Amahubo 119
1 Babusisiwe abaqotho endleleni, abahamba emlayweni weNkosi.
Babusisiwe labo abandlela zabo zingelansolo, abahamba ngomthetho kaThixo.
2 Babusisiwe abagcina izifakazelo zayo, abayidinga ngenhliziyo yonke.
Babusisiwe labo abagcina imilayo yakhe, abayidinga ngenhliziyo yabo yonke.
3 Njalo kabenzi okubi, bahamba endleleni zayo.
Kaboni lutho; bahamba ezindleleni zakhe.
4 Wena usulayile ukugcina ngokukhuthala imithetho yakho.
Wena ubekile izimiso ukuthi zilandelwe ngokupheleleyo.
5 Kungathi izindlela zami zingaqondiswa ukugcina izimiso zakho!
He, aluba izindlela zami zithembekile ekulaleleni izimemezelo zakho!
6 Khona ngingayikuyangeka, lapho nginanzelela yonke imithetho yakho.
Lapho-ke ngeke ngibe lenhloni nxa ngikhumbula yonke imilayo yakho.
7 Ngizakudumisa ngobuqotho benhliziyo, sengifunde izahlulelo zokulunga kwakho.
Ngizakudumisa ngenhliziyo eqotho ngilokhu ngiyifunda imithetho yakho elungileyo.
8 Ngizagcina izimiso zakho. Ungangitshiyi ngokupheleleyo.
Ngizazilalela izimemezelo zakho; ungangikhalali ngempela.
9 Ijaha lingayihlanza ngani indlela yalo? Ngokuqaphela njengokwelizwi lakho.
Ijaha lingaphila njani impilo ehlambulukileyo? Ngokuphila ngendlela yelizwi lakho.
10 Ngikudingile ngenhliziyo yami yonke; ungangiphambuli emithethweni yakho.
Ngikudinga ngenhliziyo yami yonke; ungangiyekeli ngiphambuke emilayweni yakho.
11 Ilizwi lakho ngilifihlile enhliziyweni yami, ukuze ngingoni kuwe.
Ilizwi lakho ngilifihlile enhliziyweni yami ukuze ngingenzi isono kuwe.
12 Kawubongwe wena, Nkosi; ungifundise izimiso zakho.
Udumo kalube kuwe, Oh Thixo; ngifundisa izimemezelo zakho.
13 Ngezindebe zami ngilandisile zonke izahlulelo zomlomo wakho.
Ngezindebe zami ngiyayibala yonke imithetho ephuma emlonyeni wakho.
14 Ngithokozile ngendlela yezifakazelo zakho njengaphezu kwenotho yonke.
Kuyangithokozisa ukulandela izimiso zakho njengomuntu ethabela inotho enkulu.
15 Ngizazindla ngemithetho yakho, ngikhangele ezindleleni zakho.
Ngiyanakana ngezimiso zakho ngikhumbule ngezindlela zakho.
16 Ngizazithokozisa ngezimiso zakho; kangiyikukhohlwa ilizwi lakho.
Ngiyathokoza ngezimemezelo zakho; angiyikulidela ilizwi lakho.
17 Iphathe kuhle inceku yakho, ukuze ngiphile ngigcine ilizwi lakho.
Yenzele okuhle inceku yakho ukuba ngiphile; ngizalilalela ilizwi lakho.
18 Vula amehlo ami ukuze ngibone izimangaliso ezivela emlayweni wakho.
Vula amehlo ami ukuze ngibone izinto ezimangalisayo emthethweni wakho.
19 Ngiyisihambi emhlabeni; ungangifihleli imithetho yakho.
Ngiyisihambi emhlabeni; ungangifihleli imilayo yakho.
20 Umphefumulo wami uyadabuka ngenxa yokulangathela izahlulelo zakho ngaso sonke isikhathi.
Umphefumulo wami uhugekile ngokulangazelela imithetho yakho ngezikhathi zonke.
21 Ukhuzile abaziqakisayo abaqalekisiweyo, abaduha emithethweni yakho.
Uyabakhuza abaklolodayo, abaqalekisiweyo abaphambukayo emithethweni yakho.
22 Susa kimi ihlazo lokudelela, ngoba ngigcinile izifakazelo zakho.
Susa kimi ihlazo lokweyisa, ngoba ngiyazigcina izimiso zakho.
23 Iziphathamandla lazo zahlala zakhuluma zimelene lami; inceku yakho yazindla ngezimiso zakho.
Loba ababusi behlangana ngami bengigcona, inceku yakho izanakana ngezimemezelo zakho.
24 Izifakazelo zakho lazo ziyintokozo yami, zingabeluleki bami.
Izimiso zakho ziyinjabulo yami; zingabacebisi bami.
