Amahubo 2

1 Kungani izizwe zixokozela, labantu benakana okuyize?

Kungani izizwe zixokozela, labantu besakha amacebo ngeze?

2 Amakhosi omhlaba azimisela, lababusi benza ugobe ndawonye bemelene leNkosi njalo bemelene logcotshiweyo wayo, besithi:

Amakhosi omhlaba ayahloma ajame lababusi bahlangana ndawonye bemelana loThixo njalo lalowo ogcotshiweyo wakhe besithi;

3 Asiqamule izibopho zabo, silahle intambo zabo zisuke kithi.

“Kasiwaqamuleni amaketane abo, silahle izibopho zabo.”

4 Ohlezi emazulwini uzahleka, iNkosi izabahleka usulu.

Yena osesihlalweni ezulwini uyahleka; uThixo uyabahleka.

5 Khona izakhuluma kubo entukuthelweni yayo, ibethuse ngokuvutha kolaka lwayo.

Abesebakhalimela ngolaka, abathuthumelise ngentukuthelo yakhe, esithi,

6 Kube kanti mina ngibekile iNkosi yami phezu kweZiyoni, intaba yami engcwele.

“Sengiyibekile eyami inkosi phezu kweZiyoni, intaba yami engcwele.”

7 Ngizalandisa ngesimiso: INkosi ithe kimi: Wena uyiNdodana yami, lamuhla ngikuzele.

Ngizasimemezela isimiso sikaThixo: Wathi kimi, “UyiNdodana yami; lamhla sengibe nguyihlo.

8 Cela kimi, ngizanika izizwe zibe yilifa lakho, lemikhawulo yomhlaba ibe yimfuyo yakho.

Cela kimi, ngizakwenza izizwe zibe yilifa lakho, imikhawulo yomhlaba kube yinotho yakho.

9 Uzazephula ngentonga yensimbi, uziphahlaze njengembiza yebumba.

Uzazibusa ngentonga yobukhosi eyensimbi, uzazibhidliza zicubuzeke njengebumba.”

10 Ngakho-ke hlakaniphani makhosi, lilayeke bahluleli bomhlaba.

Ngakho-ke lina makhosi, limukani, liyaxwayiswa lina babusi bomhlaba.

11 Ikhonzeni iNkosi ngokwesaba, lithokoze ngokuthuthumela,

Mkhonzeni uThixo ngokumesaba, lithokozele umbuso wakhe ngokuthuthumela.

12 liyange iNdodana, hlezi ithukuthele, libhubhe endleleni, nxa ulaka lwayo seluvutha kancinyane. Babusisiwe bonke abaphephela kuyo.

Ikhothameleni iNdodana, funa ithukuthele beselibhujiswa endleleni yenu, ngoba intukuthelo yakhe ingavutha ngesikhatshana. Babusisiwe bonke abaphephela kuye.