Psalmorum 66
1 in finem canticum psalmi resurrectionis iubilate Deo omnis terra
Psalmus In finem, Canticum Psalmi resurrectionis. Iubilate Deo omnis terra,
2 psalmum dicite nomini eius date gloriam laudi eius
psalmum dicite nomini eius: date gloriam laudi eius.
3 dicite Deo quam terribilia sunt opera tua Domine in multitudine virtutis tuae mentientur tibi inimici tui
Dicite Deo quam terribilia sunt opera tua Domine! in multitudine virtutis tuae mentientur tibi inimici tui.
4 omnis terra adorent te et psallant tibi psalmum dicant nomini tuo diapsalma
Omnis terra adoret te, et psallat tibi: psalmum dicat nomini tuo.
5 venite et videte opera Dei terribilis in consiliis super filios hominum
Venite, et videte opera Dei: terribilis in consiliis super filios hominum.
6 qui convertit mare in aridam in flumine pertransibunt pede ibi laetabimur in ipso
Qui convertit mare in aridam, in flumine pertransibunt pede: ibi laetabimur in ipso.
7 qui dominatur in virtute sua in aeternum oculi eius super gentes respiciunt qui exasperant non exaltentur in semet ipsis diapsalma
Qui dominatur in virtute sua in aeternum, oculi eius super gentes respiciunt: qui exasperant non exaltentur in semetipsis.
8 benedicite gentes Deum nostrum et auditam facite vocem laudis eius
Benedicite Gentes Deum nostrum: et auditam facite vocem laudis eius,
9 qui posuit animam meam ad vitam et non dedit in commotionem pedes meos
Qui posuit animam meam ad vitam: et non dedit in commotionem pedes meos.
10 quoniam probasti nos Deus igne nos examinasti sicut examinatur argentum
Quoniam probasti nos Deus: igne nos examinasti, sicut examinatur argentum.
11 induxisti nos in laqueum posuisti tribulationes in dorso nostro
Induxisti nos in laqueum, posuisti tribulationes in dorso nostro:
12 inposuisti homines super capita nostra transivimus per ignem et aquam et eduxisti nos in refrigerium
imposuisti homines super capita nostra. Transivimus per ignem et aquam: et eduxisti nos in refrigerium.
13 introibo in domum tuam in holocaustis reddam tibi vota mea
Introibo in domum tuam in holocaustis: reddam tibi vota mea,
14 quae distinxerunt labia mea et locutum est os meum in tribulatione mea
quae distinxerunt labia mea. Et locutum est os meum, in tribulatione mea.
15 holocausta medullata offeram tibi cum incensu arietum offeram tibi boves cum hircis diapsalma
Holocausta medullata offeram tibi cum incenso arietum: offeram tibi boves cum hircis.
16 venite audite et narrabo omnes qui timetis Deum quanta fecit animae meae
Venite, audite, et narrabo, omnes qui timetis Deum, quanta fecit animae meae.
17 ad ipsum ore meo clamavi et exaltavi sub lingua mea
Ad ipsum ore meo clamavi, et exultavi sub lingua mea.
18 iniquitatem si aspexi in corde meo non exaudiat Dominus
Iniquitatem si aspexi in corde meo, non exaudiet Dominus.
19 propterea exaudivit Deus adtendit voci deprecationis meae
Propterea exaudivit Deus, et attendit voci deprecationis meae.
20 benedictus Deus qui non amovit orationem meam et misericordiam suam a me
Benedictus Deus, qui non amovit orationem meam, et misericordiam suam a me.