25 Umphefumulo wami unamathele ethulini; ngivuselela ngokwelizwi lakho.
Ngehliselwe phansi othulini; londoloza impilo yami njengokwelizwi lakho.
26 Ngilandisile indlela zami, wangiphendula. Ngifundisa izimiso zakho.
Ngabalisa izindlela zami wangiphendula; ngifundisa izimiso zakho.
27 Ngenze ngiqedisise indlela yemithetho yakho, ukuze ngikhulume ngezenzo zakho ezimangalisayo.
Ngenza ngizwisise imfundiso yezimiso zakho; lapho-ke ngizanakana ngezimanga zakho.
28 Umphefumulo wami uyathonta ngenxa yosizi; ngiqinisa ngokwelizwi lakho.
Umphefumulo wami ukhathele ngosizi; ngiqinisa njengokwelizwi lakho.
29 Susa kimi indlela yamanga, unginike ngomusa umlayo wakho.
Ngivikela ezindleleni zenkohliso; woba lobubele kimi ngokomthetho wakho.
30 Ngikhethile indlela yeqiniso, ngibekile phambi kwami izahlulelo zakho.
Ngikhethe indlela yeqiniso; sengibeke inhliziyo yami emithethweni yakho.
31 Nginamathele ezifakazelweni zakho; Nkosi, ungangiyangisi.
Ngibambelele ezimisweni zakho, Oh Thixo; ungangiyekeli ngiyangeka.
32 Ngizagijima endleleni yemithetho yakho, ngoba uzakhulisa inhliziyo yami.
Ngigijima ngendlela yemithetho yakho, ngoba uyikhulule inhliziyo yami.
33 Ngifundisa, Nkosi, indlela yezimiso zakho, njalo ngizayigcinakuze kube sekupheleni.
Ngifundisa, Oh Thixo; ukulandela izimemezelo zakho; ukuthi ngizigcine kuze kufike ekucineni.
34 Ngiphe ukuqedisisa ngibe sengigcina umlayo wakho, yebo ngiwulondoloze ngenhliziyo yonke.
Ngipha ukuzwisisa ukuze ngigcine umthetho wakho ngiwulalele ngayo yonke inhliziyo yami.
35 Ngihambisa endleleni yemithetho yakho, ngoba ngiyathokoza ngayo.
Ngiqondisa endleleni yemilayo yakho, ngoba khonapho ngifumana ukuthokoza.
36 Thobisela inhliziyo yami ezifakazelweni zakho, kungabi semhawini.
Phendulela inhliziyo yami ezimisweni zakho kungabi ngokokuzizuzela okungokwami.
37 Susa amehlo ami ukuze angaboni okuyize; ungivuselele endleleni yakho.
Phendula amehlo ami asuke ezintweni ezingesilutho; londoloza impilo yami njengokwelizwi lakho.
38 Qinisa ilizwi lakho encekwini yakho ezinikele ukukwesaba.
Gcwalisa isithembiso sakho encekwini yakho, ukuze wesatshwe.
39 Susa isigcono engisesabayo, ngoba izahlulelo zakho zilungile.
Susa ihlazo engilesabayo, ngoba imithetho yakho ilungile.
40 Khangela, ngiyalangatha imithetho yakho; ngivuselela ekulungeni kwakho.
Ngizilangazelela kanjani izimiso zakho! Londoloza impilo yami ekulungeni kwakho.
41 Lezisa zakho kazize kimi, Nkosi, usindiso lwakho ngokwelizwi lakho.
Sengathi uthando lwakho olungaphuthiyo lungeza kimi, Oh Thixo, insindiso yakho ize njengokuthembisa kwakho;
42 Khona ngizakuba lakho ukuphendula ongithukayo, ngoba ngiyathembela elizwini lakho.
lapho-ke ngizamphendula lowo ongithukayo, ngoba ngithembe ilizwi lakho.
43 Njalo ungasusi ngokupheleleyo emlonyeni wami ilizwi leqiniso, ngoba ngithembele ezahlulelweni zakho.
Ungangemuki emlonyeni ilizwi leqiniso, ngoba ithemba lami ngilibeke emithethweni yakho.
44 Ngokunjalo ngizawugcina umlayo wakho njalonjalo, kuze kube phakade laphakade.
Ngizahlala ngiwulalela umthetho wakho, okwanini lanini.
45 Ngizahamba ebubanzini, ngoba ngidinga imithetho yakho.
Ngizazihambela ngikhululekile, ngoba ngiyidingisisile imithetho yakho.
