Amahubo 107
1 Ibongeni iNkosi, ngoba ilungile, ngoba umusa wayo umi kuze kube phakade.
Mbongeni uThixo ngoba ulungile, uthando lwakhe lumi laphakade.
2 Kabatsho njalo abahlengiweyo beNkosi ebahlengileyo esandleni sesitha.
Akuthi abahlengiweyo bakaThixo batsho lokhu, labo abahlenga esandleni sesitha,
3 Yababutha bevela emazweni, empumalanga lentshonalanga, enyakatho lelwandle.
labo abaqoqa emazweni kusuka empumalanga kusiya entshonalanga, kusuka enyakatho laseningizimu.
4 Bazulazula enkangala endleleni yenhlane, kabatholanga umuzi wokuhlala.
Abanye bantula egwaduleni lwenkangala, baswela indlela eya emzini ababengahlala khona.
5 Belambile njalo bomile, umphefumulo wabo waphela amandla phakathi kwabo.
Balamba boma, impilo zabo zancipha.
6 Khona bakhala eNkosini ekuhluphekeni kwabo, yabakhulula ezinsizini zabo.
Basebekhala kuThixo besekuhluphekeni kwabo, wasebakhulula osizini lwabo.
7 Yabakhokhela ngendlela eqondileyo, ukuze baye emzini wokuhlala.
Wabahola ngendlela eqondileyo baya edolobheni lapho ababengahlala khona.
8 Kabayidumise iNkosingomusa wayo langemisebenzi yayo emangalisayo ebantwaneni babantu!
Ngakho kabambonge uThixo ngothando lwakhe olungaphuthiyo lezenzo zakhe ezimangalisayo azenzela abantu,
9 Ngoba iyasuthisa umphefumulo olangathayo, lomphefumulo olambileyo iwugcwalisa ngokuhle.
ngoba ubenza bakholwe abomileyo asuthise abalambileyo ngezinto ezinhle.
10 Abahlala emnyameni lethunzini lokufa, bebotshiwe ensizini lensimbini,
Abanye bahlala emnyameni lasethunzini elinzima beyizibotshwa ezihluphekayo zibotshwe ngamaketane ensimbi,
11 ngoba bavukela amazwi kaNkulunkulu, badelela iseluleko soPhezukonke.
ngoba babewahlamukele amazwi kaNkulunkulu beyisa iseluleko soPhezukonke.
12 Ngakho wathoba inhliziyo yabo ngokuhlupheka; bakhubeka, njalo kwakungekho umsizi.
Ngakho wabathwalisa umsebenzi onzima; bawa kodwa kungekho ongabasiza.
13 Khona bakhala eNkosini ekuhluphekeni kwabo, yabasindisa ezinsizini zabo.
Ngakho basebekhala kuThixo besekuhluphekeni kwabo wabasindisa osizini lwabo.
14 Yabakhupha emnyameni lethunzini lokufa, yaqamula izibopho zabo.
Wabakhupha emnyameni lethunzini elinzima waqamula amaketane abo.
15 Kabayidumise iNkosingomusa wayo, langemisebenzi yayo emangalisayo ebantwaneni babantu!
Ngakho kabambonge uThixo ngothando lwakhe olungaphuthiyo lezenzo zakhe ezimangalisayo azenzela abantu,
16 Ngoba yephule izivalo zethusi, yaquma imigoqo yensimbi.
ngoba uyawafohloza amasango ethusi ephule imigoqo yensimbi.
17 Abayizithutha, ngenxa yendlela yeziphambeko zabo langenxa yezono zabo, bahlutshiwe.
Abanye baba yiziwula ngenxa yezindlela zabo zokuhlamuka badliwa yizinhlupheko ngenxa yokuxhwala kwabo.
18 Umphefumulo wabo wenyanya ukudla konke, basondela emasangweni okufa.
Benyanya konke ukudla balengela emasangweni okufa.
19 Khona bakhala eNkosini ekuhluphekeni kwabo, yabasindisa ezinsizini zabo.
Bakhala kuThixo besekuhluphekeni kwabo, wabasindisa osizini lwabo.
20 Yathumela ilizwi layo, yabasilisa, yabakhulula emigodini yabo.
Wathumela ilizwi lakhe labasilisa; wabahlenga engcwabeni.
21 Kabayidumise iNkosingomusa wayo, langemisebenzi yayo emangalisayo ebantwaneni babantu!
Kabambonge uThixo ngothando lwakhe olungaphuthiyo lezenzo zakhe ezimangalisayo ebantwini.
22 Njalo kabahlabe imihlatshelo yokubonga, balandise izenzo zayo ngokuthaba.
Kabenze imihlatshelo yeminikelo yokubonga bafakaze ngezenzo zakhe zonke ngezingoma zokuthokoza.
