Psalms 103

1 Neni i kapina Ieowa o lol i mar a jaraui!

2 Neni i kapina Ieowa, o der monokela a kotin wiawia mau on uk!

3 Me kotin makeki on uk dip om karoj, ap kotin kamauiala om jomau kan.

4 Me kotin dore uk ala jan ni waja apwal, me kotin ninie kin uk mak o kalanan.

5 Me kotin kapai uk adar ni om malar, o kotin kapulpul uk ala dueta adler.

6 En Ieowa a wiawia me pun, o a kotin kapunala, me mi ni kalokolok japun.

7 A kotin kajale on Mojej al en a meakaroj, o on men Ijrail a wiawia kan.

8 Ieowa me dir en kalanan o mak, a kin kotin kanonama, o a kalanan me lapalap.

9 A jota kin kotin kaloke aramaj anjau karoj, o pil jota onion kokolata.

10 A jota kotin pwain on kitail duen dip atail, o jota depuk on kitail duen atail japun kan.

11 A duen ileile en lan jan jappa, iduen a mak lapalap on ir, me kin majak i.

12 Duen maj en lan o kapin lan ara doo pajan, iduen a kotin kadooana wei jan kitail dip atail.

13 Duen jam amen pokepoko na jeri, iduen Kot kotin kupukupura irail, me lan i.

14 Pwe a kotin mani, da me kitail wiaui kida, a kotin mani, me kitail me pwel par.

15 Aramaj amen kin rajon ra, a kin majal pajan dueta wan tuka nan jap o.

16 Ma kijinian pan leler, a joer mia, o a jolar aja deu a.

17 A kalanan en Ieowa pan duedueta kokolata on ir, me lan i, o a melel on jeri en jeri kan,

18 On ir, me kin kolekol a inau, o madamadaua duen a majan kan, pwen kapwaiada.

19 Ieowa kotin kauada mol a nanlan, o a kotin kaunda meakan karoj.

20 Kapikapina Ieowa, komail japwilim a tounlan kan, komail me lapalap akan ni manaman, me kin kapwaiada a majan kan, o peiki on moat en a majan!

21 Kapikapina Ieowa japwilim a pokon akan karoj, o japwilim a ladu kan, me kin kapwaiada kupur a!

22 Kapikapina Ieowa japwilim a dipijou kan ni waja karoj, me a kotin kakaun, nen i kapina Ieowa!