Amahubo 122

1 Ngathokoza lapho besithi kimi: Kasiye endlini yeNkosi.

Ingoma yemiqanso. ElikaDavida. Ngathokoza lalabo abathi kimi, “Kasiye endlini kaThixo.”

2 Inyawo zethu zimi emasangweni akho, Jerusalema.

Inyawo zethu zimi ngaphakathi kwamasango akho, wena Jerusalema.

3 IJerusalema yakhiwe njengomuzi ohlangeneyo ngokwawo,

IJerusalema yakhiwe njengomuzi obambeneyo waqina.

4 lapho izizwe ezenyukela khona, izizwe zeNkosi, kubufakazi bukaIsrayeli, ukuze zibonge ibizo leNkosi.

Kulapho eziqansela khona izizwana, izizwana zikaThixo, ukudumisa ibizo likaThixo njengalokho okwamiselwa u-Israyeli, ukuba abonge ibizo likaThixo.

5 Ngoba kumiswe khona izihlalo zobukhosi zesahlulelo, izihlalo zobukhosi zendlu kaDavida.

Kulapho okumi khona izihlalo zobukhosi ezokwahlulela, izihlalo zobukhosi ezendlu kaDavida.

6 Khulekelani ukuthula kweJerusalema; bazaphumelela abakuthandayo.

Khulekelani ukuthula kwaseJerusalema: “Sengathi labo abakuthandayo bangaphepha.

7 Kakube khona ukuthula phakathi kwemiduli yakho, inhlalakahle ezigodlweni zakho.

Sengathi kungaba lokuthula ngaphakathi kwemiduli yakho lokuvikela ngaphakathi kwezinqaba zakho.”

8 Ngenxa yabafowethu labangane bami sengizakuthi: Ukuthula kakube phakathi kwakho.

Ngenxa yabafowethu labangane bami, ngizakuthi, “Ukuthula akube ngaphakathi kwakho.”

9 Ngenxa yendlu yeNkosi uNkulunkulu wethu ngizakudingela okuhle.

Ngenxa yendlu kaThixo uNkulunkulu wethu, ngizakhuthaza ukuphumelela kwakho.