Amahubo 105
1 Bongani iNkosi, libize ibizo layo, lazise phakathi kwezizwe izenzo zayo.
Bongani uThixo, memezani ibizo lakhe; lizazise phakathi kwabantu izenzo zakhe
2 Hlabelelani kuyo, lihlabelele amahubo kuyo, likhulume ngezenzo zayo zonke ezimangalisayo.
Hlabelelani kuye, hlabelelani indumiso kuye; likhulume ngezenzo zakhe zonke ezimangalisayo.
3 Zincomeni ebizweni layo elingcwele; kayithokoze inhliziyo yabadinga iNkosi.
Jabulani ebizweni lakhe elingcwele; kazithokoze inhliziyo zabo abamdingayo uThixo.
4 Dingani iNkosi lamandla ayo, lidinge ubuso bayo njalonjalo.
Dingani uThixo lamandla akhe, limdinge yena njalonjalo.
5 Khumbulani izenzo zayo ezimangalisayo eyazenzayo, izimangaliso zayo lezahlulelo zomlomo wayo,
Khumbulani izenzo zakhe ezimangalisayo azenzayo, izimangaliso azenzayo, lezahlulelo azikhulumayo,
6 nzalo kaAbrahama inceku yayo, bantwana bakaJakobe abakhethiweyo bayo.
lina zizukulwane zika-Abhrahama inceku yakhe, lina madodana kaJakhobe, abakhethiweyo bakhe.
7 Yona iyiNkosi uNkulunkulu wethu; izahlulelo zayo zisemhlabeni wonke.
UnguThixo uNkulunkulu wethu; izahlulelo zakhe zisemhlabeni wonke.
8 Iyakhumbula isivumelwano sayo kuze kube nininini, ilizwi eyalilaya kuzizukulwana eziyinkulungwane,
Uyasikhumbula isivumelwano sakhe nini lanini, ilizwi lomlayo wakhe, okwezizukulwane ezizinkulungwane,
9 eyasenza loAbrahama, lesifungo sayo kuIsaka;
isivumelwano asenza lo-Abhrahama, isifungo asifungayo ku-Isaka.
10 eyasiqinisa kuJakobe saba yisimiso, kuIsrayeli saba yisivumelwano esilaphakade,
Wakuqinisa lokhu kuJakhobe kwaba yisimiso ku-Israyeli njengesivumelwano saphakade:
11 isithi: Ngizakunika wena ilizwe leKhanani, isabelo selifa lakho.
wathi “Ngizalinika ilizwe laseKhenani njengesabelo selifa lenu.”
12 Besebalutshwana ngenani, yebo, bebalutshwana, labemzini kulo;
Kwathi besesebalutshwana, bebalutshwana kakhulu, beyizihambi kulo,
13 basebezula besuka esizweni besiya esizweni, besuka komunye umbuso besiya kwabanye abantu;
bezula kuzizwe ngezizwe besuka komunye umbuso besiya komunye.
14 kayivumelanga muntu ukubahlupha; yasikhuza amakhosi ngenxa yabo,
Kavumelanga loba ngubani ukubancindezela; wawakhuza amakhosi ngenxa yabo:
15 isithi: Lingathinti abagcotshiweyo bami, lingoni abaprofethi bami.
“Lingabathinti abagcotshiweyo bami; lingahlukuluzi abaphrofethi bami.”
16 Yasibiza indlala phezu kwelizwe, yephula udondolo lonke lwesinkwa.
Waletha indlala elizweni wachitha zonke iziphala zokudla;
17 Yathuma indoda phambi kwabo: UJosefa wathengiswa waba yisigqili.
wathumela indoda yabandulela uJosefa owathengiswa waba yisigqili.
18 Bazwisa ubuhlungu inyawo zakhe ngamaketane, yena ngokwakhe wafika ensimbini.
Bambhonxula inyawo zakhe ngezibopho, wabotshwa intamo ngezinsimbi,
19 Kwaze kwaba yisikhathi sokufika kwelizwi lakhe, ilizwi likaJehova lamlinga.
kwaze kwathi lokho ayekutsho ngaphambili kwagcwaliseka, kwaze kwathi ilizwi likaThixo latshengisa ukuthi wayeqinisile.
20 Inkosi yathuma yamthukulula, umbusi wabantu wasemkhulula.
Inkosi yathumela ukuthi akhululwe, umbusi wezizwe wamkhulula.
21 Yambeka waba yinkosi yendlu yayo, lombusi wemfuyo yayo yonke,
Wamenza umbusi wendlu yakhe, umbusi wakho konke okwakungokwakhe,
22 ukubopha iziphathamandla zayo ngokuthanda kwakhe, afundise abadala bakhe ukuhlakanipha.
ukuqondisa amakhosana akhe njengokubona kwakhe lokufundisa abadala bakhe inhlakanipho.