46 Njalo ngizakhuluma ngezifakazelo zakho phambi kwamakhosi, ngingayangeki.
Ngizakhuluma ngezimiso zakho phambi kwamakhosi ngingabi lamahloni,
47 Ngizithokozise ngemithetho yakho engiyithandileyo.
ngoba ngithokoza ngisemilayweni yakho ngoba ngiyayithanda.
48 Ngizaphakamisela lezandla zami emithethweni yakho engiyithandileyo, ngizindle ngezimiso zakho.
Ngizaphakamisa izandla zami emilayweni yakho engiyithandayo, nginakana ngezimemezelo zakho.
49 Khumbula ilizwi encekwini yakho, ongenze ngathembela kulo.
Khumbula ilizwi lakho encekwini yakho, ngoba usungiphe ithemba.
50 Le yinduduzo yami ekuhluphekeni kwami, ngoba ilizwi lakho lingivuselele.
Induduzo yami phakathi kokuhlupheka kwami yile: Isithembiso sakho sigcina impilo yami.
51 Abazigqajayo bangiklolodela kakhulukazi; kangiphambukanga emlayweni wakho.
Abaklolodayo bangihleka baze bakholise, kodwa kangiphambuki emthethweni wakho.
52 Ngikhumbule izahlulelo zakho zasendulo, Nkosi, futhi ngiziduduzile.
Ngiyayikhumbula imithetho yakho yekadeni, Oh Thixo, ngifumana ukududuzeka kuyo.
53 Intukuthelo enkulu ingibambile ngenxa yababi abatshiya umlayo wakho.
Ngithukuthela ngife ngenxa yababi, asebedele umthetho wakho.
54 Izimiso zakho zaba zingoma zami endlini yobuhambuma bami.
Izimemezelo zakho ziyiyo injongo yengoma yami loba ngingabe ngihlala ngaphi
55 Ebusuku ngikhumbule ibizo lakho, Nkosi, ngigcine umlayo wakho.
Ebusuku ngiyalikhumbula ibizo lakho, Oh Thixo, njalo ngizawugcina umthetho wakho.
56 Lokhu kwaba ngokwami ngoba ngigcinile imithetho yakho.
Le yiyo injayelo yokwenza kwami: Ngiyayilalela imithetho yakho.
57 UJehova uyisabelo sami; ngithe ngizagcina amazwi akho.
Uyingxenye yami, Oh Thixo, ngithembisile ukulalela amazwi akho.
58 Ngancenga ubuso bakho ngenhliziyo yonke; woba lomusa kimi ngokwelizwi lakho.
Ngiyabudinga ubuso bakho ngenhliziyo yami yonke; woba lobubele kimi njengesithembiso sakho.
59 Ngazindla ngezindlela zami, ngaphendulela inyawo zami ezifakazelweni zakho.
Sengizihlolile izindlela zami ngaphendula izinyathelo zami zaya ezimisweni zakho.
60 Ngaphangisa, kangiphuzanga ukugcina imithetho yakho.
Ngizaphangisa ngingaphuzi ukulalela imilayo yakho.
61 Amaxuku ababi angihanqile; kangikhohlwa umlayo wakho.
Loba ababi bengangibopha ngentambo, angiyikuwukhohlwa umthetho wakho.
62 Phakathi kobusuku ngizavuka ukuze ngikubonge ngenxa yezahlulelo zokulunga kwakho.
Phakathi kobusuku ngivukela ukukubonga ngemithetho yakho emihle.
63 Ngingumngane wabo bonke abakwesabayo, labagcina imithetho yakho.
Ngingumngane kubo bonke abakwesabayo, kubo bonke abalandela imithetho yakho.
64 Nkosi, umhlaba ugcwele umusa wakho; ngifundisa izimiso zakho.
Umhlaba ugcwele uthando lwakho, Oh Thixo; ngifundisa izimiso zakho.
65 Wenzele inceku yakho okuhle, Nkosi, ngokwelizwi lakho.
Senzele okuhle isisebenzi sakho njengelizwi lakho, Oh Thixo.
66 Ngifundisa ingqondo enhle lolwazi, ngoba ngikholwa imithetho yakho.
Ngifundisa ulwazi lokwahlulela okufaneleyo, ngoba ngiyayikholwa imilayo yakho.
67 Ngingakahlupheki ngaduha, kodwa khathesi ngigcine ilizwi lakho.
Ngingakabi sekuhluphekeni ngalahleka, kodwa manje sengilalela ilizwi lakho.
68 Wena ulungile, wenza okulungileyo; ngifundisa izimiso zakho.
Ulungile njalo okwenzayo kulungile; ngifundisa izimiso zakho.
69 Abazigqajayo bangibhaceke ngamanga; ngenhliziyo yonke mina ngizagcina imithetho yakho.
Lokuba abaklolodayo bengibhaceke ngamanga, ngiyazigcina izimiso zakho ngenhliziyo yami yonke.
