Amahubo 38

1 Ihubo likaDavida. Isikhalazo. Awu Thixo, ungangikhuzi ngolaka loba ungijezise uthukuthele.

2 Ngoba imitshoko yakho ingicibile, njalo wangibhansula kakhulu ngesandla sakho.

3 Ngenxa yokuthukuthela kwakho kangiselakuphila emzimbeni wami; amathambo ami kawasaqinanga ngenxa yesono sami.

4 Ukona kwami sekungisinda njengomthwalo onzima ongathwalekiyo.

5 Izilonda zami sezilobovu sezisenyanyeka ngenxa yobuthutha bami besono.

6 Ngiyangiswe ngehliswa kakhulu; sengitshona ngilila ilanga lonke.

7 Ngiphethwe liqolo ngobuhlungu obuqumayo; umzimba wami kawuselampilo.

8 Sengibuthakathaka, sengicikizekile; ngiyabubula ngobuhlungu benhliziyo.

9 Zonke iziloyiso zami zisobala kuwe, Oh Thixo, ukububula kwami kakufihlekanga kuwe.

10 Inhliziyo yami iyagubhazela, amandla ami ayaphela; lokukhanya sekufiphele emehlweni ami.

11 Abangane bami labakhula bami sebengibalekela ngenxa yamanxeba ami; omakhelwane bami sebehlalela khatshana

12 Labo abafuna impilo yami sebethiyile, labo abafuna ukungilimaza bakhuluma ngokungidiliza; ilanga lonke batshonela ukwakha amacebo enkohliso.

13 Sengifana lesacuthe esingezwayo, njengesimungulu esehluleka ukuvula umlomo waso;

14 senginjengomuntu ongezwayo, olomlomo ongaphenduliyo.

15 Ngikulindele, Oh Thixo, uzaphendula, Oh Nkosi Nkulunkulu wami.

16 Ngoba ngathi, “Ungabayekeli baklolode kumbe bazikhukhumeze phezu kwami nxa unyawo lwami lutshelela.”

17 Ngoba sengiseduze lokuwa, lobuhlungu bungiphethe njalonjalo.

18 Ngiyabuvuma ububi bami; ngiyakhathazeka ngesono sami.

19 Banengi labo abayizitha zami ezitshisekayo, labo abangizonda bengelasizatho banengi.

20 Labo abangiphindisela okuhle ngokubi bayangigcona lapho ngisenza okulungileyo.

21 Oh Thixo, ungangideli; ungabi khatshana lami, Oh Nkulunkulu wami.

22 Woza masinyane uzongisiza, Nkosi yami loMsindisi wami.