11 Mirimhoi hâlna mâichâm changtienga han, Pumapa vântîrton indingin a kôm a juong inlâra. 12 Zakariah'n amu lehan rolo innîkin a chia. 13 Hannisenla, vântîrton han a kôma, “Zakariah chi no roh, ne ngênna Pathien'n a rieta, no lômnu Elizabeth'n nâi nang nei pe a ta a riming John ni phuo rang ani. 14 A suokin chu nangma le mi tamtak mulungrîl râisân atih. 15 Pumapa mitmûn milien nîng a ta, uain le jûngei reng nêk no nia. A suokni renga Ratha Inthiengin sip a ta, 16 Isreal mi tamtak Pumapa an Pathien tieng hong tuong nôk a tih. 17 Dêipu Elijah anghan rât le hâitakin Pumapa motona sêng a tih. Pangei le nâingei minmun nôk a ta, chongjômloi mingei mindonna satna tieng min hei a ta, Pumapa mingei ata rangin min thokdiem a tih” a tia. 18 Zakariah'n vântîrton kôma han, “mahah inmo ki riet rang? keima laka ka tar zoia, ko lômnu khom a tar zoia,” a tia. 19 Vântîrton han, “Pathien makunga inding ngâi Gabriel ki nia, hi thurchi nang ril rang piela juongtîr ki ni. 20 Hi chong azora taka juong tung rang ni iemloi sikin, ajuong tung mâka chu chong theiloiin dâirekin om ni tih,” a tia. 21 Mipui ngeiin kholâia an lei ngâka, Biekin sûnga Zechariah a om sôt rai sikin an lei kamâma. 22 A hong jôk tena chu a chong thei khâiloi sikin Biekina inlârna ai mu iti an rieta, a kut leh vai a chong zoia. 23 Biekina a sin rang a zoi suole chu a in tieng a kîr zoia. 24 Môrkhat suoleh chu a lômnu Elizabeth nâi a vong zoia, thâ rangnga tuol suok loiin a oma. 25 “Anûktaka Pumapa'n mi san nôk zoi, ki riming siet, sût minthelna rangin” a tia. 26 Elizabeth nâivong, atha ruk nân chu Pathien'n a vântîrton Gabriel Galilee ram Nazareth khopuia a tîra. 27 Rêng David rûia mi Joseph lômnu biek dôngmate Mary kôma chong juong ichôiin. 28 Mary kôma a lûta, “Nu chunga ratha inngamna om rese! Pumapa nu chunga a om, sat nang a vur ok” a tia. 29 Ha chong hah a rieta anîn chu imo ani zoi, tiin a mulung a minjîng oka. 30 Hanchu, vântîrton han, “Mary chi no roh, Pathien'n ai minlut tak mi nini. 31 Nâivong na ta, nâipasal nei na ta, a riming Jisua ni phuo rang ani. 32 Mi lien nîng a ta, Ânchungtaka Pathien nâi tîng an tih. Pumapa Pathien'n David anghan Rêng minchang a tih. 33 Jakob richingei chunga rêngin om a ta, ânlalna ramin mong tik nei khâi no nih” a tia. (aiōn g165) 34 Hanchu Mary'n vântîrton kôma, “Mahah kho angin mo anithei ranga? dôngmate kêng ka lani hite” a tia. 35 Vântîrton han a thuona, “Ratha Inthieng nu chunga juong a ta, Pathien Ratha nu chunga om a tih. Masikin kêng nâite inthieng khom Pathien Nâipasala be ani rang. 36 Nu juorpuinu Elizabeth khom aching an iti hah, a tar ok khoma a nâivongna thâ ruk ani zoi. 37 Asikchu Pathien chu ite a tho theiloi omak,” a ti pea. 38 Hanchu, Mary'n, “Pumapa tîrlâmnu ki ni, ni ti lam angtakin ku chunga tung rese,” a tia. Masuole chu vântîrton han ama amâk zoi. 39 Masuole inrangin Mary ânthoka, Judea rama khopui inkhata a se zoia. 40 Zakariah ina a lûta, Elizabeth chibai amûka. 