Amanani 33
1 Lezi zinhambo zabantwana bakoIsrayeli abaphuma elizweni leGibhithe ngamabutho abo, ngesandla sikaMozisi loAroni.
Nanka amalombolombo ohambo lwabako-Israyeli ekuphumeni kwabo eGibhithe ngamaviyo abo bekhokhelwa nguMosi lo-Aroni.
2 UMozisi wasebhala ukuphuma kwabo ngezinhambo zabo ngokomlayo weNkosi. Lalezi zinhambo zabo njengokuphuma kwabo.
Ngokulaya kukaThixo waloba walonda izigaba zamalombolombo ohambo lwabo. Nantu uhambo lwabo ngezigaba zakhona:
3 Basebesuka eRamesesi ngenyanga yokuqala ngosuku lwetshumi lanhlanu lwenyanga yokuqala; ngakusisa kwephasika abantwana bakoIsrayeli baphuma ngesandla esiphakemeyo phambi kwamehlo awo wonke amaGibhithe,
Abako-Israyeli basuka eRamesesi ngosuku lwetshumi lanhlanu lwenyanga yakuqala, ngosuku kwedlule iPhasika. Baphuma ngesibindi bekhangelwe ngamaGibhithe wonke,
4 lapho amaGibhithe engcwaba labo iNkosi eyabatshayayo phakathi kwawo, wonke amazibulo; laphezu kwabonkulunkulu bawo iNkosi yenza isigwebo.
wona eyephathekile engcwaba wonke amazibulo awo, lawo ayebulewe nguThixo phakathi kwawo; ngoba uThixo wayehlulele ngokujezisa onkulunkulu bawo.
5 Abantwana bakoIsrayeli basebesuka eRamesesi, bamisa inkamba eSukothi.
Abako-Israyeli basuka eRamesesi bayamisa izihonqo zabo eSukhothi.
6 Basuka eSukothi, bamisa inkamba eEthama elisekucineni kwenkangala.
Basuka eSukhothi bayamisa izihonqo zabo e-Ethamu, emaphethelweni enkangala.
7 Basuka eEthama, babuyela ePi-Hahirothi ephambi kweBhali-Zefoni, bamisa inkamba phambi kweMigidoli.
Basuka e-Ethamu, baphenduka baya ePhi-Hahirothi; beqonda empumalanga yaseBhali-Zefoni, babuye njalo bamisa izihonqo zabo eMigidoli.
8 Basuka ePi-Hahirothi, badabula phakathi kolwandle besiya enkangala; bahamba uhambo lwensuku ezintathu enkangala yeEthama, bamisa inkamba eMara.
Basuka ePhi-Hahirothi badabula olwandle bangena enkangala, bathi sebehambe okwensuku ezintathu enkangala ye-Ethamu, bamisa izihonqo zabo eMara.
9 Basuka eMara, bayafika eElimi; njalo eElimi kwakukhona imithombo yamanzi elitshumi lambili lezihlahla zelala ezingamatshumi ayisikhombisa; basebemisa inkamba lapho.
Basuka eMara baya e-Elimi, lapho okwakulezintombo zamanzi ezilitshumi lambili kanye lezihlahla zohlobo lwelala ezingamatshumi ayisikhombisa, bafika bamisa izihonqo khonapho.
10 Basuka eElimi, bamisa inkamba eLwandle oluBomvu.
Basuka e-Elimi bayamisa izihonqo zabo besekele uLwandle oluBomvu.
11 Basuka eLwandle oluBomvu, bamisa inkamba enkangala yeSini.
Basuka oLwandle oluBomvu bayamisa enkangala yaseSini.
12 Basuka enkangala yeSini, bamisa inkamba eDofika.
Basuka enkangala yeSini bayamisa eDofuka.
13 Basuka eDofika, bamisa inkamba eAlushi.
Basuka eDofuka bayamisa e-Alusha.
14 Basuka eAlushi, bamisa inkamba eRefidimi lapho okwakungelamanzi khona okuthi abantu banathe.
Basuka e-Alusha bayamisa eRefidimu, lapho okwakungelamanzi okunathwa ngabantu.
15 Basebesuka eRefidimi, bamisa inkamba enkangala yeSinayi.
Basuka eRefidimu bayamisa enkangala yeSinayi.
16 Basuka enkangala yeSinayi, bamisa inkamba eKibirothi-Hathava.
Basuka enkangala yeSinayi bayamisa eKhibhrothi Hathava.
