Amahubo 118
1 Bongani iNkosi, ngoba ilungile, ngoba isihawu sayo simi kuze kube nininini.
Mbongeni uThixo ngoba ulungile; uthando lwakhe lumi laphakade.
2 Katsho uIsrayeli khathesi ukuthi isihawu sayo simi kuze kube nininini.
U-Israyeli katsho athi: “Uthando lwakhe lumi laphakade.”
3 Kayitsho indlu kaAroni khathesi ukuthi isihawu sayo simi kuze kube nininini.
Kayithi indlu ka-Aroni: “Uthando lwakhe lumi laphakade.”
4 Kabatsho khathesi abayesabayo iNkosi ukuthi isihawu sayo simi kuze kube nininini.
Akuthi bonke abamesabayo uThixo bathi: “Uthando lwakhe lumi laphakade.”
5 Ngisesizini ngabiza iNkosi; iNkosi yangiphendula yangibeka endaweni ebanzi.
Ngathi ngidabukile ngakhala kuThixo, waphendula ngokungikhulula.
6 INkosi ingakimi, kangiyikwesaba; umuntu angenzani kimi?
UThixo ulami, angiyikwesaba. Umuntu angenzani kimi na?
7 INkosi ingakimi labangisizayo; ngakho mina ngizabona isiloyiso sami phezu kwabangizondayo.
UThixo ulami; ungumsizi wami. Ngizazinyonkoloza ngegunya izitha zami.
8 Kungcono ukuphephela eNkosini kulokuthembela emuntwini.
Kungcono ukuphephela kuThixo kulokuthemba umuntu.
9 Kungcono ukuphephela eNkosini kulokuthembela kuziphathamandla.
Kungcono ukuphephela kuThixo kulokuthemba amakhosana.
10 Zonke izizwe zangihanqa; kodwa ebizweni leNkosi ngizaziquma.
Zonke izizwe zangihanqa, kodwa ngegama likaThixo ngazichitha.
11 Zangihanqa, yebo zangihanqa; kodwa ebizweni leNkosi ngizaziquma.
Zangihanqa inxa zonke kodwa ngegama likaThixo ngazichitha.
12 Zangihanqa njengenyosi, zacitshwa njengomlilo wameva; kodwa ebizweni leNkosi ngizaziquma.
Zangiminyezela njengezinyosi kodwa zafa masinyane njengokungunguma komlilo wameva; ngebizo likaThixo ngazichitha.
13 Wangigudlumeza lokugudlumeza ngize ngiwe; kodwa iNkosi yangisiza.
Ngasunduzelwa emuva ngaphose ngawa, kodwa uThixo wangisiza.
14 INkosi ingamandla lengoma yami, isibe lusindiso lwami.
UThixo ungamandla ami lengoma yami; yena useyikusindiswa kwami.
15 Ilizwi lentokozo losindiso lisemathenteni abalungileyo; esokunene seNkosi senza ngamandla.
Imisindo yentokozo lokunqoba iphuma emathenteni abalungileyo: “Isandla sokunene sikaThixo senzile izinto ezinkulu!
16 Esokunene seNkosi siphakanyisiwe, esokunene seNkosi senza ngamandla.
Isandla sokunene sikaThixo siphakanyisiwe kakhulu; isandla sokunene sikaThixo senzile izinto ezinkulu!”
17 Kangiyikufa, kodwa ngizaphila, ngilandise imisebenzi yeNkosi.
Angizukufa kodwa ngizaphila, ngizamemezela lokho akwenzileyo uThixo.
18 INkosi ingijezisile kabuhlungu, kodwa kayinginikelanga ekufeni.
UThixo ungitshayile kakhulu, kodwa kanginikelanga ekufeni.
19 Ngivulelani amasango okulunga; ngingene ngawo, ngidumise iNkosi.
Ngivulela amasango okulunga; ngizangena ngimbonge uThixo.
20 Yileli isango leNkosi; abalungileyo bazangena ngalo.
Nanti isango likaThixo okungangena khona abalungileyo.
21 Ngizakudumisa, ngoba ungiphendule, usube lusindiso lwami.
Ngizakubonga, ngoba ungiphendulile; usuyinsindiso yami.
22 Ilitshe abakhi abalalayo seliyinhloko yengonsi.
Ilitshe ababelilahlile seliyilona ilitshe lekhoneni;
23 Lokhu kwenziwa yiNkosi, kuyamangalisa emehlweni ethu.
uThixo ukwenzile lokhu; njalo kuyamangalisa emehlweni ethu.
24 Lolu lusuku iNkosi eyalwenzayo, sizathaba sithokoze kulo.
Leli lilanga alenzileyo uThixo; kasithokoze sijabule ngalo.
25 Sindisa khathesi, Nkosi; ngiyakuncenga, ngiyakuncenga, Nkosi, khathesi unike impumelelo.
Oh Thixo, sisindise; Oh Thixo, siphumelelise.
26 Ubusisiwe oza ngebizo leNkosi. Silibusisile sisendlini yeNkosi.
Ubusisiwe lowo obuya ngebizo likaThixo. Siyakubusisa sisendlini kaThixo.
27 UNkulunkulu uyiNkosi, osinike ukukhanya. Bopha umnikelo womkhosi ngezibopho kuze kube sempondweni zelathi.
UThixo unguNkulunkulu, wenzile ukukhanya kwakhe kwehlela phezu kwethu. Liphethe izingatshana, ngenani edibini lomgido lize liyefika empondweni ze-alithare.
28 Wena unguNkulunkulu wami, ngizakudumisa; Nkulunkulu wami, ngizakuphakamisa.
UnguNkulunkulu wami, ngizakubonga; unguNkulunkulu wami, ngizakuphakamisa.
29 Bongani iNkosi, ngoba ilungile; ngoba isihawu sayo simi kuze kube nininini.
Mbongeni uThixo ngoba ulungile; uthando lwakhe lumi kuze kube phakade.