23 UIsrayeli wasefika eGibhithe; uJakobe wahlala njengowezizwe elizweni lakoHamu.
Kwathi-ke u-Israyeli wayangena eGibhithe; uJakhobe wahlala njengowezizweni elizweni likaHamu.
24 Wenza abantu bayo bazale kakhulu, yabenza baba lamandla kulezitha zabo.
UThixo wenza abantu bakhe banda kakhulu; wabenza baba banengi kakhulu bandela izitha zabo,
25 Yaphendula inhliziyo yabo ukuzonda abantu bayo, ukuthi baphathe inceku zayo ngobuqili.
kwathi inhliziyo zabo wazenza zazonda abantu bakhe, bakha amacebo amabi ngezinceku zakhe.
26 Yasithuma uMozisi inceku yayo, uAroni eyayimkhethile.
Wathuma uMosi inceku yakhe, lo-Aroni ayebakhethile.
27 Babeka phakathi kwabo izinto zezibonakaliso zayo, lezimangaliso elizweni lakoHamu.
Benza iziboniso zakhe ezimangalisayo phakathi kwabo, izimanga zakhe elizweni likaHamu.
28 Yathumela umnyama, yenza kwaba mnyama; njalo kabavukelanga ilizwi layo.
Wathumela umnyama wenza ilizwe laba mnyama kanti angithi babewahlamukele amazwi akhe?
29 Yaphendula amanzi abo aba ligazi, yabulala inhlanzi zawo.
Waguqula amanzi abo aba ligazi, okwenza inhlanzi zawo zafa.
30 Ilizwe labo lanyakazela amaxoxo, emakamelweni amakhosi abo.
Ilizwe labo lanyakazela ngamaxoxo, angena ezindlini zokulala ezababusi babo.
31 Yakhuluma, kwavela umtshitshi wezibawu, intwala emngceleni wabo wonke.
Wakhuluma, kwavela umtshitshi wezibawu, lenswintila elizweni labo lonke.
32 Yabanika isiqhotho saba lizulu, umlilo olamalangabi elizweni labo.
Wenza izulu labo laba yisiqhotho, laba lombane elizweni labo lonke;
33 Yasitshaya isivini sabo lomkhiwa wabo, yephula izihlahla zomngcele wabo.
wacakazela phansi amavini abo lemikhiwa, waphundla izihlahla zelizwe labo.
34 Yakhuluma, kwasekuvela isikhonyane lemihogoyi, okungelakubalwa,
Wakhuluma zatheleka izintethe, izintethe ezingelakubalwa;
35 okwaqeda yonke imibhida elizweni labo, kwaqeda isithelo somhlabathi wabo.
zadla yonke into eluhlaza elizweni labo, zadla izithelo zomhlabathi wabo.
36 Yasitshaya amazibulo wonke elizweni labo, okokuqala kwamandla abo wonke.
Ngemva kwalokho wasebulala amazibulo wonke elizweni labo, izithelo zokuqala zobulisa babo.
37 Yasibakhupha belesiliva legolide, njalo kwakungekho owakhubekayo phakathi kwezizwe zabo.
Wamkhupha u-Israyeli, ethwele esisitheka isiliva legolide, kakwaba lamunye phakathi kwezizwana zabo owehlulwa yikufa.
38 IGibhithe yathokoza ekuphumeni kwabo, ngoba uvalo ngabo lwabehlela.
IGibhithe yathokoza ngokusuka kwabo, ngoba base bemesaba kubi u-Israyeli.
39 Yendlala iyezi laba yisisibekelo, lomlilo wokukhanyisa ebusuku.
Wendlala iyezi lagubuzela, lomlilo ukukhanyisa ebusuku.
40 Bacela, yasiletha izagwaca, yabasuthisa ngesinkwa samazulu.
Bacela wabalethela izagwaca, wabasuthisa ngesinkwa sasezulwini.
41 Yavula idwala, kwampompoza amanzi; ahamba endaweni ezomileyo njengomfula.
Wavula ilitshe amanzi antshaza; njengomfula ageleza enkangala.
42 Ngoba yakhumbula isithembiso sayo esingcwele, loAbrahama inceku yayo.
Ngoba wakhumbula isithembiso sakhe esingcwele esaphiwa inceku yakhe u-Abhrahama.
43 Yasikhupha abantu bayo ngentokozo, abakhethiweyo bayo ngenjabulo.
Wabakhupha abantu bakhe ngokuthokoza, abakhethiweyo bakhe ngenhlokomo yentokozo.
44 Yasibanika amazwe abezizwe, njalo badla ilifa lomtshikatshika wabantu,
Wabapha amazwe ezizwe, badla ilifa lalokho okwakuginqelwe ngabanye,
45 ukuze bagcine izimiso zayo, balondoloze imilayo yayo. Dumisani iNkosi!
ukuze bagcine iziqondiso zakhe njalo balalele imithetho yakhe. Dumisani uThixo.
