UJobe 13

1 “Amehlo ami asekubonile konke lokhu, indlebe zami zikuzwile zakuqedisisa lokhu.

2 Elikwaziyo lina lami ngiyakwazi; kalingcono ngalutho kulami.

3 Kodwa ngiloyisa ukukhuluma loSomandla, ngiphikisane loNkulunkulu ngendaba yami.

4 Kodwa lina lingigcona ngamanga; lonke lizinyanga ezingelamsebenzi!

5 Thulani lithi zwi lonke! Lokho kungaba yikuhlakanipha kini.

6 Zwanini-ke manje engikutshoyo; lalelani ukuncenga kwezindebe zami.

7 Lingakhuluma okubi limele uNkulunkulu na? Lingamkhulumela inkohliso na?

8 Limtshengisa ukuthi liyabandlulula yini? Yini elimkhulumelayo uNkulunkulu akutshoyo?

9 Kungalilungela yini nxa engalihlola? Kambe lingamkhohlisa njengoba lingakhohlisa abantu na?

10 Ngempela angaligcona nxa lingabe litshengisa ukubandlulula.

11 Inkazimulo yakhe ingezake ilethuse na? Ukwesabeka kwakhe kungezake kulehlele na?

12 Izitsho zenu ziyizaga zomlotha; lezivikelo zenu yizivikelo zebumba kuphela.

13 Thulani ngikhulume mina; kungivelele loba kuyini okuvelayo.

14 Ngizifakelani engozini na ngiphathe impilo yami ezandleni zami?

15 Lanxa engangibulala kodwa ngizakwala ngimethemba; ngizazivikela izindlela zami phambi kwakhe.

16 Ngeqiniso lokhu kuzangihlenga, ngoba kakho umuntu ongakholwayo ongasondela kuye!

17 Ake lilalele kuhle amazwi ami; vulani indlebe zenu lizwe engikutshoyo.

18 Manje-ke njengoba sengiyilungisile indaba yami, ngiyabona ukuthi ngizakhululwa.

19 Ngubani kambe ongangethesa icala? Nxa ekhona, ngizathula ngife.

20 Akungiphe lezizinto ezimbili nje, Oh Nkulunkulu, lapho-ke angiyikukucatshela:

21 Sisusele khatshana lami isandla sakho, ukhawule ukungethusa ngokwesabeka kwakho.

22 Ubusungibizela ecaleni, ngizaphendula, kumbe ungiyekele ngikhulume, lawe uphendule.

23 Sengenze iziphambeko lezono ezinganani na? Ngitshengisa isiphambeko sami lesono sami.

24 Kungani ufihla ubuso bakho ungithathe njengesitha sakho?

25 Uzahluphana lehlamvu eliphetshulwa ngumoya na? Uzaxotshana lomule owomileyo na?

26 Ngoba ubhala izinto ezibuhlungu ngami ungenze ngivune izono zobutsha bami.

27 Ukhina inyawo zami ngezibopho; ulandelela zonke izindlela zami ngokudweba uphawu ezinyathelweni zezinyawo zami.

28 Yikho-ke umuntu ecikizeka njengento ebolileyo, njengesigqoko esidliwe yinondo.”