70 Inhliziyo yabo inone njengamahwahwa; mina ngithokoza ngomlayo wakho.
Inhliziyo zabo zilolunya kazilazwelo, kodwa mina ngijabula ngomthetho wakho.
71 Kungilungele ukuthi ngihlutshwe, ukuze ngifunde izimiso zakho.
Kwakukuhle kimi ukuthi ngihlutshwe ukuze ngifunde izimiso zakho.
72 Umlayo womlomo wakho ungcono kimi kulezinkulungwane zegolide lezesiliva.
Umthetho ophuma emlonyeni wakho uligugu kimi okudlula inhlamvu zesiliva legolide eziyizinkulungwane.
73 Izandla zakho zingenzile, zangibumba; ngiphe ukuqedisisa ukuze ngifunde imithetho yakho.
Izandla zakho zangenza zangibumba, ngipha ukuzwisisa ukuze ngifunde imilayo yakho.
74 Abakwesabayo bazangibona bathokoze, ngoba ngithembele elizwini lakho.
Sengathi labo abakwesabayo bangathokoza nxa bengibona, ngoba sengibeke ithemba lami elizwini lakho.
75 Ngiyazi, Nkosi, ukuthi izahlulelo zakho zilungile, lokuthi ungihluphile ngokuthembeka.
Ngiyazi, Thixo, ukuthi imithetho yakho ilungile, lokuthi ungihlukuluzile ngenxa yokuthembeka kwakho.
76 Umusa wakho ake ube yinduduzo yami njengokutsho kwakho encekwini yakho.
Sengathi uthando lwakho olungaphuthiyo lungaba yinduduzo kimi, njengesithembiso sakho encekwini yakho.
77 Izihawu zakho kazize kimi ukuze ngiphile, ngoba umlayo wakho uyintokozo yami.
Isihawu sakho kasize kimi ukuze ngiphile, umthetho wakho uyikuthokoza kwami.
78 Abazigqajayo kabayangeke, ngoba bangiphambukisa ngamanga; mina ngizazindla ngemithetho yakho.
Sengathi abaklolodayo bangayangiswa ngokungigcona ngingonanga lutho; kodwa mina ngizanakana ngemithetho yakho.
79 Kabaphendukele kimi abakwesabayo, labazi izifakazelo zakho.
Sengathi labo abakwesabayo bangaphendukela kimi, bona abezwisisa izimiso zakho.
80 Inhliziyo yami kayiphelele ezimisweni zakho, ukuze ngingayangeki.
Sengathi inhliziyo yami ingaba msulwa ngezimiso zakho, ukuze ngingayangiswa.
81 Umphefumulo wami uyaphela ngokulangatha usindiso lwakho; ngithembela elizwini lakho.
Umphefumulo wami uyacikizeka ngokulangazelela insindiso yakho, kodwa ngilibekile ithemba lami elizwini lakho.
82 Amehlo ami ayafiphala ngokulangatha ilizwi lakho, ngisithi: Uzangiduduza nini?
Amehlo ami aseze efiphala ngokulinda isithembiso sakho; ngithi, “Uzaze ungiduduze nini na?”
83 Ngoba senginjengomgodla osentuthwini; kangikhohlwa izimiso zakho.
Lanxa nginjengesixaxa sewayini esesikhumba sifuswe entuthwini, kangizilibali izimiso zakho.
84 Zingaki insuku zenceku yakho? Uzakwenza nini isigwebo kwabangizingelayo?
Inceku yakho izalinda kuze kube nini na? Uzabajezisa nini abangihluphayo na?
85 Abazigqajayo bangigebhela imigodi, okungenjengokomlayo wakho.
Abaklolodayo bangigebhela amagodi, bephikisa umthetho wakho.
86 Yonke imithetho yakho ithembekile; bangizingela ngamanga; ngisiza!
Yonke imilayo yakho ithembekile, ngisiza, ngoba abantu bayangichukuluza kungelasizatho.
87 Baphosa bangiqeda emhlabeni, kodwa mina kangitshiyanga imithetho yakho.
Baphose bangesula emhlabeni, kodwa kangiyilahlanga imithetho yakho.
88 Ngivuselela ngokomusa wakho; ngibe sengigcina isifakazelo somlomo wakho.
Ngivuselela ngomusa wakho olothando, ukuze ngigcine izimiso zomlomo wakho.
89 Laphakade, Nkosi, ilizwi lakho limi emazulwini.
Ilizwi lakho, Oh Thixo, kalipheli lanini; limi liqinile emazulwini.
