Psalmorum 119
1 alleluia aleph beati inmaculati in via qui ambulant in lege Domini
Alleluja. [Aleph Beati immaculati in via, qui ambulant in lege Domini.
2 beati qui scrutantur testimonia eius in toto corde exquirent eum
Beati qui scrutantur testimonia ejus; in toto corde exquirunt eum.
3 non enim qui operantur iniquitatem in viis eius ambulaverunt
Non enim qui operantur iniquitatem in viis ejus ambulaverunt.
4 tu mandasti mandata tua custodire nimis
Tu mandasti mandata tua custodiri nimis.
5 utinam dirigantur viae meae ad custodiendas iustificationes tuas
Utinam dirigantur viæ meæ ad custodiendas justificationes tuas.
6 tunc non confundar cum perspexero in omnibus mandatis tuis
Tunc non confundar, cum perspexero in omnibus mandatis tuis.
7 confitebor tibi in directione cordis in eo quod didici iudicia iustitiae tuae
Confitebor tibi in directione cordis, in eo quod didici judicia justitiæ tuæ.
8 iustificationes tuas custodiam non me derelinquas usquequaque
Justificationes tuas custodiam; non me derelinquas usquequaque.
9 beth in quo corriget adulescentior viam suam in custodiendo sermones tuos
Beth In quo corrigit adolescentior viam suam? in custodiendo sermones tuos.
10 in toto corde meo exquisivi te non repellas me a mandatis tuis
In toto corde meo exquisivi te; ne repellas me a mandatis tuis.
11 in corde meo abscondi eloquia tua ut non peccem tibi
In corde meo abscondi eloquia tua, ut non peccem tibi.
12 benedictus es Domine doce me iustificationes tuas
Benedictus es, Domine; doce me justificationes tuas.
13 in labiis meis pronuntiavi omnia iudicia oris tui
In labiis meis pronuntiavi omnia judicia oris tui.
14 in via testimoniorum tuorum delectatus sum sicut in omnibus divitiis
In via testimoniorum tuorum delectatus sum, sicut in omnibus divitiis.
15 in mandatis tuis exercebor et considerabo vias tuas
In mandatis tuis exercebor, et considerabo vias tuas.
16 in iustificationibus tuis meditabor non obliviscar sermones tuos
In justificationibus tuis meditabor: non obliviscar sermones tuos.
17 gimel retribue servo tuo vivifica me et custodiam sermones tuos
Ghimel Retribue servo tuo, vivifica me, et custodiam sermones tuos.
18 revela oculos meos et considerabo mirabilia de lege tua
Revela oculos meos, et considerabo mirabilia de lege tua.
19 incola ego sum in terra non abscondas a me mandata tua
Incola ego sum in terra: non abscondas a me mandata tua.
20 concupivit anima mea desiderare iustificationes tuas in omni tempore
Concupivit anima mea desiderare justificationes tuas in omni tempore.
21 increpasti superbos maledicti qui declinant a mandatis tuis
Increpasti superbos; maledicti qui declinant a mandatis tuis.
22 aufer a me obprobrium et contemptum quia testimonia tua exquisivi
Aufer a me opprobrium et contemptum, quia testimonia tua exquisivi.
23 etenim sederunt principes et adversum me loquebantur servus autem tuus exercebatur in iustificationibus tuis
Etenim sederunt principes, et adversum me loquebantur; servus autem tuus exercebatur in justificationibus tuis.
24 nam et testimonia tua meditatio mea et consilium meum iustificationes tuae
Nam et testimonia tua meditatio mea est, et consilium meum justificationes tuæ.
25 deleth adhesit pavimento anima mea vivifica me secundum verbum tuum
Daleth Adhæsit pavimento anima mea: vivifica me secundum verbum tuum.
26 vias meas enuntiavi et exaudisti me doce me iustificationes tuas
Vias meas enuntiavi, et exaudisti me; doce me justificationes tuas.
27 viam iustificationum tuarum instrue me et exercebor in mirabilibus tuis
Viam justificationum tuarum instrue me, et exercebor in mirabilibus tuis.
