Psalmorum 83

1 canticum psalmi Asaph Deus quis similis erit tibi ne taceas neque conpescaris Deus

Canticum Psalmi Asaph. Deus, quis similis erit tibi? ne taceas, neque compescaris Deus:

2 quoniam ecce inimici tui sonaverunt et qui oderunt te extulerunt caput

Quoniam ecce inimici tui sonuerunt: et qui oderunt te, extulerunt caput.

3 super populum tuum malignaverunt consilium et cogitaverunt adversus sanctos tuos

Super populum tuum malignaverunt consilium: et cogitaverunt adversus sanctos tuos.

4 dixerunt venite et disperdamus eos de gente et non memoretur nomen Israhel ultra

Dixerunt: Venite, et disperdamus eos de gente: et non memoretur nomen Israel ultra.

5 quoniam cogitaverunt unianimiter simul adversum te testamentum disposuerunt

Quoniam cogitaverunt unanimiter: simul adversum te testamentum disposuerunt,

6 tabernacula Idumeorum et Ismahelitae Moab et Aggareni

tabernacula Idumaeorum et Ismahelitae: Moab, et Agareni,

7 Gebal et Ammon et Amalech alienigenae cum habitantibus Tyrum

Gebal, et Ammon, et Amalec: alienigenae cum habitantibus Tyrum.

8 etenim Assur venit cum illis facti sunt in adiutorium filiis Loth diapsalma

Etenim Assur venit cum illis: facti sunt in adiutorium filiis Lot.

9 fac illis sicut Madiam et Sisarae sicut Iabin in torrente Cison

Fac illis sicut Madian et Sisarae: sicut Iabin in torrente Cisson.

10 disperierunt in Endor facti sunt ut stercus terrae

Disperierunt in Endor: facti sunt ut stercus terrae.

11 pone principes eorum sicut Oreb et Zeb et Zebee et Salmana omnes principes eorum

Pone principes eorum sicut Oreb, et Zeb, et Zebee, et Salmana: Omnes principes eorum:

12 qui dixerunt hereditate possideamus sanctuarium Dei

qui dixerunt: Hereditate possideamus Sanctuarium Dei.

13 Deus meus pone illos ut rotam sicut stipulam ante faciem venti

Deus meus pone illos ut rotam: et sicut stipulam ante faciem venti.

14 sicut ignis qui conburit silvam sicut flamma conburens montes

Sicut ignis, qui comburit silvam: et sicut flamma comburens montes:

15 ita persequeris illos in tempestate tua et in ira tua turbabis eos

Ita persequeris illos in tempestate tua: et in ira tua turbabis eos.

16 imple facies illorum ignominia et quaerent nomen tuum Domine

Imple facies eorum ignominia: et quaerent nomen tuum, Domine.

17 erubescant et conturbentur in saeculum saeculi et confundantur et pereant

Erubescant, et conturbentur in saeculum saeculi: et confundantur, et pereant.

18 et cognoscant quia nomen tibi Dominus tu solus Altissimus in omni terra

Et cognoscant quia nomen tibi Dominus: tu solus Altissimus in omni terra.