Amahubo 106
1 Dumisani iNkosi! Ibongeni iNkosi ngoba ilungile, ngoba umusa wayo umi kuze kube nininini.
Dumisani uThixo. Bongani uThixo, ngoba ulungile; uthando lwakhe lumi lanini.
2 Ngubani ongalandisa izenzo ezilamandla zeNkosi, azwakalise yonke indumiso yayo?
Ngubani ongamemezela imisebenzi emikhulu kaThixo loba atsho ngokugcweleyo udumo lwakhe na?
3 Babusisiwe abagcina izahlulelo, owenza ukulunga ngaso sonke isikhathi.
Babusisiwe labo abahlala besenza ngendlela enhle, abahlezi besenza okulungileyo.
4 Ngikhumbule, Nkosi, ngothando olalo kubantu bakho; ngethekelele ngosindiso lwakho;
Ungikhumbule, Thixo, nxa usuveza umusa ebantwini bakho, woza ungisize nxatshana usubasindisa,
5 ukuze ngibone okuhle kwabakhethiweyo bakho, ukuze ngithokoze entokozweni yesizwe sakho, ukuze ngizincome kanye lelifa lakho.
ukuze lami ngikholise ukuphumelela kwalabo obakhethileyo, ukuze ngabelwe entokozweni yesizwe sakho ngihlanganyele lelifa lakho ekudumiseni.
6 Sonile kanye labobaba, senze okubi, senza ngenkohlakalo.
Sonile, njengalokho abakwenzayo okhokho bethu; senzile okubi senza izinto ezimbi.
7 Obaba eGibhithe kabaqedisisanga izimangaliso zakho; kabakhumbulanga ubunengi bezisa zakho; kodwa benza umvukela elwandle, eLwandle oluBomvu.
Lapho okhokho bethu beseGibhithe, kabayinakanga imimangaliso yakho; kabazikhumbulanga izenzo zakho zomusa ezinengi, bahlamuka besolwandle, uLwandle oluBomvu.
8 Loba kunjalo wabakhulula ngenxa yebizo lakhe, ukuze azise amandla akhe.
Kodwa wabasindisa ngenxa yebizo lakhe, ukuze amandla akhe amakhulu aziwe.
9 Wasekhuza uLwandle oluBomvu, lwatsha; wasebahambisa phakathi kwezinziki njengenkangala.
Walukhuza uLwandle oluBomvu, loma qha; wabahola badabula ezinzikini njengasenkangala.
10 Wasebasindisa esandleni somzondi, wabahlenga esandleni sesitha.
Wabasindisa esandleni sesitha; wabahlenga esandleni sesitha.
11 Amanzi asibekela izitha zabo; kakusalanga loyedwa kuzo.
Amanzi asibekela izitha zabo, kakho loyedwa wazo owasindayo.
12 Basebekholwa amazwi akhe, bahlabelela indumiso yakhe.
Lapho-ke base bezikholwa izithembiso zakhe bahlabelela indumiso yakhe.
13 Baphanga bakhohlwa imisebenzi yakhe, kabalindelanga iseluleko sakhe.
Kodwa baphanga bakukhohlwa lokho ayekwenzile kabaze balindela ukweluleka kwakhe.
14 Kodwa bakhanuka lokukhanuka ehlane, bamlinga uNkulunkulu enkangala.
Enkangala bakhulelwa yizinkanuko zabo; khona emqothwini bamlinga uNkulunkulu.
15 Wasebanika isicelo sabo, kodwa wathumela ukucaka emphefumulweni wabo.
Ngakho wabapha lokho abakucelayo, kodwa wabathela ngomkhuhlane ocikizayo.
16 Basebesiba lomhawu ngoMozisi enkambeni, ngoAroni ongcwele weNkosi.
Ezihonqweni basuka babalomhawu loMosi njalo lango-Aroni, owayengcwelisiwe kuThixo.
17 Umhlaba wavuleka waginya uDathani, wasibekela iqembu likaAbiramu.
Umhlaba wavuleka waginya uDathani; wagqibela ixuku lika-Abhiramu.
18 Lomlilo wavutha eqenjini labo, ilangabi latshisa abakhohlakeleyo.
Umlilo walavuza phakathi kwabalandeli babo; ilangabi labatshisa ababi.
19 Benza ithole eHorebe, bakhonza isithombe esibunjwe ngokuncibilikisa.
EHorebhi benza ithole, bakhonza isithombe esenziwe ngensimbi.
20 Basebeguqula inkazimulo yabo yaba yisifaniso senkabi edla utshani.
Badela ukuKhazimula kwabo bakhetha isithombe senkunzi edla utshani.
21 Bamkhohlwa uNkulunkulu umsindisi wabo, owayenze izinto ezinkulu eGibhithe,
Bakhohlwa uNkulunkulu owabasindisayo, owayenze izinto ezinkulu eGibhithe,
22 izimangaliso elizweni likaHamu; izinto ezesabekayo eLwandle oluBomvu.
imimangaliso elizweni likaHamu lezenzo ezibabazekayo ngasoLwandle oluBomvu.
23 Ngakho wathi uzababhubhisa, ngaphandle kokuthi uMozisi okhethiweyo wakhe wayemile ekufohleni phambi kwakhe ukuphendula ulaka lwakhe ukuze angababhubhisi.
Ngakho wathi uzababhubhisa aluba kungesuMosi, owakhethwayo wakhe, owema phambi kwakhe ukuvalela ulaka lwakhe ukuze angababhubhisi.