28 dormitavit anima mea prae taedio confirma me in verbis tuis
Dormitavit anima mea præ tædio: confirma me in verbis tuis.
29 viam iniquitatis amove a me et lege tua miserere mei
Viam iniquitatis amove a me, et de lege tua miserere mei.
30 viam veritatis elegi iudicia tua non sum oblitus
Viam veritatis elegi; judicia tua non sum oblitus.
31 adhesi testimoniis tuis Domine noli me confundere
Adhæsi testimoniis tuis, Domine; noli me confundere.
32 viam mandatorum tuorum cucurri cum dilatasti cor meum
Viam mandatorum tuorum cucurri, cum dilatasti cor meum.
33 he legem pone mihi Domine viam iustificationum tuarum et exquiram eam semper
He Legem pone mihi, Domine, viam justificationum tuarum, et exquiram eam semper.
34 da mihi intellectum et scrutabor legem tuam et custodiam illam in toto corde meo
Da mihi intellectum, et scrutabor legem tuam, et custodiam illam in toto corde meo.
35 deduc me in semita mandatorum tuorum quia ipsam volui
Deduc me in semitam mandatorum tuorum, quia ipsam volui.
36 inclina cor meum in testimonia tua et non in avaritiam
Inclina cor meum in testimonia tua, et non in avaritiam.
37 averte oculos meos ne videant vanitatem in via tua vivifica me
Averte oculos meos, ne videant vanitatem; in via tua vivifica me.
38 statue servo tuo eloquium tuum in timore tuo
Statue servo tuo eloquium tuum in timore tuo.
39 amputa obprobrium meum quod suspicatus sum quia iudicia tua iucunda
Amputa opprobrium meum quod suspicatus sum, quia judicia tua jucunda.
40 ecce concupivi mandata tua in aequitate tua vivifica me
Ecce concupivi mandata tua: in æquitate tua vivifica me.
41 vav et veniat super me misericordia tua Domine salutare tuum secundum eloquium tuum
Vau Et veniat super me misericordia tua, Domine; salutare tuum secundum eloquium tuum.
42 et respondebo exprobrantibus mihi verbum quia speravi in sermonibus tuis
Et respondebo exprobrantibus mihi verbum, quia speravi in sermonibus tuis.
43 et ne auferas de ore meo verbum veritatis usquequaque quia in iudiciis tuis supersperavi
Et ne auferas de ore meo verbum veritatis usquequaque, quia in judiciis tuis supersperavi.
44 et custodiam legem tuam semper in saeculum et in saeculum saeculi
Et custodiam legem tuam semper, in sæculum et in sæculum sæculi.
45 et ambulabam in latitudine quia mandata tua exquisivi
Et ambulabam in latitudine, quia mandata tua exquisivi.
46 et loquebar in testimoniis tuis in conspectu regum et non confundebar
Et loquebar in testimoniis tuis in conspectu regum, et non confundebar.
47 et meditabar in mandatis tuis quae dilexi
Et meditabar in mandatis tuis, quæ dilexi.
48 et levavi manus meas ad mandata quae dilexi et exercebar in iustificationibus tuis
Et levavi manus meas ad mandata tua, quæ dilexi, et exercebar in justificationibus tuis.
49 zai memor esto verbi tui servo tuo in quo mihi spem dedisti
Zain Memor esto verbi tui servo tuo, in quo mihi spem dedisti.
50 haec me consolata est in humilitate mea quia eloquium tuum vivificavit me
Hæc me consolata est in humilitate mea, quia eloquium tuum vivificavit me.
51 superbi inique agebant usquequaque a lege autem tua non declinavi
Superbi inique agebant usquequaque; a lege autem tua non declinavi.
52 memor fui iudiciorum tuorum a saeculo Domine et consolatus sum
Memor fui judiciorum tuorum a sæculo, Domine, et consolatus sum.
53 defectio tenuit me prae peccatoribus derelinquentibus legem tuam
Defectio tenuit me, pro peccatoribus derelinquentibus legem tuam.
54 cantabiles mihi erant iustificationes tuae in loco peregrinationis meae
Cantabiles mihi erant justificationes tuæ in loco peregrinationis meæ.
