Salamo 33

1 Mirebeha am’Iehovà, ry vantañeo, toe mañeva o vañoñeo ty mandrenge.

2 Andriaño ami’ty marovany t’Iehovà, rengeo an-tsabo, mititiha folo-taly.

3 Isabò sabo vao; ititiho am-pahimbañañe, am-pipoñafan-drebeke.

4 Mahity ty tsara’ Iehovà, hene am-pigahiñañe o fitoloña’eo

5 No’e ty havantañañe naho ty hatò: àtseke ty fiferenaiña’ Iehovà’ ty tane toy.

6 Ty tsara’ Iehovà ro nanoeñe i likerañey; ty kofom-palie’e i valobohò’ey.

7 Atonto’e am-botry o ranon-driakeo; ahaja’e an-driha ao o lalekeo.

8 Mirevendreveña am’ Iehovà ry tane toy; kila mañeveña ama’e ry mpimone’ ty voatse toy.

9 Tsinara’e le nifonitse; nandily, vaho nijadoñe.

10 Koahe’ Iehovà ty fikinia’ o fifeheañeo; afofi’e ty fikilila’ ondatio;

11 Mijadoñe nainai’e ty famerea’ Iehovà, pak’an-tariran-tariratse o fisafirin’ arofo’e.

12 Haha ty fifeheañe naho Iehovà ro Andrianañahare’e, ondaty jinobo’e ho lova’eo.

13 Mivazòho boak’ an-dikerañe añe t’Iehovà; oni’e iaby o ana’ondatio.

14 Jilove’e boak’ añ’akiba’e ao ze hene mpimoneñ’ an-tane atoy;

15 I mpitsene ty arofo’ iareo iaby, sindre aharofoana’e ty fitoloña’e.

16 Tsy ty fitozantoza’ i màroy ty maharombake i mpanjakay; tsy i haozara’e ra’elahiy ty mahavotsotse ty fanalolahy.

17 Tsy jefa’e t’ie miato aman-tsoavalan’aly ho fiarovañe; tsy ty hara’elahin-kafatrara’e ty hahafipolitira’e.

18 Inao, te itoliham-pihaino’ Iehovà o mañeveñe ama’eo, o mitamà i fiferenaiña’eio,

19 ho votsora’e ty fiai’ iareo tsy hihomake, vaho ho velome’e an-tsan-kerè.

20 Mandiñe Iehovà o tron-tikañeo; Ie ty mpañimba antika naho ty fikalan-defon-tika.

21 Ama’e ty firebehan’ arofon-tika, fiatoan-tika i tahina’e masiñey.

22 Ho ama’ay abey ty fiferenaiña’o ry Iehovà, fa mpitamà Azo.