17 Basuka eKibirothi-Hathava, bamisa inkamba eHazerothi.
Basuka eKhibhrothi Hathava bayamisa eHazerothi.
18 Basuka eHazerothi, bamisa inkamba eRithima.
Basuka eHazerothi bayamisa eRithima.
19 Basuka eRithima, bamisa inkamba eRimoni-Perezi.
Basuka eRithima bayamisa eRimoni-Pherezi.
20 Basuka eRimoni-Perezi, bamisa inkamba eLibhina.
Basuka eRimoni-Pherezi bayamisa eLibhina.
21 Basuka eLibhina, bamisa inkamba eRisa.
Basuka eLibhina bayamisa eRisa.
22 Basuka eRisa, bamisa inkamba eKehelatha.
Basuka eRisa bayamisa eKhehelatha.
23 Basuka eKehelatha, bamisa inkamba entabeni yeSheferi.
Basuka eKhehelatha bayamisa eNtabeni yaseShefa.
24 Basuka entabeni yeSheferi, bamisa inkamba eHarada.
Basuka eNtabeni yaseShefa bayamisa eHarada.
25 Basuka eHarada, bamisa inkamba eMakelothi.
Basuka eHarada bayamisa eMakhelothi.
26 Basuka eMakelothi, bamisa inkamba eTahathi.
Basuka eMakhelothi bayamisa eThahathi.
27 Basuka eTahathi, bamisa inkamba eTera.
Basuka eThahathi bayamisa eThera.
28 Basuka eTera, bamisa inkamba eMithika.
Basuka eThera bayamisa eMithika.
29 Basuka eMithika, bamisa inkamba eHashimona.
Basuka eMithika bayamisa eHashimona.
30 Basuka eHashimona, bamisa inkamba eMoserothi.
Basuka eHashimona bayamisa eMosera.
31 Basuka eMoserothi, bamisa inkamba eBene-Jakani.
Basuka eMosera bayamisa eBhene Jayakhani.
32 Basuka eBene-Jakani, bamisa inkamba eHori-Hagidigadi.
Basuka eBhene Jayakhani bayamisa eHori-Hagidigadi.
33 Basuka eHori-Hagidigadi, bamisa inkamba eJotibatha.
Basuka eHori-Hagidigadi bayamisa eJothibhatha.
34 Basuka eJotibatha, bamisa inkamba eAbrona.
Basuka eJothibhatha bayamisa e-Abhurona.
35 Basuka eAbrona, bamisa inkamba eEziyoni-Geberi.
Basuka e-Abhurona bayamisa e-Eziyoni-Gebheri.
36 Basuka eEziyoni-Geberi, bamisa inkamba enkangala yeZini, eyiKadeshi.
Basuka e-Eziyoni-Gebheri bayamisa eKhadeshi, eNkangala yaseZini.
37 Basuka eKadeshi, bamisa inkamba entabeni yeHori ekucineni kwelizwe leEdoma.
Basuka eKhadeshi bayamisa eNtabeni yaseHori, emngceleni wase-Edomi.
38 UAroni umpristi wasesenyukela entabeni yeHori ngokomlayo weNkosi, wafela khona, ngomnyaka wamatshumi amane emva kokuphuma kwabantwana bakoIsrayeli elizweni leGibhithe, ngenyanga yesihlanu, ngosuku lokuqala lwenyanga.
Ngokulaya kukaThixo, u-Aroni umphristi wakhwela eNtabeni yaseHori, lapho afela khona ngosuku lwakuqala lwenyanga yesihlanu yomnyaka wamatshumi amane emva kokuphuma kwabako-Israyeli eGibhithe.
39 Njalo uAroni wayeleminyaka elikhulu lamatshumi amabili lantathu ekufeni kwakhe entabeni yeHori.
U-Aroni wayeseleminyaka elikhulu elileminyaka engamatshumi amabili lemithathu yokuphila ekufeni kwakhe eNtabeni yaseHori.
40 UmKhanani, inkosi yeAradi, owayehlala eningizimu elizweni leKhanani, wasesizwa ngokuza kwabantwana bakoIsrayeli.
Inkosi yase-Aradi engumKhenani eyayihlala eNegebi yaseKhenani, yezwa ukuthi abako-Israyeli babesiza.
41 Basebesuka entabeni yeHori, bamisa inkamba eZalimona.
Basuka eNtabeni yaseHori bayamisa eZalimona.
