Amahubo 107
1 Mbongeni uThixo ngoba ulungile, uthando lwakhe lumi laphakade.
Ibongeni iNkosi, ngoba ilungile, ngoba umusa wayo umi kuze kube phakade.
2 Akuthi abahlengiweyo bakaThixo batsho lokhu, labo abahlenga esandleni sesitha,
Kabatsho njalo abahlengiweyo beNkosi ebahlengileyo esandleni sesitha.
3 labo abaqoqa emazweni kusuka empumalanga kusiya entshonalanga, kusuka enyakatho laseningizimu.
Yababutha bevela emazweni, empumalanga lentshonalanga, enyakatho lelwandle.
4 Abanye bantula egwaduleni lwenkangala, baswela indlela eya emzini ababengahlala khona.
Bazulazula enkangala endleleni yenhlane, kabatholanga umuzi wokuhlala.
5 Balamba boma, impilo zabo zancipha.
Belambile njalo bomile, umphefumulo wabo waphela amandla phakathi kwabo.
6 Basebekhala kuThixo besekuhluphekeni kwabo, wasebakhulula osizini lwabo.
Khona bakhala eNkosini ekuhluphekeni kwabo, yabakhulula ezinsizini zabo.
7 Wabahola ngendlela eqondileyo baya edolobheni lapho ababengahlala khona.
Yabakhokhela ngendlela eqondileyo, ukuze baye emzini wokuhlala.
8 Ngakho kabambonge uThixo ngothando lwakhe olungaphuthiyo lezenzo zakhe ezimangalisayo azenzela abantu,
Kabayidumise iNkosingomusa wayo langemisebenzi yayo emangalisayo ebantwaneni babantu!
9 ngoba ubenza bakholwe abomileyo asuthise abalambileyo ngezinto ezinhle.
Ngoba iyasuthisa umphefumulo olangathayo, lomphefumulo olambileyo iwugcwalisa ngokuhle.
10 Abanye bahlala emnyameni lasethunzini elinzima beyizibotshwa ezihluphekayo zibotshwe ngamaketane ensimbi,
Abahlala emnyameni lethunzini lokufa, bebotshiwe ensizini lensimbini,
11 ngoba babewahlamukele amazwi kaNkulunkulu beyisa iseluleko soPhezukonke.
ngoba bavukela amazwi kaNkulunkulu, badelela iseluleko soPhezukonke.
12 Ngakho wabathwalisa umsebenzi onzima; bawa kodwa kungekho ongabasiza.
Ngakho wathoba inhliziyo yabo ngokuhlupheka; bakhubeka, njalo kwakungekho umsizi.
13 Ngakho basebekhala kuThixo besekuhluphekeni kwabo wabasindisa osizini lwabo.
Khona bakhala eNkosini ekuhluphekeni kwabo, yabasindisa ezinsizini zabo.
14 Wabakhupha emnyameni lethunzini elinzima waqamula amaketane abo.
Yabakhupha emnyameni lethunzini lokufa, yaqamula izibopho zabo.
15 Ngakho kabambonge uThixo ngothando lwakhe olungaphuthiyo lezenzo zakhe ezimangalisayo azenzela abantu,
Kabayidumise iNkosingomusa wayo, langemisebenzi yayo emangalisayo ebantwaneni babantu!
16 ngoba uyawafohloza amasango ethusi ephule imigoqo yensimbi.
Ngoba yephule izivalo zethusi, yaquma imigoqo yensimbi.
17 Abanye baba yiziwula ngenxa yezindlela zabo zokuhlamuka badliwa yizinhlupheko ngenxa yokuxhwala kwabo.
Abayizithutha, ngenxa yendlela yeziphambeko zabo langenxa yezono zabo, bahlutshiwe.
18 Benyanya konke ukudla balengela emasangweni okufa.
Umphefumulo wabo wenyanya ukudla konke, basondela emasangweni okufa.
19 Bakhala kuThixo besekuhluphekeni kwabo, wabasindisa osizini lwabo.
Khona bakhala eNkosini ekuhluphekeni kwabo, yabasindisa ezinsizini zabo.
20 Wathumela ilizwi lakhe labasilisa; wabahlenga engcwabeni.
Yathumela ilizwi layo, yabasilisa, yabakhulula emigodini yabo.
21 Kabambonge uThixo ngothando lwakhe olungaphuthiyo lezenzo zakhe ezimangalisayo ebantwini.
Kabayidumise iNkosingomusa wayo, langemisebenzi yayo emangalisayo ebantwaneni babantu!
22 Kabenze imihlatshelo yeminikelo yokubonga bafakaze ngezenzo zakhe zonke ngezingoma zokuthokoza.
Njalo kabahlabe imihlatshelo yokubonga, balandise izenzo zayo ngokuthaba.
