Amahubo 33

1 Hlabelelani kuThixo ngentokozo, lina balungileyo; kubafanele abaqotho ukumdumisa.

2 Dumisani uThixo ngechacho; mhlabeleleni ngesiginci sezintambo ezilitshumi.

3 Mhlabeleleni ingoma entsha; tshayani kamnandi lihlokome ngentokozo.

4 Ngoba ilizwi likaThixo lilungile, liqinisile; uthembekile kukho konke akwenzayo.

5 UThixo uthanda ukulunga lokwahlulela okuqondileyo; umhlaba ugcwele uthando lwakhe olungaphuthiyo.

6 Ngelizwi likaThixo amazulu enziwa, ubunkanyankanya bezinkanyezi ngomoya womlomo wakhe.

7 Uyawaqoqa amanzi olwandle awathele enkonxeni; athululele inziki zolwandle eziphaleni.

8 Umhlaba wonke kawesabe uThixo; akuthi bonke abantu bomhlaba bazithobe phambi Kwakhe.

9 Ngoba wakhuluma, kwahle kwaba khona; wayala, kwema kwaqina nko.

10 UThixo uyawachitha amacebo ezizwe; uyazinyampisa izinhloso zabantu.

11 Kodwa amacebo kaThixo ami aqinile nini lanini, izinhloso zenhliziyo yakhe kuzozonke izizukulwane.

12 Sibusisekile isizwe uNkulunkulu waso onguThixo, abantu abakhethayo baba yilifa lakhe.

13 UThixo ukhangele phansi esezulwini ababone bonke abantu;

14 esemzini wakhe uyababona bonke abahlala emhlabeni

15 yena owenza inhliziyo zabo bonke, enanzelela konke abakwenzayo.

16 Akulankosi esizwa yibukhulu bebutho layo; akulaqhawe eliphunyuka ngamandla alo amakhulu.

17 Yikuthemba ize ukuthi ibhiza lingakusindisa; loba lona lilamandla amakhulu ngeke lisindise.

18 Kodwa amehlo kaThixo akulabo abamesabayo, kulabo othemba labo lisethandweni lwakhe olungapheliyo,

19 ukubakhulula ekufeni baphiliswe lanxa kulendlala.

20 Simlindele uThixo ngokwethemba; ulusizo lwethu lesihlangu sethu.

21 Inhliziyo zethu zithokoza Ngaye, ngoba sithembe ebizweni lakhe elingcwele.

22 Sengathi uthando Lwakho olungaphuthiyo, Thixo, lungaba phezu kwethu njengalokhu sibeka ithemba lethu kuwe.