90 Uthembeko lwakho lusesizukulwaneni lesizukulwana; wamisa umhlaba, usemi.
Ukuthembeka kwakho kukhona kuzozonke izizukulwane; wawumisa umhlaba, uzakuma kokuphela.
91 Ngokwezimiso zakho kusemi lamuhla, ngoba konke kuzinceku zakho.
Imithetho yakho imi lanamhla lokhu, ngoba zonke izinto zikhonza wena.
92 Uba umlayo wakho ubungesizo intokozo zami, ngabe sengibhubhele ekuhluphekeni kwami.
Aluba umthetho wakho ubungesiyo injabulo yami ngabe ngabhubha ngiphakathi kokuhlupheka kwami.
93 Laphakade kangiyikukhohlwa imithetho yakho, ngoba ungivuselele ngayo.
Kangisoze ngafa ngayilibala imithetho yakho, ngoba ngayo uyilondolozile impilo yami.
94 Ngingowakho, ungisindise; ngoba ngiyidingile imithetho yakho.
Ngisindisa ngoba ngingowakho; ngiyidingisisile imithetho yakho.
95 Ababi bangilindele ukungibhubhisa; ngiyananzelela izifakazelo zakho.
Ababi balindele ukungichitha, kodwa ngizanakana ngezimiso zakho.
96 Ngibonile ukucina kwakho konke ukuphelela, kodwa umlayo wakho ubanzi kakhulu.
Kukho konke ukuphelela ngibona kulomkhawulo; kodwa imilayo yakho ayilamingcele.
97 Ngiwuthanda kangakanani umlayo wakho! Usuku lonke uyikuzindla kwami.
Oh, ngiwuthanda kangakanani umthetho wakho! Ngikhumbula ngawo ilanga lonke.
98 Ngemithetho yakho uyangihlakaniphisa kulezitha zami, ngoba ilami kuze kube nininini.
Imilayo yakho iyangihlakaniphisa kulezitha zami, ngoba ngihlezi ngilayo.
99 Ngilokuqedisisa kulabo bonke abafundisi bami, ngoba izifakazelo zakho ziyikuzindla kwami.
Ngicacile ukuqedisisa kwami kulabafundisi bami, ngoba ngiyanakana ngezimiso zakho.
100 Ngiyaqedisisa kulabadala, ngoba ngigcina imithetho yakho.
Ngiyezwisisa okudlula abadala, ngoba ngiyayilalela imithetho yakho.
101 Ngizinqandile inyawo zami kuyo yonke indlela embi, ukuze ngigcine ilizwi lakho.
Inyawo zami kaziyinyathelanga layiphi indlela embi ukuze ngilalele ilizwi lakho.
102 Kangiphambukanga kuzahlulelo zakho, ngoba wena ungifundisile.
Kangiphambukanga emithethweni yakho, ngoba wena ngokwakho ungifundisile.
103 Amnandi kangakanani amazwi akho ekunambitheni kwami, okwedlula uluju emlonyeni wami!
Amazwi akho anambitheka kamnandi kimi, amnandi kulenyosi emlonyeni wami!
104 Emithethweni yakho ngizuza ukuqedisisa; ngenxa yalokho ngizonda yonke indlela yamanga.
Ngiyazuza ukuqedisisa emithethweni yakho; ngakho ngiyayizonda loba layiphi indlela engalunganga.
105 Ilizwi lakho liyisibane enyaweni lwami, lokukhanya endleleni yami.
Ilizwi lakho liyisibane ezinyaweni zami liyikukhanya kwendlela yami.
106 Ngifungile, ngizakuqinisa, ukugcina izahlulelo zokulunga kwakho.
Sengenzile isifungo ngasiqinisa, ukuthi ngizalandela imithetho yakho elungileyo.
107 Ngiyahlupheka kakhulukazi; Nkosi, ngivuselela ngokwelizwi lakho.
Sengihlupheke kakhulu; londoloza impilo yami, Oh Thixo njengokutshiwo yilizwi lakho.
108 Nkosi, yemukela iminikelo yesihle yomlomo wami, ungifundise izahlulelo zakho.
Yamukela, Oh Thixo, indumiso epheleleyo ngomlomo wami, ungifundise imithetho yakho.
109 Umphefumulo wami usesandleni sami njalonjalo, kodwa kangikhohlwa umlayo wakho.
Loba ngihlezi ngizibona sengingene engozini, kangiyi kuwulibala umthetho wakho.
110 Ababi bangibekele umjibila, kodwa kangiduhanga emithethweni yakho.
Ababi sebengithiye ngomjibila kodwa kangiphambukanga emithethweni yakho.
111 Ngidle ilifa lezifakazelo zakho kuze kube nininini, ngoba ziyintokozo yenhliziyo yami.
Izimiso zakho ziyilifa lami laphakade; ziyintokozo yenhliziyo yami.
