Izaga 2

1 Ndodana yami, nxa usamukela amazwi ami ugcine imilayo yami ngaphakathi kwakho,

2 uvule indlebe yakho izwe ukuhlakanipha unikele inhliziyo yakho ukuthi izwisise,

3 njalo nxa ucela ukuqedisisa ukhalela kakhulu ukuzwisisa,

4 futhi ukudingisisa njengokudinga isiliva ukuphenye njengento eligugu efihliweyo,

5 lapho-ke uzakuzwisisa ukumesaba uThixo njalo uluzuze ulwazi lukaNkulunkulu.

6 Ngoba uThixo uyapha ukuhlakanipha, emlonyeni wakhe kuphuma ulwazi lokuqedisisa.

7 Abaqotho ubapha ukunqoba, ulihawu lalabo abahamba bengasoleki,

8 ngoba uyayilinda indlela yabalungileyo avikele ukuhamba kwabathembekileyo bakhe.

9 Yikho uzazwisisa lokho okulungileyo lokuqondileyo lokufaneleyo zonke izindlela ezinhle.

10 Ngoba ukuhlakanipha kuzangena enhliziyweni yakho, lolwazi lube mnandi emphefumulweni wakho.

11 Ukwazi ukukhetha kuzakuvikela, lokuzwisisa kuzakulinda.

12 Ukuhlakanipha kuzakusindisa ezindleleni zabantu ababi, abantu abamazwi abolileyo,

13 abatshiya izindlela eziqondileyo, bahambe ngezindlela ezilamathunzi,

14 abathokoza ngokwenza okubi bajabule ngokungcola kokubi,

15 abandlela zabo zitshekile lokuhamba kwabo kakuqondakali.

16 Kuzakukhulula njalo koyisiphingikazi, lasemfazini olamazwi akhohlisayo,

17 osetshiye indoda yakhe yobutsha bakhe wadela isifungo asenza phambi kukaNkulunkulu.

18 Ngoba indlu yakhe iholela ekufeni lezindlela zakhe zidonsela kwabafileyo.

19 Kakho ongena kuye obuyayo kumbe aphinde azuze izindlela zokuphila.

20 Ngakho uzahamba ezindleleni zabantu abalungileyo walele emikhondweni yabaqondileyo.

21 Ngoba abaqotho bazahlala elizweni, labangasolekiyo bazasala kulo;

22 kodwa izigangi zizasuswa elizweni, labangathembekanga bazakhutshwa kulo.