< U-Ezra 2 >
1 Manje-ke yilaba abantu bendawo ababuyayo ekuthunjweni, ababethunjiwe nguNebhukhadineza inkosi yaseBhabhiloni yabasa eBhabhiloni (babuyela eJerusalema lakoJuda, ngulowo emzini wakibo,
2 behamba loZerubhabheli, loJeshuwa, loNehemiya, loSeraya, loRelayiya, loModekhayi, loBhilishani, loMisipha, loBhigivayi, loRehumi loBhana): Uluhlu lwamadoda ako-Israyeli:
3 isizukulwane sikaPharoshi sasizinkulungwane ezimbili lekhulu elilamatshumi ayisikhombisa lambili,
4 esikaShefathiya sasingamakhulu amathathu lamatshumi ayisikhombisa lambili,
5 esika-Ara sasingamakhulu ayisikhombisa lamatshumi ayisikhombisa lanhlanu,
6 esikaPhahathi-Mowabi (ngosendo lukaJeshuwa loJowabi) sasizinkulungwane ezimbili lamakhulu ayisificaminwembili letshumi lambili,
7 esika-Elamu sasiyinkulungwane elamakhulu amabili lamatshumi amahlanu lane,
8 esikaZathu sasingamakhulu ayisificamunwemunye lamatshumi amane lanhlanu,
9 esikaZakhayi sasingamakhulu ayisikhombisa lamatshumi ayisithupha,
10 esikaBhani sasingamakhulu ayisithupha lamatshumi amane lambili,
11 esikaBhebhayi sasingamakhulu ayisithupha lamatshumi amabili lantathu,
12 esika-Azigadi sasiyinkulungwane elamakhulu amabili lamatshumi amabili lambili,
13 esika-Adonikhamu sasingamakhulu ayisithupha lamatshumi ayisithupha lasithupha,
14 esikaBhigivayi sasizinkulungwane ezimbili lamatshumi amahlanu lasithupha,
15 esika-Adini sasingamakhulu amane lamatshumi amahlanu lane,
16 esika-Atheri (ngoHezekhiya) sasingamatshumi ayisificamunwemunye lasificaminwembili,
17 esikaBhezayi sasingamakhulu amathathu lamatshumi amabili lantathu,
18 esikaJora sasilikhulu letshumi lambili,
19 esikaHashumi sasingamakhulu amabili lamatshumi amabili lantathu,
20 esikaGibhari sasingamatshumi ayisificamunwemunye lanhlanu,
21 amadoda eBhethilehema ayengamakhulu amabili lantathu,
22 eNethofa ayengamatshumi amahlanu lasithupha,
23 e-Anathothi ayelikhulu lamatshumi amabili lasificaminwembili,
24 e-Azimavethi ayengamatshumi amane lambili,
25 eKhiriyathi-Jeyarimi, eKhefira leBherothi ayengamakhulu ayisikhombisa lamatshumi amane lantathu,
26 eRama leGebha ayengamakhulu ayisithupha lamatshumi amabili lanye,
27 eMikhimashi ayelikhulu lamatshumi amabili lambili,
28 eBhetheli le-Ayi ayengamakhulu amabili lamatshumi amabili lantathu,
29 eNebho ayengamatshumi amahlanu lambili,
30 eMagibhishi ayelikhulu lamatshumi amahlanu lasithupha,
31 kweyinye i-Elamu ayeyinkulungwane elamakhulu amabili lamatshumi amahlanu lane,
32 eHarimi ayengamakhulu amathathu lamatshumi amabili,
33 eLodi, eHadidi le-Ono ayengamakhulu ayisikhombisa lamatshumi amabili lanhlanu,
34 eJerikho ayengamakhulu amathathu lamatshumi amane lanhlanu,
35 eSenaya ayezinkulungwane ezintathu lamakhulu ayisithupha lamatshumi amathathu.
36 Abaphristi: esizukulwaneni sikaJedaya (ngosendo lukaJeshuwa) babengamakhulu ayisificamunwemunye lamatshumi ayisikhombisa lantathu,
37 kwesika-Imeri babeyinkulungwane lamatshumi amahlanu lambili,
38 kwesikaPhashuri babeyinkulungwane elamakhulu amabili lamatshumi amane lasikhombisa,
39 kwesikaHarimi babeyinkulungwane letshumi lasikhombisa.
