Salamo 37

1 Ko embetse amo tsivokatseo, vaho ko tsikirihe’o o mpanao ratio,

2 F’ie hiforejeje aniany hoe ahetse, vaho hiheatse hoe rongo-maindoñe.

3 Miatoa am’ Iehovà, le anò ty soa; imoneño i taney vaho rañeto ty figahiñañe.

4 Mifalea am’ Iehovà; le hatolo’e azo ty fisalalàn’ arofo’o.

5 Ampiatò am’ Iehovà ty fombà’o, Atokiso, vaho ie ty hitoloñe.

6 Le hampionjone’e hoe hazavàñe ty havantaña’o, vaho hoe an-tsipinde-mena ty havañona’o.

7 Manintsiña am’ Iehovà naho mahaliñisa; ko ihobira’o ty miraorao an-tsata’e, t’indaty mitoloñ’ am-pikitrohan-dratio.

8 Fario o habosehañeo, naho apoho ty fombo; ko embetse kera hañosi-karatiañe.

9 Toe haitoañe o tsy vokatseo, fa handova i taney ze mitamà Iehovà.

10 Aniany le tsy ho eo i lo-tserekey, ho tsoehe’o i akiba’ey f’ie tsy ho trea.

11 Toe handova i Taney o tretram-poo, hifale am-piraoraoañe vokatse.

12 Kililie’ i lo-tsereke ty vantañe, vaho ampikodrita’e nife.

13 Iankahafa’ i Talè, fa arofoana’e te an-­titotse ty andro’e.

14 Fa napontsoa’ o tsivokatseo ty fibara, vaho nampibitsoke fale hametsaha’e ambane o rarakeo naho o misotrio, hañohofa’e loza amo an-dala mahitio.

15 Hitrofaha’ i fibaray ty tro’ iareo, vaho ho pekañeñe ty fale’ iareo.

16 Hamake ty ­kedekedek’ anaña’ ty vantañe ta ty havokara’ o tsivokatse maroo.

17 Toe ho pozaheñe ty sira’ o lo-tserekeo, fe tohaña’ Iehovà o vañoñeo.

18 Arofoana’ Iehovà ty andro’ o vantañeo, tsy ho modo kitro añ’afe’e ty lova’iareo;

19 Tsy ho salatse an-tsan-karatiañe; le ho anjañe an-tsam-paosa.

20 Hikoromake o tsy vokatseo, le hanahake ty safon’ añondry o rafelahi’ Iehovào, ie himosaoñe an-katòeñe, toe himiañe.

21 Misongo i tsivokatsey fe tsy mañavake; matarike i vantañey vaho mañomey.

22 Toe handova i taney o tahie’eo, fe haitoañe añe o afà’eo.

23 Ampijadoña’ Iehovà ty lia’ ondaty, ie no’e i lala’ey.

24 Ndra t’ie mikorovoke tsy hidaboñe, fa tohaña’ Iehovà am-pitàñe.

25 Nitora’e iraho, fa antetse henaneo, mboe liako tsy nahatrea te naforintseñe o vañoñeo, te nangata-kaneñe o keleia’eo.

26 Matarike lomoñandro re naho mampisongo, vaho vokatse o tiri’eo.

27 Ihankaño ty raty, le anò ty soa, vaho himoneñe kitro añ’afe’e.

28 Tea’ Iehovà ty hatò, le tsy ho farie’e o mpañorike i Ha’eio; soa-fipalitse nainai’e iereo; fe haitoañe ty tiri’ o lo-tserekeo.

29 Handova i taney o vañoñeo, vaho himoneñe nainai’e.

30 Mañaka-kihitse ty falie’ o vantañeo, manao saontsi-to i famele’ey.

31 Añ’arofo’e ao ty Hàn’Añahare’e, tsy midorasitse o fandia’eo.

32 Tampone’ ty tsivokatse ty vantañe, mipay hañè-doza ama’e.

33 Fe tsy hapo’ Iehovà an-taña’e ao, vaho tsy hado’e hafàtse an-jaka.

34 Itamao t’Iehovà, naho ambeno i lala’ey, le honjone’e handova i taney, vaho ho isa’o ty fañitoañe o tsivokatseo.

35 Fa nitreako ty lahiaga, tsivoatsolo, nandrevake hoe hatae maindoñe an-tane’e ao;

36 Fe nihelañe añe, le heheke, tsy eo; pinaiko fa tsy nahatrea.

37 Henteo ty vañoñe, hehe i vantañey, ho soa-figadoñe ty mifampilongo.

38 Fe hatrao-­karotsake o mpandilatseo vaho ho tomereñe ty figadoña’ ty lo-tsereke.

39 Boak’ am’ Iehovà ty fandrombahañe o vañoñeo, Ie ty fitsoloha’ iareo an-tsàm-poheke.

40 Imbàe’ Iehovà naho votsore’e; haha’e amo ­tsivokatseo vaho rombahe’e, amy te Ie ty fipalira’ iareo.