Izaga 2
1 Ndodana yami, nxa usamukela amazwi ami ugcine imilayo yami ngaphakathi kwakho,
Ndodana yami, uba usemukela amazwi ami, ugcine kuwe imilayo yami,
2 uvule indlebe yakho izwe ukuhlakanipha unikele inhliziyo yakho ukuthi izwisise,
ukuthi wenze indlebe yakho ilalele inhlakanipho, uthobise inhliziyo yakho ekuqedisiseni,
3 njalo nxa ucela ukuqedisisa ukhalela kakhulu ukuzwisisa,
yebo, uba ukhalela ukuqedisisa, ukhuphele ilizwi lakho ekuzwisiseni,
4 futhi ukudingisisa njengokudinga isiliva ukuphenye njengento eligugu efihliweyo,
uba ukudinga njengesiliva, ukuphenye njengezimpahla eziligugu ezifihliweyo,
5 lapho-ke uzakuzwisisa ukumesaba uThixo njalo uluzuze ulwazi lukaNkulunkulu.
khona uzaqedisisa ukuyesaba iNkosi, uthole ulwazi lukaNkulunkulu.
6 Ngoba uThixo uyapha ukuhlakanipha, emlonyeni wakhe kuphuma ulwazi lokuqedisisa.
Ngoba iNkosi inika inhlakanipho; ulwazi lokuqedisisa kuvela emlonyeni wayo.
7 Abaqotho ubapha ukunqoba, ulihawu lalabo abahamba bengasoleki,
Iyababekela abaqotho inhlakanipho eqotho; iyisihlangu kubo abahamba ngokuqonda,
8 ngoba uyayilinda indlela yabalungileyo avikele ukuhamba kwabathembekileyo bakhe.
ukugcina indlela zesahlulelo; izalondoloza indlela zabangcwele bayo.
9 Yikho uzazwisisa lokho okulungileyo lokuqondileyo lokufaneleyo zonke izindlela ezinhle.
Khona uzaqedisisa ukulunga, lesahlulelo, lokuqonda; yonke indlela elungileyo.
10 Ngoba ukuhlakanipha kuzangena enhliziyweni yakho, lolwazi lube mnandi emphefumulweni wakho.
Lapho inhlakanipho izangena enhliziyweni yakho, lolwazi lube mnandi emphefumulweni wakho;
11 Ukwazi ukukhetha kuzakuvikela, lokuzwisisa kuzakulinda.
ingqondo izakugcina, ukuqedisisa kukulondoloze;
12 Ukuhlakanipha kuzakusindisa ezindleleni zabantu ababi, abantu abamazwi abolileyo,
ukukophula endleleni embi, emuntwini okhuluma izinto eziphambeneyo;
13 abatshiya izindlela eziqondileyo, bahambe ngezindlela ezilamathunzi,
abatshiya indlela zobuqotho, ukuze bahambe ngendlela zobumnyama;
14 abathokoza ngokwenza okubi bajabule ngokungcola kokubi,
abathokoza ngokwenza okubi, bejabula ekuphambukeni komubi;
15 abandlela zabo zitshekile lokuhamba kwabo kakuqondakali.
abandlela zabo ziphambene, begobile emikhondweni yabo;
16 Kuzakukhulula njalo koyisiphingikazi, lasemfazini olamazwi akhohlisayo,
ukukophula kowesifazana wemzini, kowezizwe okhohlisa ngamazwi akhe;
17 osetshiye indoda yakhe yobutsha bakhe wadela isifungo asenza phambi kukaNkulunkulu.
otshiya umngane wobutsha bakhe, ekhohlwa isivumelwano sikaNkulunkulu wakhe;
18 Ngoba indlu yakhe iholela ekufeni lezindlela zakhe zidonsela kwabafileyo.
ngoba indlu yakhe itshonela ekufeni, lemikhondo yakhe emimoyeni efileyo.
19 Kakho ongena kuye obuyayo kumbe aphinde azuze izindlela zokuphila.
Bonke abangena kuye kabayikubuya, njalo kabayikufinyelela endleleni zempilo.
20 Ngakho uzahamba ezindleleni zabantu abalungileyo walele emikhondweni yabaqondileyo.
Ukuze uhambe endleleni yabalungileyo, ugcine imikhondo yamalungisa.
21 Ngoba abaqotho bazahlala elizweni, labangasolekiyo bazasala kulo;
Ngoba abaqotho bazahlala elizweni, labapheleleyo basale kulo;
22 kodwa izigangi zizasuswa elizweni, labangathembekanga bazakhutshwa kulo.
kodwa abakhohlakeleyo bazaqunywa basuswe elizweni, labaphambekayo badatshulwe basuswe kulo.