23 Abanye bawela olwandle ngemikhumbi; babengabathengisi emanzini abanzi.
Abehlela olwandle ngemikhumbi, abenza imisebenzi emanzini amakhulu;
24 Bayibona imisebenzi kaThixo, izenzo zakhe ezimangalisayo ekujuleni.
laba babona izenzo zeNkosi, lemisebenzi yayo emangalisayo ekujuleni.
25 Ngoba wakhuluma kwaqubuka isiphepho esasukumisa amagagasi aba laphaya.
Ngoba iyakhuluma, ivuse isiphepho somoya, esiqubula amagagasi alo.
26 Akhwela athinta emazulwini, ehla ayatshona ezinzikini; bekuleyongozi isibindi sabo samemetheka saphela.
Benyukela emazulwini, behlele enzikini; umphefumulo wabo uncibilika ngosizi.
27 Bazigxobagxoba badiyazela njengabantu abadakiweyo; baphelelwa lulwazi.
Bayadengezela bebhadazela njengesidakwa, lenhlakanipho yabo yonke iginyiwe.
28 Basebekhala kuThixo besekuhluphekeni kwabo, wabakhupha esizini lwabo.
Khona bakhala eNkosini ekuhluphekeni kwabo, yabakhupha ezinsizini zabo.
29 Wasethulisa isiphepho ngokunyenyeza; amagagasi olwandle aphola athi cwaka.
Yenza isiphepho sachuma, lamagagasi aso athula.
30 Bajabula bonke sekudedile, wabahola wabasa ethekwini ababelifuna.
Basebethokoza ngoba ayesethule, yasibaholela ethekwini lesifiso sabo.
31 Kabambonge uThixo ngothando lwakhe olungaphuthiyo lezenzo zakhe ezimangalisayo ebantwini.
Kabayibonge iNkosingomusa wayo, langemisebenzi yayo emangalisayo ebantwaneni babantu!
32 Kabamphakamise emhlanganweni wabantu bamdumise enkundleni yabadala.
Njalo kabayiphakamise ebandleni labantu, bayidumise esihlalweni sabadala!
33 Waguqula imifula yaba yinkangala, imithombo egelezayo yaba ngumhlabathi owomileyo,
Yenza imifula ibe yinkangala, lemithombo yamanzi ibe ngumhlabathi owomileyo,
34 lomhlabathi olezithelo waba lugwadule oluletshwayi, ngenxa yobubi balabo ababehlala khona.
umhlabathi ovundileyo ube lugwadule, ngenxa yobubi babahlezi kuwo.
35 Waguqula inkangala yaba ngamachibi amanzi lomhlabathi owomileyo waba yimithombo egelezayo;
Iphendula inkangala ibe yisiziba samanzi, lelizwe elomileyo libe yimithombo yamanzi.
36 lapho waletha abalambileyo ukuba bahlale khona, khonapho basungula umuzi ababezahlala kuwo.
Ihlalise khona abalambileyo, njalo bamise umuzi wokuhlala;
37 Bahlanyela amasimu, bagxumeka amavini athela isivuno esikhulu;
bahlanyele amasimu, bagxumeke izivini, ezithela izithelo zesivuno.
38 wababusisa banda baba banengi kakhulu, akaze ayekela imihlambi yabo inciphe.
Njalo iyababusisa ukuze bande kakhulu, lezifuyo zabo kayizinciphisi.
39 Kwasekusithi ubunengi babo sebunciphile, bathotshiswa ngokuncindezelwa, ngokuhlupheka langosizi;
Babuye banciphe, bathotshiswe ngocindezelo, ububi, losizi.
40 kwathi yena othela ihlazo ezikhulwini wabantulisa egwaduleni olungakhanyi mzila.
Ithela ukudelelwa phezu kweziphathamandla, ibazulisa enkangala, engelandlela.
41 Kodwa abaswelayo wabakhupha ekuhluphekeni kwabo wandisa izimuli zabo njengemihlambi yezimvu.
Kube kanti ihlalisa phezulu umyanga ekuhluphekeni, enze insapho zibe njengomhlambi.
42 Abaqotho bayabona bathokoze, kodwa bonke ababi bagcike imilomo yabo.
Abalungileyo bazabona bathokoze, lobubi bonke buzavala umlomo wabo.
43 Lowo ohlakaniphileyo, kaqaphele lezizinto anakane ngothando olukhulu lukaThixo.
Loba ngubani ohlakaniphileyo uzaqaphelisa lezizinto; labo bazaqedisisa izisa zeNkosi.