40 AbaLevi: besizukulwane sikaJeshuwa loKhadimiyeli (abosendo lukaHodaviya) babengamatshumi ayisikhombisa lane.
41 Abahlabeleli: besizukulwane sika-Asafi babelikhulu lamatshumi amabili lasificaminwembili.
42 Abalindi bamasango: besizukulwane sikaShalumi, lo-Atheri, loThalimoni, lo-Akhubi, loHathitha loShobhayi babelikhulu lamatshumi amathathu lasificamunwemunye.
43 Izinceku zethempelini: zesizukulwane sikaZiha, loHasufa, loThabhawothi,
44 loKherosi, loSiyaha, loPhadoni,
45 loLebhana, loHagabha, lo-Akhubi,
46 loHagabi, loShalimayi, loHanani,
47 loGideli, loGahari, loReyaya,
48 loRezini, loNekhoda, loGazami,
49 lo-Uza, loPhaseya, loBhesayi,
50 lo-Asina, loMewunimi, loNefusimi,
51 loBhakibhuki, loHakufa, loHahuri,
52 loBhaziluthi, loMehida, loHasha,
53 loBhakhosi, loSisera, loThema,
54 loNeziya kanye loHathifa.
55 Izizukulwane zezinceku zikaSolomoni: isizukulwane sikaSothayi, loHasoferethi, loPheruda,
56 loJala, loDakhoni, loGideli,
57 loShefathiya, loHathili, loPhokherethi-Hazebhayimi kanye lo-Ami.
58 Izinceku zethempelini lezizukulwane zezinceku zikaSolomoni zazingamakhulu amathathu lamatshumi ayisificamunwemunye lambili.
59 Abalandelayo laba bavela emadolobheni aseTheli Mela, eTheli Hasha, eKherubi, e-Adani, lase-Imeri, kodwa behluleka ukuveza ukuthi usendo lwabo lwaphuma ko-Israyeli:
60 abesizukulwane sikaDelaya, loThobhiya loNekhoda babengamakhulu ayisithupha lamatshumi amahlanu lambili.
61 Ababephuma kubaphristi kwakuyilaba: Abesizukulwane sikaHobhaya, esikaHakhozi lesikaBhazilayi (indoda eyayithethe indodakazi kaBhazilayi umGiliyadi layo yayibizwa ngalelobizo).
62 Laba baphenya imibhalo yembali yezimuli zabo, kodwa bayiswela ngakho basuswa ebuphristini kwathiwa bangcolile.
63 Umbusi wabalaya ukuthi bangakudli loba yikuphi ukudla okungcwele kuze kube lomphristi wokubuza inkatho i-Urimi leThumimi.
64 Ixuku lonke lalilinani elifika izinkulungwane ezingamatshumi amane lambili, lamakhulu amathathu alamatshumi ayisithupha,
65 ngaphandle kwezinceku lezincekukazi zabo ezizinkulungwane eziyisikhombisa lamakhulu amathathu alamatshumi amathathu lasikhombisa; njalo babe labahlabeleli besilisa labesifazane abangamakhulu amabili.
66 Babelamabhiza angamakhulu ayisikhombisa lamatshumi amathathu lasithupha, lezimbongolo ezingamakhulu amabili lamatshumi amahlanu lanhlanu,
67 lamakamela angamakhulu amane lamatshumi amathathu lanhlanu kanye labobabhemi abazinkulungwane eziyisithupha ezilamakhulu ayisikhombisa lamatshumi amabili.
68 Bathi ukufika kwabo endlini kaThixo eJerusalema abanye bezinhloko zezimuli benza umnikelo wokuzizwela waba ngowokwakha indlu kaNkulunkulu endaweni yayo.
69 Banikela esikhwameni esikhulu ngokwamandla abo ukwenza umsebenzi lo banika amadrakhima azinkulungwane ezingamatshumi ayisithupha lanye egolide lesiliva esifika izinkulungwane ezinhlanu samamina lezembatho zobuphristi ezilikhulu.
70 Abaphristi, labaLevi, labahlabeleli, labalindi bamasango kanye lezinceku zethempelini bahlala emadolobheni akibo, ndawonye labanye abantu, labo bonke abako-Israyeli bahlala emadolobheni akibo.