23 Abehlela olwandle ngemikhumbi, abenza imisebenzi emanzini amakhulu;
Abanye bawela olwandle ngemikhumbi; babengabathengisi emanzini abanzi.
24 laba babona izenzo zeNkosi, lemisebenzi yayo emangalisayo ekujuleni.
Bayibona imisebenzi kaThixo, izenzo zakhe ezimangalisayo ekujuleni.
25 Ngoba iyakhuluma, ivuse isiphepho somoya, esiqubula amagagasi alo.
Ngoba wakhuluma kwaqubuka isiphepho esasukumisa amagagasi aba laphaya.
26 Benyukela emazulwini, behlele enzikini; umphefumulo wabo uncibilika ngosizi.
Akhwela athinta emazulwini, ehla ayatshona ezinzikini; bekuleyongozi isibindi sabo samemetheka saphela.
27 Bayadengezela bebhadazela njengesidakwa, lenhlakanipho yabo yonke iginyiwe.
Bazigxobagxoba badiyazela njengabantu abadakiweyo; baphelelwa lulwazi.
28 Khona bakhala eNkosini ekuhluphekeni kwabo, yabakhupha ezinsizini zabo.
Basebekhala kuThixo besekuhluphekeni kwabo, wabakhupha esizini lwabo.
29 Yenza isiphepho sachuma, lamagagasi aso athula.
Wasethulisa isiphepho ngokunyenyeza; amagagasi olwandle aphola athi cwaka.
30 Basebethokoza ngoba ayesethule, yasibaholela ethekwini lesifiso sabo.
Bajabula bonke sekudedile, wabahola wabasa ethekwini ababelifuna.
31 Kabayibonge iNkosingomusa wayo, langemisebenzi yayo emangalisayo ebantwaneni babantu!
Kabambonge uThixo ngothando lwakhe olungaphuthiyo lezenzo zakhe ezimangalisayo ebantwini.
32 Njalo kabayiphakamise ebandleni labantu, bayidumise esihlalweni sabadala!
Kabamphakamise emhlanganweni wabantu bamdumise enkundleni yabadala.
33 Yenza imifula ibe yinkangala, lemithombo yamanzi ibe ngumhlabathi owomileyo,
Waguqula imifula yaba yinkangala, imithombo egelezayo yaba ngumhlabathi owomileyo,
34 umhlabathi ovundileyo ube lugwadule, ngenxa yobubi babahlezi kuwo.
lomhlabathi olezithelo waba lugwadule oluletshwayi, ngenxa yobubi balabo ababehlala khona.
35 Iphendula inkangala ibe yisiziba samanzi, lelizwe elomileyo libe yimithombo yamanzi.
Waguqula inkangala yaba ngamachibi amanzi lomhlabathi owomileyo waba yimithombo egelezayo;
36 Ihlalise khona abalambileyo, njalo bamise umuzi wokuhlala;
lapho waletha abalambileyo ukuba bahlale khona, khonapho basungula umuzi ababezahlala kuwo.
37 bahlanyele amasimu, bagxumeke izivini, ezithela izithelo zesivuno.
Bahlanyela amasimu, bagxumeka amavini athela isivuno esikhulu;
38 Njalo iyababusisa ukuze bande kakhulu, lezifuyo zabo kayizinciphisi.
wababusisa banda baba banengi kakhulu, akaze ayekela imihlambi yabo inciphe.
39 Babuye banciphe, bathotshiswe ngocindezelo, ububi, losizi.
Kwasekusithi ubunengi babo sebunciphile, bathotshiswa ngokuncindezelwa, ngokuhlupheka langosizi;
40 Ithela ukudelelwa phezu kweziphathamandla, ibazulisa enkangala, engelandlela.
kwathi yena othela ihlazo ezikhulwini wabantulisa egwaduleni olungakhanyi mzila.
41 Kube kanti ihlalisa phezulu umyanga ekuhluphekeni, enze insapho zibe njengomhlambi.
Kodwa abaswelayo wabakhupha ekuhluphekeni kwabo wandisa izimuli zabo njengemihlambi yezimvu.
42 Abalungileyo bazabona bathokoze, lobubi bonke buzavala umlomo wabo.
Abaqotho bayabona bathokoze, kodwa bonke ababi bagcike imilomo yabo.
43 Loba ngubani ohlakaniphileyo uzaqaphelisa lezizinto; labo bazaqedisisa izisa zeNkosi.
Lowo ohlakaniphileyo, kaqaphele lezizinto anakane ngothando olukhulu lukaThixo.
