Izaga 24

1 Ungabahawukeli abantu abaxhwalileyo, ungafisi ubungane labo;

2 ngoba ezingqondweni zabo bahlose udlakela, lezindebe zabo zikhuluma ngokuvusa umsindo.

3 Indlu yakhiwa ngokuhlakanipha, imiswe ngokuzwisisa;

4 amakamelo ayo agcwaliswe ngolwazi, agcwaliswe ngemiceciso yakude eligugu.

5 Umuntu ohlakaniphileyo ulamandla amakhulu, njalo umuntu ololwazi uyandisa amandla;

6 ukuthi unqobe empini kufunakala izeluleko, lokunqoba kudinga abeluleki abanengi.

7 Ukuhlakanipha kuphakeme kakhulu koyisiwula; enkundleni kalalutho angalukhuluma.

8 Lowo oceba ububi uzakwaziwa njengomacebomabi.

9 Amacebo obuwula ayisono, njalo abantu bayasizonda isideleli.

10 Nxa uthikaza ngezikhathi zenhlupheko, mancinyane kanganani amandla akho!

11 Bahlangule labo abaholelwa ekufeni; banqande labo abadayizela besiya ekubulaweni.

12 Nxa usithi, “Angithi besingazi lutho ngalokhu,” kambe lowo ohlola inhliziyo kakuboni lokho na? Kakwazi lokho yini onguye olinda ukuphila kwakho na? Akayikuvuza ubani lobani ngakwenzileyo na?

13 Dlana uluju ndodana yami, ngoba lulungile; uluju olujuluka ekhekhebeni lumnandi luyanambitheka.

14 Yazi njalo ukuthi ukuhlakanipha kumnandi emphefumulweni wakho, aluba ukuzuza ikusasa lakho lilethemba elihle, njalo ithemba lakho aliyikudaniswa.

15 Ungacathameli indlu yomuntu olungileyo njengesigebenga, ungawuhlaseli umuzi wakhe;

16 ngoba loba angaze awe kasikhombisa umuntu olungileyo uyavuka futhi, kodwa ababi babhazalaliswa yizinhlupheko.

17 Ungathatshiswa yikuwa kwesitha sakho; nxa sikhubeka ungavumeli inhliziyo yakho ithokoze,

18 ngoba uThixo uzakubona lokho asole abesepholisa ulaka lwakhe kuso isitha.

19 Ungazikhathazi ngenxa yabantu ababi loba ubahawukele abaxhwalileyo,

20 ngoba umuntu omubi akalalo ithemba lakusasa, njalo isibane sezixhwali sizacinywa.

21 Yesaba uThixo lombusi, ndodana yami, ungangenelani labahlamuki,

22 ngoba laba bobabili bazakwehlisa ulaka lubabhubhise, ngoba phela ngubani kambe okwaziyo ukubhubhisa abangakwehlisa?

23 La ngamanye amazwi ezihlakaniphi: Ukwahlulela ngobandlululo kakulunganga:

24 Loba ngubani othi kolecala, “Umsulwa,” abantu bonke bazamqalekisa lezizwe zonke zizamhlamukela.

25 Kodwa kuzabalungela labo abamlahlayo olecala, lezibusiso ezinengi zizabehlela.

26 Impendulo eqotho injengokwangiwa ezindebeni.

27 Qeda umsebenzi wakho waphandle ulungise lamasimu akho; kuthi-ke usuqedile wakhe indlu yakho.

28 Ungafakazi ngokubethela umakhelwane kungelamlandu, kumbe usebenzise izindebe zakho ukhohlisa.

29 Ungabokuthi, “Ngizakwenza kuye njengoba enze kimi; ngizahlawulisa ngalokho angenze khona.”

30 Ngedlula ensimini yevilavoxo, ngedlula esivinini somuntu ongelangqondo;

31 ameva ayesekhula indawo yonke, indawo yonke isithe phethu ukhula, lomduli wamatshe usudilikile.

32 Ngakunanzelela konke engangikubona ngafunda isifundo kulokho engakubonayo:

33 Ukulala okuncane, ukuwozela okuncane, ukugoqa izandla kancane uphumula,

34 ubuyanga buzafika kuwe njengesela lokuswela njengesigebenga.