112 Ngithobe inhliziyo yami ukwenza izimiso zakho njalonjalo, kuze kube sekupheleni.
Inhliziyo yami izimisele ukugcina imilayo yakho kuze kube sekupheleni.
113 Ngiyabazonda abanhliziyombili, kodwa umlayo wakho ngiyawuthanda.
Ngiyabazonda abantu abangongqondombili, kodwa ngiyawuthanda umthetho wakho.
114 Wena uyisiphephelo sami lesihlangu sami; ngithemba elizwini lakho.
Uyisiphephelo sami lesihlangu sami; sengibeke ithemba lami elizwini lakho.
115 Sukani kimi benzi bobubi, ngoba ngigcine imithetho kaNkulunkulu wami.
Sukani kimi lina benzi bobubi, ukuze ngikwazi ukugcina imilayo kaNkulunkulu wami!
116 Ngisekela ngokwelizwi lakho ukuze ngiphile, ungangiyangisi ngethemba lami.
Ngisekela njengesithembiso sakho ukuze ngiphile; ithemba lami lingaze labhidlika.
117 Ngisekela ngibe sengisindiswa, ngizananzelela izimiso zakho njalonjalo.
Ngiqinisa ukuze ngikhululwe; ngizahlala ngizinanza izimiso zakho.
118 Uyabeyisa bonke abaduha ezimisweni zakho, ngoba ubuqili babo bungamanga.
Uyabalahla bonke labo abaphambuka ezimisweni zakho, ngoba ukukhohlisa kwabo kuyize.
119 Uyasusa bonke ababi bomhlaba njengamanyele; ngakho ngiyazithanda izifakazelo zakho.
Bonke ababi bomhlaba uyabalahlela kude njengezibi; ngakho ngiyazithanda izimiso zakho.
120 Inyama yami iyathuthumela ngovalo ngawe, ngesaba izigwebo zakho.
Inyama yami iyathuthumela ngokukwesaba; ngizwa ngiyesaba imithetho yakho.
121 Ngenzile ukwahlulela lokulunga; ungangiyekeli kubacindezeli bami.
Ngenzile okulungileyo lokufaneleyo; ungangiyekeleli abancindezeli bami.
122 Mela inceku yakho kube kuhle, abazigqajayo kabangangicindezeli.
Qinisa impilakahle yenceku yakho; ungayekeli abaklolodayo bangincindezele.
123 Amehlo ami aphelela usindiso lwakho, lelizwi lokulunga kwakho.
Amehlo ami asefiphala elokhu ekhangele insindiso yakho, ekhangele isithembiso sakho esilungileyo.
124 Yenza encekwini yakho ngokomusa wakho, ungifundise izimiso zakho.
Yenza encekwini yakho ngokothando lwakho, ungifundise izimiso zakho.
125 Ngiyinceku yakho; ngiphe ukuqedisisa, ukuze ngazi izifakazelo zakho.
Ngiyinceku yakho; ngipha ukuqedisisa ukuthi ngizwisise izimiso zakho.
126 Sekuyisikhathi seNkosi sokuthi isebenze, ngoba bawephule umlayo wakho.
Sekuyisikhathi sakho sokuthi wenze okwakho, Oh Thixo umthetho wakho uyephulwa nje.
127 Ngakho-ke ngiyayithanda imithetho yakho kakhulu kulegolide, yebo, kulegolide elicwengekileyo.
Ngoba ngiyayithanda imilayo yakho kulegolide, kulegolide elicengekileyo,
128 Ngalokho imithetho yakho yonke mayelana lazo zonke izinto ngiyibona iqondile; yonke indlela yamanga ngiyayizonda.
njalo njengoba ngisithi imithetho yakho ilungile, ngiyayizonda yonke indlela engaqondanga.
129 Izifakazelo zakho ziyamangalisa; ngakho-ke umphefumulo wami uyazigcina.
Izimiso zakho ziyamangalisa; ngakho ngiyazilalela.
130 Ukuvulwa kwamazwi akho kuyakhanyisa, kunika ukuqedisisa kwabangelalwazi.
Ukwambulwa kwamazwi akho kuletha ukukhanya; kunika ukuzwisisa kwabayizithutha.
131 Ngavula umlomo wami, ngaphefuzela, ngoba ngalangazelela imithetho yakho.
Ngivula umlomo wami ngikhefuzele, ngilangazelela imilayo yakho.
132 Phendukela kimi, ube lomusa kimi, njengomkhuba kulabo abathanda ibizo lakho.
Phendukela kimi ube lomusa kimi, njengoba uhlezi ukwenza kwabathanda ibizo lakho.
