UJobe 29
1 UJobe wasebuya ephakamisa isaga sakhe wathi:
UJobe waqhubeka ngenkulumo yakhe wathi:
2 Kungathi ngabe nginjengenyangeni zamandulo, njengensukwini uNkulunkulu angigcine ngazo,
“Ngiyaziloyisa lezozinyanga esezadlulayo, lezinsuku uNkulunkulu esangilinda,
3 lapho isibane sakhe sakhanya phezu kwekhanda lami; ngahamba emnyameni ngokukhanya kwakhe!
lapho isibane sakhe sisakhanyisa phezu kwekhanda lami ngihamba ngokukhanya kwakhe emnyameni!
4 Njengoba nganginjalo ensukwini zokuvuthwa kwami, lapho iseluleko sikaNkulunkulu sasiphezu kwethente lami,
Oh, lezinsuku ngisazizwa ukuthi ngiyimi, lapho ubudlelwano obukhulu loNkulunkulu busesendlini yami,
5 lapho uSomandla wayeseselami, labantwana bami bengiphahlile,
lapho uSomandla eseselami labantwabami besaphila lami,
6 lapho ngagezisa izinyathelo zami ngolaza, ledwala langithululela imifula yamafutha!
lapho indlela yami ifafazwe ngolaza ledwala lingithululela impophoma zamafutha e-oliva.
7 Lapho ngaphuma ngaya esangweni ngidabula umuzi, ngalungisa isihlalo sami emdangeni;
Ekuyeni kwami emasangweni edolobho ngafika ngahlala enkundleni,
8 amajaha angibona, acatsha; lamaxhegu asukuma ema;
amajaha angibona agudluka ema eceleni, abadala baphakama bema ngezinyawo;
9 iziphathamandla zayekela ukukhuluma, zabeka isandla phezu komlomo wazo;
amadoda ayizikhulu athula akaze akhuluma avala imilomo yawo ngezandla zawo;
10 ilizwi labakhulu lacatsha, lolimi lwabo lwanamathela elwangeni lwabo.
amazwi ezikhulu ehliselwa phansi, inlimi zazo zanamathela olwangeni lwazo.
11 Lapho indlebe isizwa yangibusisa, lelihlo libona langifakazela,
Loba ngubani owangizwayo wakhuluma kuhle ngami, kwathi labo abangibonayo bangibuka,
12 ngoba ngakhulula umyanga okhalayo, lentandane, longelamsizi.
ngoba ngalamulela abayanga abacela uncedo, lezintandane ezazingelamsizi.
13 Isibusiso sobhubhayo sehlele phezu kwami, njalo ngenza inhliziyo yomfelokazi ihlabele ngentokozo.
Indoda eyayisifa yangibusisa; ngenza inhliziyo yomfelokazi yahlabelela.
14 Ngembatha ukulunga, kwangembesa; isahlulelo sami saba njengesembatho lomqhele.
Ngavunula ukulunga njengezigqoko zami; ukwahlulela ngokulunga kwaba yisembatho sami lengwane yami.
15 Ngangingamehlo koyisiphofu, ngangizinyawo kusiqhuli.
Ngangingamehlo kwabayiziphofu lezinyawo kwabaqhulayo.
16 Nganginguyise wabayanga, lendaba engingayaziyo ngayihlolisisa.
Nganginguyise kwabaswelayo; ngayimela indaba yesihambi.
17 Ngasengisephula umhlathi womubi, ngamenza alahle impango emazinyweni akhe.
Ngawephula amazinyo ababi ngahluthuna labo ababebabambile ngamazinyo abo.
18 Ngasengisithi: Ngizaphela lesidleke sami, ngandise insuku njengetshebetshebe.
Ngakhumbula ngathi, ‘Ngizafela endlini yami, insuku zami zinengi njengezinhlamvu zetshebetshebe.
19 Impande zami zinabele emanzini, lamazolo alale ubusuku ogatsheni lwami.
Impande zami zizafinyelela emanzini, amazolo azalala emagatsheni ubusuku bonke.
20 Udumo lwami lutsha kimi, ledandili lami laguquka esandleni sami.
Udumo lwami luzahlala lulutsha kimi, idandili lami lilitsha esandleni sami.’
21 Bangilalela, belindele, bathulela iseluleko sami.
Abantu babengilalela belethemba, belindele ukwelulekwa bethule zwi.
22 Emva kwelizwi lami kabaphendulanga, lelizwi lami lathontela phezu kwabo.
Nxa sekukhulume mina, kungakhulumi omunye njalo; amazwi ami ayengena kamnandi ezindlebeni zabo.
23 Bangilindela njengezulu, lomlomo wabo bawukhamisela izulu lokucina.
Babengilindela njengokulindela izulu, bawanathe amazwi ami njengezulu lentwasa.
24 Lapho ngibahlekela, kabakholwanga, lokukhanya kobuso bami kabakuwiselanga phansi.
Ngangisithi ngingababobothekela, bathabe bangakholwa; ukukhanya kobuso bami kwakuligugu kubo.
25 Ngakhetha indlela yabo ngahlala ngiyinhloko, ngahlala njengenkosi phakathi kweviyo, njengoduduza abalilayo.
Yimi engangibakhethela ukuthi benzeni ngoba ngisanduna kubo; ngangihlala njengenkosi phakathi kwamabutho ayo; ngangifana lomduduzi wabalilayo.”