42 Basuka eZalimona, bamisa inkamba ePunoni.
Basuka eZalimona bayamisa ePhunoni.
43 Basuka ePunoni, bamisa inkamba eObothi.
Basuka ePhunoni bayamisa e-Obhothi.
44 Basuka eObothi, bamisa inkamba eIye-Abarimi, emngceleni wakoMowabi.
Basuka e-Obhothi bayamisa e-Iye-Abharimi, emngceleni waseMowabi.
45 Basuka eIyimi, bamisa inkamba eDiboni-Gadi.
Basuka e-Iye-Abharimu bayamisa eDibhoni Gadi.
46 Basuka eDiboni-Gadi, bamisa inkamba eAlimoni-Dibilathayimi.
Basuka eDibhoni Gadi bayamisa e-Alimoni-Dibhilathayimi.
47 Basuka eAlimoni-Dibilathayimi, bamisa inkamba entabeni zeAbarimi, phambi kweNebo.
Basuka e-Alimoni-Dibhilathayimi bayamisa ezintabeni zase-Abharimi, phansi kweNebho.
48 Basuka entabeni zeAbarimi, bamisa inkamba emagcekeni akoMowabi eJordani eJeriko;
Basuka ezintabeni zase-Abharimi bayamisa emagcekeni aseMowabi besekele uJodani ngaphetsheya malungana leJerikho.
49 bamisa inkamba eJordani kusukela eBeti-Jeshimothi kusiya eAbeli-Shithimi, emagcekeni akoMowabi.
Khonapho emagcekeni aseMowabi bamisa izihonqo zabo belandela umfula uJodani kusukela eBhethi-Jeshimothi kusiya e-Abheli-Shithima.
50 INkosi yasikhuluma kuMozisi emagcekeni akoMowabi, eJordani eJeriko, isithi:
Emagcekeni aseMowabi ngasemfuleni uJodani ngaphetsheya uvelela ngaseJerikho uThixo wathi kuMosi,
51 Tshono ebantwaneni bakoIsrayeli uthi kubo: Lapho selichaphe iJordani laya elizweni leKhanani,
“Khuluma kwabako-Israyeli ubatshele lokhu uthi: ‘Nxa lichapha uJodani lingena eKhenani,
52 lizaxotsha bonke abakhileyo belizwe libakhuphe emfuyweni yabo phambi kwenu, lichithe yonke imifanekiso yabo, lichithe zonke izithombe zabo ezibunjwe ngokuncibilikisa, liqede zonke indawo zabo eziphakemeyo,
xotshani phambi kwenu bonke abahlala kulelolizwe. Dilizani zonke izithombe zabo ezibaziweyo kanye lezibunjiweyo, njalo libhidlize zonke izindawo eziphakemeyo zokukhonzela.
53 lidle ilifa lelizwe, lihlale kilo, ngoba ngilinike ilizwe ukuthi lidle ilifa lalo.
Thumbani ilizwe lelo lihlale kulo, ngoba ngilinike ukuthi libe ngelenu.
54 Njalo lizakudla ilifa lelizwe ngenkatho ngensendo zenu; kwabanengi lizakwengeza ilifa labo, lakwabalutshwana lizanciphisa ilifa labo. Lapho inkatho ezamphumela khona umuntu, kuzakuba ngokwakhe. Njengezizwe zaboyihlo lizakudla ilifa.
Yabelanani ilizwe ngenkatho, kusiya ngokwensendo zenu. Ixuku elikhulu kaliphiwe isabelo esikhulu, kuthi ixuku elincinyane liphiwe isabelo esincinyane. Okuzakuya kubo ngenkatho akube ngokwabo. Kwabelananeni kusiya ngezizwana zabokhokho benu.
55 Kodwa nxa lingabakhuphi abakhileyo elizweni emfuyweni yabo phambi kwenu, khona kuzakuthi elibatshiyayo babo bazakuba zimvava emehlweni enu babe ngameva ezinhlangothini zenu, balihluphe elizweni elihlala kilo.
Kodwa nxa lingaxotshanga abahlala kulelolizwe, abaseleyo babo bazakuba lukhophe emehlweni enu njalo babe ngameva enyameni yenu. Bazakuba luhlupho ezweni elizahlala kulo.
56 Kuzakuthi-ke, ngizakwenza kini njengalokhu ebengicabanga ukukwenza kubo.
Ngakho-ke ngizakwenza kini lokho engizimisele ukukwenza kubo.’”