133 Qinisa izinyathelo zami ngelizwi lakho, njalo kabungabusi phezu kwami labubi.
Qondisa izinyathelo zami ngokwelizwi lakho; kakungabi lesono esingibusayo.
134 Ngikhulula kucindezelo lwabantu, ukuze ngigcine imithetho yakho.
Ngihlenga ekuncindezelweni ngabantu, ukuze ngilalele imithetho yakho.
135 Khanyisa ubuso bakho phezu kwenceku yakho, ungifundise izimiso zakho.
Yenza ubuso bakho bukhanye encekwini yakho, ungifundise izimiso zakho.
136 Imifula yamanzi iyehla emehlweni ami, ngoba kabagcini umlayo wakho.
Imifula yezinyembezi iyajuluka emehlweni ami, ngoba umthetho wakho kawulalelwa.
137 Wena, Nkosi, ulungile, ziqondile izahlulelo zakho.
Ulungile wena Thixo, lemithetho yakho ilungile.
138 Ulayile izifakazelo zakho ekulungeni lekuthembekeni okukhulu.
Izimiso ozibekileyo zilungile; zithembekile ngokupheleleyo.
139 Ukutshiseka kwami kungiqedile, ngoba izitha zami zikhohlwe amazwi akho.
Ukutshiseka kwami kuyangicoba, ngoba izitha zami kaziwananzi amazwi akho.
140 Ilizwi lakho licwengekile kakhulu; ngakho inceku yakho iyalithanda.
Izithembiso zakho zihlolisisiwe kakhulu, inceku yakho iyazithanda.
141 Ngimncinyane, ngidelelekile; imithetho yakho kangiyikhohlwa.
Loba ngingumuntukazana ngiseyiswa, angiyikhohlwa imithetho yakho.
142 Ukulunga kwakho kuyikulunga kuze kube phakade, lomlayo wakho uliqiniso.
Ukulunga kwakho kumi laphakade njalo umthetho wakho uliqiniso.
143 Ucindezelo lohlupho kungifumene; imithetho yakho izintokozo zami.
Uhlupho losizi kuyakungehlele, kodwa imilayo yakho iyikuthokoza kwami.
144 Ukulunga kwezifakazelo zakho kungokwaphakade; ngiphe ukuqedisisa ukuze ngiphile.
Izimiso zakho zihlezi zilungile; ngipha ukuzwisisa ukuze ngiphile.
145 Ngakhala ngenhliziyo yami yonke; ngiphendula, Nkosi. Ngizagcina izimiso zakho.
Ngiyamemeza ngayo yonke inhliziyo yami; ngiphendula, Thixo, mina ngizalalela imithetho yakho.
146 Ngikhalela kuwe; ngisindisa, njalo ngizagcina izifakazelo zakho.
Ngiyakubiza, ngisindisa mina ngizagcina izimiso zakho.
147 Ngandulela uvivi, ngakhala; ngathembela elizwini lakho.
Ngivuka emathathakusa ngikhale kuwe ngicela usizo; sengibeke ithemba lami elizwini lakho.
148 Amehlo ami aqalela imilindo yobusuku, ukuze ngizindle elizwini lakho.
Amehlo ami alala ekhangele ngemilindo yonke yobusuku, ukuze ngicabange ngezithembiso zakho.
149 Zwana ilizwi lami ngokomusa wakho; Nkosi, ngivuselela ngokwesahlulelo sakho.
Zwana ilizwi lami ngokuya kothando lwakho; londoloza impilo yami, Oh Thixo ngokuya kwemithetho yakho.
150 Bayasondela abazingeli bobubi, bakhatshana lomlayo wakho.
Labo abakha amasu amabi baseduze, kodwa bakhatshana lomthetho wakho.
151 Wena useduze, Nkosi, lemithetho yakho yonke iliqiniso.
Ikanti useduze, wena Thixo, lemilayo yakho yonke iqinisile.
152 Sekukade ngisazi ngemilayo yakho ukuthi uyisekele kuze kube nininini.
Sekukade ngafunda ezimisweni zakho ukuthi wazenzela ukuthi zime lanininini.
153 Khangela ukuhlupheka kwami, ungikhulule, ngoba kangiwukhohlwa umlayo wakho.
Khangela ukuhawula kwami ungikhulule, ngoba kangiwukhohlwanga umthetho wakho.
154 Mela udaba lwami, ungihlenge; ngivuselela ngokwelizwi lakho.
Ake ungimele ukuze ungihlenge; londoloza impilo yami njengesithembiso sakho.
155 Usindiso lukhatshana lababi, ngoba kabadingi izimiso zakho.
Insindiso ikhatshana kwababi, ngoba kabazidingi izimiso zakho.
