UJobe 12

1 Wasephendula uJobe wathi:

2 “Wo, lina yini elizibona kuyini abantu, njalo lolwazi luzakufa lani!

3 Kodwa lami ngilayo ingqondo njengani; kalingedluli ngalutho. Ngubani ongazaziyo izinto zonke lezi?

4 Sengiyinto yokuhlekisa ebanganini bami, lanxa ngacela kuNkulunkulu waphendula, inhlekisa sibili, kodwa ngilungile, ngimsulwa!

5 Abantu abahlezi kuhle bayakweyisa ukwehlelwa ngumnyama, bathi kuyimfanelo yalabo onyawo zabo sezitshelela.

6 Amathente ezigebenga avikelekile, lalabo abamthukuthelisayo uNkulunkulu bavikelekile, uNkulunkulu ulabo ezandleni zakhe.

7 Kodwa ake ubuze izinyamazana, zizakufundisa, kumbe izinyoni zemoyeni, zizakutshela;

8 kumbe khuluma lomhlaba, uzakufundisa, loba uthi inhlanzi zolwandle zikwazise.

9 Yikuphi kwalezizinto okungaziyo na ukuthi yisandla sikaThixo esikwenzileyo lokhu?

10 Esandleni sakhe kulempilo yazo zonke izidalwa lokuphefumula kwabantu bonke.

11 Indlebe kayiwahloli yini wonke amazwi njengolimi lunambitha ukudla?

12 Angithi ukuhlakanipha kufunyanwa ebadaleni na? Angithi impilo ende iletha ukuzwisisa na?

13 NgokukaNkulunkulu ukuhlakanipha lamandla; ukweluleka lokuzwisisa kungokwakhe.

14 Lokho akubhidlizayo kungeke kwamiswa njalo; lowo amvalelayo ngeke avulelwe.

15 Angaze awavale amanzi, kuba lokoma; angawavulela kuba lomonakalo elizweni.

16 Angawakhe amandla lenhlakanipho; okhohliswayo lomkhohlisi ngabakhe bonke.

17 Abeluleki uyabakhupha bahambe beze enze abehluleli babe yiziphukuphuku.

18 Uyanyomula izibopho ezibotshwe ngamakhosi azibophe ngelembu ekhalweni.

19 Abaphristi uyabakhupha beze awagenqule amadoda abesithi asegxilile.

20 Uyazithulisa izindebe zabeluleki abathenjiweyo asuse ulwazi lwabadala.

21 Izikhulu uzihleka usulu abalamandla abathathele lawomandla.

22 Uyembula imfihlo ezenzeka emnyameni amathunzi azikileyo awalethe ekukhanyeni.

23 Wenza izizwe zikhule, abesezidiliza; uyaziqhelisa izizwe, aphinde azichithe.

24 Abakhokheli basemhlabeni ubemuka ukuhlakanipha kwabo; ubenza bantule enkangala.

25 Bayaphumputha emnyameni kungelakukhanya; ubenza badiyazele njengezidakwa.”