Amahubo 37

1 ElikaDavida. Ungazikhathazi ngabantu ababi loba uhawukele labo abenza okungalunganga;

2 ngoba bazabuna masinyane njengotshani, njengezimila eziluhlaza bazakufa masinyane.

3 Themba kuThixo wenze okulungileyo; hlala elizweni ukholise amadlelo amahle.

4 Zithokozise kuThixo Yena uzakupha izifiso zenhliziyo yakho.

5 Nikela indlela zakho kuThixo; themba kuye, Yena uzakwenzela lokhu:

6 Uzakwenza ukulunga kwakho kukhazimule njengentathakusa, ubuqotho balokho okulwelayo njengelanga lemini enkulu.

7 Chuma phambi kukaThixo umlindele ngesineke; ungakhathazeki nxa abantu bephumelela ngezindlela zabo, nxa bephutshisa amaqhinga abo amabi.

8 Xwayana lokuzonda njalo ufulathele intukuthelo; ungakhathazeki, kukhokhelela ebubini kuphela.

9 Ngoba abantu ababi bazasuswa, kodwa labo abathemba uThixo bazakudla ilifa lelizwe.

10 Kuseyisikhatshana nje, ababi bazabe bengasekho; loba usubadinga kabasayikufunyanwa.

11 Kodwa abathobekileyo bazakudla ilifa lelizwe njalo bakholise ukuthula okukhulu.

12 Ababi baceba ukulimaza abalungileyo babagedlele amazinyo;

13 kodwa iNkosi iyabahleka ababi, ngoba iyazi ukuthi usuku lwabo luyeza.

14 Ababi bakhokha inkemba, badonsa idandili ngenhloso yokulimaza abahluphekayo labaswelayo, lokubulala labo abahamba ngokulunga.

15 Kodwa izinkemba zabo zizagwaza ezabo inhliziyo, lamadandili abo azakwephulwa.

16 Kungcono ingcosana leyo abalayo abalungileyo kulenotho yababi abanengi;

17 ngoba amandla ababi azaqedwa, kodwa uThixo uyabaxhasa abalungileyo.

18 Insuku zabangelasici ziyaziwa nguThixo, ilifa labo lizakuma lanini.

19 Ngezikhathi zomonakalo abayikubuna; ngezikhathi zendlala bazasutha.

20 Kodwa ababi bazabhubha; izitha zikaThixo zinjengobuhle beganga, zizanyamalala, zinyamalale njengentuthu.

21 Ababi bayaboleka kodwa kababuyiseli, kodwa abalungileyo bayapha kakhulu;

22 labo uThixo ababusisayo bazakudla ilifa lelizwe; kodwa labo abathukayo bazasuswa.

23 Nxa uThixo ethokoziswa yikuhamba komuntu, uyaqinisa izinyathelo zakhe;

24 loba angakhubeka, kayikuwa, ngoba uThixo uyamsekela ngesandla sakhe.

25 Ngangimutsha, manje sengiluphele, kodwa angizange ngibone abalungileyo bedelwa loba abantwababo becela isinkwa.

26 Bayaphana kokuphela njalo bayebolekana nje; abantwababo bazabusiswa.

27 Phendukani ebubini lenze ukulunga lapho-ke lizahlala elizweni nini lanini.

28 Ngoba uThixo uthanda abalungileyo njalo kayikubadela abathembekileyo bakhe. Bazavikelwa kuze kube nini lanini kodwa inzalo yababi izalahlwa;

29 abalungileyo bazazuza ilifa lelizwe bahlale kulo lanini.

30 Umlomo womuntu olungileyo ukhuluma ukuhlakanipha, lolimi lwakhe lukhuluma okuqondileyo.

31 Umthetho kaNkulunkulu wakhe usenhliziyweni yakhe; inyawo zakhe kazitsheleli.

32 Ababi bacathamela abalungileyo befuna impilo yabo qobo lwayo;

33 kodwa uThixo kayikubayekela bazenzele abakuthandayo kubo kumbe balahlwe licala nxa bethonisiswa.

34 Lindelani uThixo ligcine indlela yakhe. Uzaliphakamisa lilithathe ilifa lelizwe; lizakubona lokhu nxa ababi sebesusiwe.

35 Sengike ngabona umuntu omubi olesihluku kulokubhadala ehluma njengesihlahla, esikhula kuhle emhlabathini waso wemvelo,

36 kodwa waphanga wafa kabe esabakhona; ngathi loba sengimdinga ngamswela.

37 Nanzelela abangelecala, qaphela abaqotho. Likhona ikusasa kumuntu wokuthula.

38 Kodwa zonke izoni zizabhujiswa; ikusasa lezigangi lizasuswa.

39 Ukusindiswa kwabalungileyo kuvela kuThixo; uyinqaba yabo ngesikhathi sokuhlupheka.

40 UThixo uyabasiza abakhulule; abakhulule kwababi abasindise, ngoba baphephela kuye.