156 Izihawu zakho, Nkosi, zinkulu; ngivuselela ngokwezahlulelo zakho.
Isihawu sakho sikhulu, Oh Thixo londoloza impilo yami mayelana lemithetho yakho.
157 Banengi abangizingelayo labayizitha zami; kangiphambuki ezifakazelweni zakho.
Zinengi izitha ezingihluphayo, kodwa kangiphambukanga ezimisweni zakho.
158 Ngabona abaphambuki, ngacunuka, ngoba kabagcinanga ilizwi lakho.
Ngikhangela abangakholwayo ngibenyanye, ngoba kabalilaleli ilizwi lakho.
159 Bona ukuthi ngiyayithanda imithetho yakho. Ngivuselela, Nkosi, ngokothandolomusa wakho.
Ake ubone ukuthi ngiyithanda kanganani imithetho yakho; londoloza impilo yami, Oh Thixo, ngokothando lwakho.
160 Ilizwi lakho liliqiniso kwasekuqaleni, laso sonke isahlulelo sakho esilungileyo simi kuze kube nininini.
Wonke amazwi akho aqinisile; yonke imithetho yakho elungileyo ngeyaphakade.
161 Iziphathamandla zingizingela kungelasizatho; kodwa inhliziyo yami ilovalo ngamazwi akho.
Ababusi bayangihlupha kungelasizatho, kodwa inhliziyo yami iyaliqhuqhela ilizwi lakho.
162 Ngiyathokoza ngelizwi lakho njengothole impango enkulu.
Isithembiso sakho siyangithokozisa ingathi ngumuntu othole impango enkulu.
163 Amanga ngiyawazonda ngiyawenyanya; umlayo wakho ngiyawuthanda.
Amanga ngiyawazonda njalo ngiyawenyanya kodwa umthetho wakho ngiyawuthanda.
164 Kasikhombisa ngosuku ngiyakudumisa ngenxa yezahlulelo zakho ezilungileyo.
Ngikudumisa kasikhombisa ngelanga ngenxa yemithetho yakho elungileyo.
165 Balokuthula okukhulu abathanda umlayo wakho; njalo kakulasikhubekiso kubo.
Kukhulu ukuthula abalakho labo abathanda umthetho wakho, kakulalutho olungabakhubekisa.
166 Ngilindele usindiso lwakho, Nkosi, ngiyayenza imithetho yakho.
Ngiyilindele insindiso yakho, Oh Thixo njalo ngiyayilandela imilayo yakho.
167 Umphefumulo wami uyazigcina izifakazelo zakho, ngiyazithanda kakhulu.
Ngiyazilalela izimiso zakho, ngoba ngiyazithanda kakhulu.
168 Ngiyagcina imithetho yakho lezifakazelo zakho, ngoba zonke indlela zami ziphambi kwakho.
Ngiyayilalela imithetho yakho lezimiso zakho, ngoba uyazazi zonke izindlela zami.
169 Ukukhala kwami kakusondele kuwe, Nkosi; ngiphe ukuqedisisa ngokwelizwi lakho.
Sengathi ukukhala kwami kungafika kuwe, Oh Thixo ngipha ukuzwisisa njengelizwi lakho.
170 Ukuncenga kwami kakufike phambi kwakho; ngikhulula ngokwelizwi lakho.
Sengathi ukuncenga kwami kungafika kuwe; ngikhulula njengesithembiso sakho.
171 Indebe zami zizathulula indumiso, ngoba ungifundisile izimiso zakho.
Sengathi indebe zami zingageleza indumiso yakho, ngoba uyangifundisa imithetho yakho.
172 Ulimi lwami luzakhuluma ilizwi lakho, ngoba yonke imithetho yakho iyikulunga.
Sengathi ulimi lwami lungalihlabela ilizwi lakho, ngoba yonke imilayo yakho ilungile.
173 Isandla sakho kasibe lusizo lwami, ngoba ngikhethile imithetho yakho.
Sengathi isandla sakho singalungela ukungisiza, ngoba sengikhethe imithetho yakho.
174 Ngiyalangazelela usindiso lwakho, Nkosi, lomlayo wakho uyintokozo yami.
Ngilangazelela insindiso yakho, Oh Thixo ngoba umthetho wakho uyinjabulo yami.
175 Kawuphile umphefumulo wami, njalo uzakudumisa, lezahlulelo zakho zingisize.
Kangiphile ukuze ngikudumise, sengathi njalo lemithetho yakho ingangisekela.
176 Ngiduhile njengemvu elahlekileyo; dinga inceku yakho, ngoba kangikhohlwa imithetho yakho.
Ngiphambukile njengemvu elahlekileyo. Yidinge inceku yakho, ngoba kangikayikhohlwa imilayo yakho.