41 Elizabeth'n Mary chibaimûk a riet lehan a sûnga nâite hah singânsa, Elizabeth Ratha Inthiengin a sipa. 42 Hanchu rôl inring takin ânieka, “Nang chu nupang lâia mi satvur tak ni nia, na nâivong rang khom hih satvur ani. 43 Ka Pumapa nûn ni na hongpan hih i ang tak mo ai ni zoi hi? 44 Nu chibaimûk ki riet lehan ku sûnga nâite râisânin ânchôm ani. 45 Pumapa chongbê na chunga tung rang ni iem sikin mi satvur ni ni” a tia. 46 Hanchu Mary'n “ka mulungin Pumapa a minpâka, 47 ki ringnân khom Minringpu Pathien chunga a râisân ok zoi. 48 A tîrlâmnu intem tie a riettit sikin! Atûn renga chu mitinin satvur ni tîng an tih. 49 Sinthothei Pathien han ku chunga sin lientak a thoa, A riming khom ânthieng ani. 50 Ruol athar renga ruol thoithar nôk idênin, Ama mirit ngei chu a moroi ngâia, 51 A bân ranak an chunga a jâra, Mi inpâk ngei chu an mintuona ngei leh chekaminchâi ngâia. 52 An sukmun renga rêng alien ngei a kaisuma, Rangâichîn ngei chu a domsâng zoia. 53 Vonchâmngei chu neinun sân a vâi minkhopa, Ânchongngei chu kut korongin a min rot ngei zoia. 54 Ei richibulngei kôma a chonginkhâm anghan, A tîrlâm Isrealngei san rangin a juong zoi. 55 Abraham le a richingei kumkhuon a moroi tie riettitna rangin” a tia. (aiōn g165) 56 Mary hah Elizabeth kôm thâ thum a oma, hanchu a in tieng a se nôk zoi. 57 Elizabeth nâinei zora ahong chukin chu nâipasal a neia, 58 A bungmingei le a suongsuokngeiin, Pumapa'n lungkham a mu ok iti an rieta, an râisân puia. 59 Hanchu, sûnriet anîn chu nâite sertan rangin an honga, a pa riming pêlin Zakariah nanâk phuo rang an tia, 60 Hannisenla, a nûn “nithei nonih, a riming chu John kêng” a tia. 61 Annin, “Hi anga riming hih nin suongsuokngei lâia khom la om ngâi mak” an tipea. 62 Maleh a pa kôm han kut leh an chongpuia, nâite riming hah imo ai phuo nuom, tiin an rekela. 63 Zakariah'n a miziekna rang neinun a zonga, a riming chu John ani tiin a mizieka; an kamâm sabaka. 64 Harenghan, Zakariah hah a hong chong thei zoia, Pathien a minpâk kelen zoi. 65 An kôl revêla om ngei murdi'n an chia, ha thurchi hah Judea tângram muntina ânthang zoia. 66 Ariet nâmin hi nâite hih i ang takin mo a hong ni rang na? Pumapa sinthotheina ranak laka a chunga a oma, an tia. 67 John a pa Zakariah hah Ratha Inthiengin a sipa, Pathien chong a phuonga. 68 “Pumapa, Isreal Pathien chu minpâk ei tih u, A mingei san rangin a juonga, a mojôk ngei zoi. 69 A tîrlâm David richi renga jôkna riki mi pêk zoi. 70 Zora sôt tak renga dêipungei kôma a lei khâm anga han, (aiōn g165) 71 Ei râlngei le mi demngei renga mi mojôka, 72 A chongkhâm inthieng ei richibulngei kôma minlang rang ai ti riet titin. 73 Ei richibul Abraham kôma a chongkhâm ei râlngei renga mi san minjôka, chi loia a sin ei tho theina rang le, 74 75 Ei damsûnga a mitmua inthieng le adika ei om theina rangin. 76 Nangma ka nâi, Ânchungtaka Dêipu nang tîng an ta, A lampui sin rangin, Pumapa motona sêng ni tih. 77 A mingei an sietna ngâidama omin, Sanminringna chong ril ni tih. 78 Ei Pathien chu mi lungkham thei le moroithei ania, Masikin ei rangin sanminringna khuovâr mi minsuok pe a ta; 79 Thina dâilîm ijîngna nuioa omngei, Invân renga êlminvâr a ta, Ei kalchôina rathangamna lampui tieng mi tuong a tih” a tia. 80 Hanchu, nâite hah taksa le ratha tieng a hong insôn tira, Isreal mingei lâia ânlâr mâka chu ramchâra a om ani.

Go to > Bookmark / Concordance / Maps / Report Issue

John the Baptist Preaches in the Wilderness

The world's first Holy Bible un-translation!