24 Yebo, baleyisa ilizwe elihle, kabalikholwanga ilizwi lakhe.
Kwathi njalo baleyisa ilizwe elihle; kabasikholwanga isithembiso sakhe.
25 Kodwa bakhonona emathenteni abo, kabalilalelanga ilizwi leNkosi.
Bakhonona besemathenteni abo kabaze bamlalela uThixo.
26 Ngakho waphakamisa isandla sakhe emelene labo, ukubawisa enkangala,
Ngakho wafunga kubo ephakamise isandla sakhe ukuthi wayezabenza bafele enkangala,
27 lokuwisa inzalo yabo phakathi kwezizwe, lokubahlakaza emazweni.
enze izizukulwane zabo ziqedwe ngabezizwe zihlakazeke emazweni wonke.
28 Basebezihlanganisa loBhali-Peyori, badla imihlatshelo yabafileyo.
Bazibopha ingathi kusejogweni kuBhali wasePheyori badla imihlatshelo eyayinikelwe kubonkulunkulu abangaphiliyo;
29 Basebemthukuthelisa ngezenzo zabo, lenhlupheko yafohlela kibo.
bamthukuthelisa uThixo ngezenzo zabo ezimbi; kwavela isifo phakathi kwabo.
30 Kwasekusukuma uPhinehasi, wenza isigwebo, inhlupheko yasimiswa.
Kodwa uFinehasi wema wancenga isifo sadeda.
31 Lokhu kwasekubalelwa kuye kube yikulunga, esizukulwaneni ngesizukulwana kuze kube nininini.
Lokhu kwenza kuthiwe wayelungile kwaziswa izizukulwane zonke ezizayo.
32 Basebemthukuthelisa emanzini empikisano, kwaze kwaba kubi kuMozisi ngenxa yabo.
Bamzondisa uThixo ngasemthonjeni weMeribha, uhlupho lwase lusehlela uMosi ngenxa yabo;
33 Ngoba bacunula umoya wakhe, waze wakhuluma ngamawala ngendebe zakhe.
ngoba bahlamukela uMoya kaNkulunkulu, uMosi waze wakhupha amazwi amabi ngezindebe zakhe.
34 Kabazibhubhisanga izizwe, iNkosi eyayibatshele ngazo.
Kabababhubhisanga abantu bezizwe njengalokhu ababekulaywe nguThixo,
35 Kodwa bazihlanganisa lezizwe, bafunda imisebenzi yazo.
kodwa baphithikana labezizwe bathatha imikhuba yazo.
36 Basebekhonza izithombe zazo ezaba ngumjibila kubo.
Bakhonza izithombe zazo, kwaba yisifu kubo.
37 Lamadodana abo lamadodakazi abo bawahlabela amadimoni.
Benza imihlatshelo ngamadodana abo lamadodakazi abo emadimonini.
38 Bachitha igazi elingelacala, igazi lamadodana abo lamadodakazi abo, abawahlabela izithombe zeKhanani; lelizwe langcoliswa ngegazi elinengi.
Bachitha igazi elalingelacala, igazi lamadodana lamadodakazi abo, abenza ngabo imihlatshelo yezithombe zaseKhenani, ilizwe langcola ngegazi labo.
39 Basebengcola ngemisebenzi yabo, baphinga ngezenzo zabo.
Bazingcolisa ngalokho abakwenzayo; ngezenzo zabo baziphatha njengeziphingi.
40 Ngakho ulaka lweNkosi lwabavuthela abantu bayo, yanengwa yilifa layo.
Ngakho uThixo wabathukuthelela abantu bakhe wanengwa yilifa lakhe.
41 Yabanikela esandleni sezizwe, lababazondayo bababusa.
Wabanikela kwabezizwe, izitha zabo zabusa phezu kwabo.
42 Lezitha zabo zabacindezela, basebethotshiswa ngaphansi kwesandla sazo.
Izitha zabo zabancindezela zababeka ngaphansi kwamandla azo.
43 Yabakhulula kanengi; kodwa bona bayivukela ngecebo labo, behliswa ngobubi babo.
Izikhathi ezinengi wabakhulula, kodwa babezimisele ukuhlamuka bacikizeka ngenxa yesono sabo.
44 Loba kunjalo yabona ukuhlupheka kwabo, lapho isizwa ukukhala kwabo.
Kodwa wananzelela ukuhlupheka kwabo esezwile ukukhala kwabo;
45 Yabakhumbulela isivumelwano sayo, yazisola njengobunengi bezisa zayo.
ngenxa yokubahawukela wakhumbula isivumelwano sakhe, kwathi ngothando lwakhe olukhulu wadeda.
46 Yabanika izisa phambi kwabo bonke ababebathumbile.
Wenza bonke labo ababebathumbile ukuthi babelesihawu kubo.
47 Sisindise, Nkosi Nkulunkulu wethu, usibuthe sivela ezizweni, ukubonga ibizo lakho elingcwele, ukuzincoma endumisweni yakho.
Sisindise, Oh Thixo Nkulunkulu wethu, usiqoqe usikhulule phakathi kwezizwe, ukuze silibonge ibizo lakho elingcwele sijabule ekukudumiseni.
48 Kayibongwe iNkosi, uNkulunkulu kaIsrayeli, kusukela phakade kuze kube sephakadeni! Abantu bonke kabathi: Ameni. Dumisani iNkosi!
Kabongwe uThixo, uNkulunkulu ka-Israyeli, kusukela nini kuze kube nininini. Akuthi bonke abantu bathi, “Ameni!” Dumisani uThixo.
