Amahubo 44

1 Kumqondisi wokuhlabela. Ihubo lamaDodana kaKhora. Sizizwele ngezethu indlebe, yebo Oh Nkulunkulu obaba basitshela owakwenzayo ensukwini zabo, ensukwini zekadeni.

2 Ngezakho izandla wazixotsha izizwe wagxumeka obaba; wabahlifiza abantu wenza obaba baphumelela.

3 Kwakungasinkemba zabo ezathumba ilizwe, njalo kakusingalo yabo eyaletha ukunqoba; kwaba yisandla sakho sokunene, ingalo yakho, lokukhanya kobuso bakho, ngoba wawubathanda.

4 UyiNkosi yami loNkulunkulu wami, ophayo ukunqoba kuJakhobe.

5 Ngawe siyazihlehlisa izitha zethu; ngebizo lakho siyazigxobagxoba izitha zethu.

6 Angilithembi idandili lami, inkemba yami kayingiletheli ukunqoba;

7 kodwa wena usipha ukunqoba phezu kwezitha zethu, abalwa lathi ubathela ihlazo.

8 Siyazincoma ngoNkulunkulu ilanga lonke, njalo sizalidumisa ibizo lakho nini lanini.

9 Kodwa manje ususilahlile wasiyangisa; kawusaphelekezeli izimpi zethu.

10 Wasenza sahlehla phambi kwesitha, abalwa lathi sebethethe impango.

11 Wasiyekela sadliwa njengezimvu wasichithachitha phakathi kwezizwe.

12 Wathengisa abantu bakho ngengcosana nje awazuza lutho ngalokho kuthengisa.

13 Ususenze saba lihlazo kubomakhelwane, inhlekisa lendumazo kwesihlalisene labo.

14 Ususenze saba yisiga phakathi kwezizwe; abantu banyikinya amakhanda ngathi.

15 Ukuyangeka kwami kuyangilandela ilanga lonke, ubuso bami buhuqwe ngehlazo,

16 ngokuhozwa yilabo abangisolayo njalo abangenyanyayo, ngenxa yesitha esijonge ukuphindisela.

17 Konke lokhu kwenzakala kithi, lanxa sasingakulibalanga; asathembeka esivumelwaneni sakho.

18 Inhliziyo zethu zazingabuyelanga emuva; inyawo zethu zazingaphambukanga endleleni yakho.

19 Kodwa wasichoboza saba yikudla kwamaganyane, wasembesa ngomnyama omkhulu.

20 Aluba sasesilikhohliwe ibizo likaNkulunkulu wethu loba saphakamisela izandla zethu kunkulunkulu wezizweni,

21 kambe ngabe uNkulunkulu kakubonanga lokho na, njengoba esazi imfihlo zenhliziyo?

22 Ikanti ngenxa yakho wena sikhangelane lokufa ilanga lonke; sithathwa njengezimvu ezizahlatshwa.

23 Vuka, Oh Thixo! Ulaleleni na? Ziphaphamise! Ungasilahli kokuphela.

24 Ubufihlelani ubuso bakho na, ukhohlwe ukuhlupheka kwethu lokuncindezelwa?

25 Sesibhuqwe phansi othulini; imizimba yethu isinamathele phansi.

26 Phakama usisize; sihlenge ngenxa yothando lwakho olungaphuthiyo.