Izaga 18

1 Umuntu ongelamusa uzifunela okwakhe; uyazilahla zonke iziqondiso ezinhle.

2 Isiwula kasikuthakazeleli ukuzwisisa kodwa sithokoza ngokutsho eyaso imibono.

3 Nxa kufika ububi kufika lokweyisa, njalo ihlazo liza lokudumazeka.

4 Amazwi omlomo womuntu ayinziki yamanzi, kodwa umthombo wokuhlakanipha ngumfudlana ontuntuzayo.

5 Kakukuhle ukulungisela ababi loba ukungehluleli kuhle abangelacala.

6 Izindebe zesiwula zisilethela ingxabano, lomlomo waso unxusa ukutshaywa.

7 Umlomo wesiwula yiwo osidilizayo, lezindebe zaso zingumjibila womphefumulo waso.

8 Amazwi omuntu onyeyayo anjengezibiliboco; angena ekujuleni kwenhliziyo yomuntu.

9 Lowo ovilaphayo emsebenzini wakhe ungumfowabo walowo odilizayo.

10 Ibizo likaThixo liyinqaba eqinileyo; abalungileyo babalekela kulo baphephe.

11 Inotho yezikhulu ingumuzi wazo ovikelweyo; zicabanga ukuthi imiduli yawo ayikhweleki.

12 Umuntu uyazikhukhumeza ngenhliziyo yakhe, mandulo kokuba awe, ikanti ukuzithoba kwandulela udumo.

13 Lowo ophendulayo engaqali alalele lobo yibuwula bakhe lehlazo lakhe.

14 Umphefumulo womuntu uyamqinisa nxa egula, kodwa ngubani ongaphila elomoya owephukileyo na?

15 Inhliziyo yabaqedisisayo izuza ulwazi; indlebe zabahlakaniphileyo ziyakudinga.

16 Isipho siyamvulela indlela ophayo azuze ithuba lokubonana labakhulu.

17 Ecaleni okhuluma kuqala ubonakala enguye olungileyo, kuze kuqhamuke omunye ambuzisise.

18 Ukwenza inkatho kuyakuqeda ukulwisana, kubehlukanise abaxabanayo.

19 Umzalwane owonelweyo uba lukhuni kulomuzi ohonqolozelweyo, lezingxabano zinjengamasango enqaba avaliweyo.

20 Isisu somuntu sigcwaliswa yizithelo zomlomo wakhe; usuthiswa yisivuno sezindebe zakhe.

21 Ulimi lulamandla okuphila lokufa, njalo labo abaluthandayo bazakudla izithelo zalo.

22 Lowo ozuza umfazi ufumana okuhle, athole umusa kuThixo.

23 Umyanga uyancenga ukuthi axolelwe, kodwa isinothi siphendula ngolaka.

24 Umuntu olabangane abanengi ucina kubi, kodwa kuba khona umngane othembeka okudlula umfowenu.