Amahubo 107

1 Mbongeni uThixo ngoba ulungile, uthando lwakhe lumi laphakade.

2 Akuthi abahlengiweyo bakaThixo batsho lokhu, labo abahlenga esandleni sesitha,

3 labo abaqoqa emazweni kusuka empumalanga kusiya entshonalanga, kusuka enyakatho laseningizimu.

4 Abanye bantula egwaduleni lwenkangala, baswela indlela eya emzini ababengahlala khona.

5 Balamba boma, impilo zabo zancipha.

6 Basebekhala kuThixo besekuhluphekeni kwabo, wasebakhulula osizini lwabo.

7 Wabahola ngendlela eqondileyo baya edolobheni lapho ababengahlala khona.

8 Ngakho kabambonge uThixo ngothando lwakhe olungaphuthiyo lezenzo zakhe ezimangalisayo azenzela abantu,

9 ngoba ubenza bakholwe abomileyo asuthise abalambileyo ngezinto ezinhle.

10 Abanye bahlala emnyameni lasethunzini elinzima beyizibotshwa ezihluphekayo zibotshwe ngamaketane ensimbi,

11 ngoba babewahlamukele amazwi kaNkulunkulu beyisa iseluleko soPhezukonke.

12 Ngakho wabathwalisa umsebenzi onzima; bawa kodwa kungekho ongabasiza.

13 Ngakho basebekhala kuThixo besekuhluphekeni kwabo wabasindisa osizini lwabo.

14 Wabakhupha emnyameni lethunzini elinzima waqamula amaketane abo.

15 Ngakho kabambonge uThixo ngothando lwakhe olungaphuthiyo lezenzo zakhe ezimangalisayo azenzela abantu,

16 ngoba uyawafohloza amasango ethusi ephule imigoqo yensimbi.

17 Abanye baba yiziwula ngenxa yezindlela zabo zokuhlamuka badliwa yizinhlupheko ngenxa yokuxhwala kwabo.

18 Benyanya konke ukudla balengela emasangweni okufa.

19 Bakhala kuThixo besekuhluphekeni kwabo, wabasindisa osizini lwabo.

20 Wathumela ilizwi lakhe labasilisa; wabahlenga engcwabeni.

21 Kabambonge uThixo ngothando lwakhe olungaphuthiyo lezenzo zakhe ezimangalisayo ebantwini.

22 Kabenze imihlatshelo yeminikelo yokubonga bafakaze ngezenzo zakhe zonke ngezingoma zokuthokoza.

23 Abanye bawela olwandle ngemikhumbi; babengabathengisi emanzini abanzi.

24 Bayibona imisebenzi kaThixo, izenzo zakhe ezimangalisayo ekujuleni.

25 Ngoba wakhuluma kwaqubuka isiphepho esasukumisa amagagasi aba laphaya.

26 Akhwela athinta emazulwini, ehla ayatshona ezinzikini; bekuleyongozi isibindi sabo samemetheka saphela.

27 Bazigxobagxoba badiyazela njengabantu abadakiweyo; baphelelwa lulwazi.

28 Basebekhala kuThixo besekuhluphekeni kwabo, wabakhupha esizini lwabo.

29 Wasethulisa isiphepho ngokunyenyeza; amagagasi olwandle aphola athi cwaka.

30 Bajabula bonke sekudedile, wabahola wabasa ethekwini ababelifuna.

31 Kabambonge uThixo ngothando lwakhe olungaphuthiyo lezenzo zakhe ezimangalisayo ebantwini.

32 Kabamphakamise emhlanganweni wabantu bamdumise enkundleni yabadala.

33 Waguqula imifula yaba yinkangala, imithombo egelezayo yaba ngumhlabathi owomileyo,

34 lomhlabathi olezithelo waba lugwadule oluletshwayi, ngenxa yobubi balabo ababehlala khona.

35 Waguqula inkangala yaba ngamachibi amanzi lomhlabathi owomileyo waba yimithombo egelezayo;

36 lapho waletha abalambileyo ukuba bahlale khona, khonapho basungula umuzi ababezahlala kuwo.

37 Bahlanyela amasimu, bagxumeka amavini athela isivuno esikhulu;

38 wababusisa banda baba banengi kakhulu, akaze ayekela imihlambi yabo inciphe.

39 Kwasekusithi ubunengi babo sebunciphile, bathotshiswa ngokuncindezelwa, ngokuhlupheka langosizi;

40 kwathi yena othela ihlazo ezikhulwini wabantulisa egwaduleni olungakhanyi mzila.

41 Kodwa abaswelayo wabakhupha ekuhluphekeni kwabo wandisa izimuli zabo njengemihlambi yezimvu.

42 Abaqotho bayabona bathokoze, kodwa bonke ababi bagcike imilomo yabo.

43 Lowo ohlakaniphileyo, kaqaphele lezizinto anakane ngothando olukhulu lukaThixo.