55 memor fui in nocte nominis tui Domine et custodivi legem tuam
Memor fui nocte nominis tui, Domine, et custodivi legem tuam.
56 haec facta est mihi quia iustificationes tuas exquisivi
Hæc facta est mihi, quia justificationes tuas exquisivi.
57 heth portio mea Dominus dixi custodire legem tuam
Heth Portio mea, Domine, dixi custodire legem tuam.
58 deprecatus sum faciem tuam in toto corde meo miserere mei secundum eloquium tuum
Deprecatus sum faciem tuam in toto corde meo; miserere mei secundum eloquium tuum.
59 cogitavi vias meas et avertisti pedes meos in testimonia tua
Cogitavi vias meas, et converti pedes meos in testimonia tua.
60 paratus sum et non sum turbatus ut custodiam mandata tua
Paratus sum, et non sum turbatus, ut custodiam mandata tua.
61 funes peccatorum circumplexi sunt me et legem tuam non sum oblitus
Funes peccatorum circumplexi sunt me, et legem tuam non sum oblitus.
62 media nocte surgebam ad confitendum tibi super iudicia iustificationis tuae
Media nocte surgebam ad confitendum tibi, super judicia justificationis tuæ.
63 particeps ego sum omnium timentium te et custodientium mandata tua
Particeps ego sum omnium timentium te, et custodientium mandata tua.
64 misericordia Domini plena est terra iustificationes tuas doce me
Misericordia tua, Domine, plena est terra; justificationes tuas doce me.
65 teth bonitatem fecisti cum servo tuo Domine secundum verbum tuum
Teth Bonitatem fecisti cum servo tuo, Domine, secundum verbum tuum.
66 bonitatem et disciplinam et scientiam doce me quia mandatis tuis credidi
Bonitatem, et disciplinam, et scientiam doce me, quia mandatis tuis credidi.
67 priusquam humiliarer ego deliqui propterea eloquium tuum custodivi
Priusquam humiliarer ego deliqui: propterea eloquium tuum custodivi.
68 bonus es tu et in bonitate tua doce me iustificationes tuas
Bonus es tu, et in bonitate tua doce me justificationes tuas.
69 multiplicata est super me iniquitas superborum ego autem in toto corde scrutabor mandata tua
Multiplicata est super me iniquitas superborum; ego autem in toto corde meo scrutabor mandata tua.
70 coagulatum est sicut lac cor eorum ego vero legem tuam meditatus sum
Coagulatum est sicut lac cor eorum; ego vero legem tuam meditatus sum.
71 bonum mihi quia humiliasti me ut discam iustificationes tuas
Bonum mihi quia humiliasti me, ut discam justificationes tuas.
72 bonum mihi lex oris tui super milia auri et argenti
Bonum mihi lex oris tui, super millia auri et argenti.
73 ioth manus tuae fecerunt me et plasmaverunt me da mihi intellectum et discam mandata tua
Jod Manus tuæ fecerunt me, et plasmaverunt me: da mihi intellectum, et discam mandata tua.
74 qui timent te videbunt me et laetabuntur quia in verba tua supersperavi
Qui timent te videbunt me et lætabuntur, quia in verba tua supersperavi.
75 cognovi Domine quia aequitas iudicia tua et veritate humiliasti me
Cognovi, Domine, quia æquitas judicia tua, et in veritate tua humiliasti me.
76 fiat misericordia tua ut consoletur me secundum eloquium tuum servo tuo
Fiat misericordia tua ut consoletur me, secundum eloquium tuum servo tuo.
77 veniant mihi miserationes tuae et vivam quia lex tua meditatio mea est
Veniant mihi miserationes tuæ, et vivam, quia lex tua meditatio mea est.
78 confundantur superbi quia iniuste iniquitatem fecerunt in me ego autem exercebor in mandatis tuis
Confundantur superbi, quia injuste iniquitatem fecerunt in me; ego autem exercebor in mandatis tuis.
79 convertantur mihi timentes te et qui noverunt testimonia tua
Convertantur mihi timentes te, et qui noverunt testimonia tua.
80 fiat cor meum inmaculatum in iustificationibus tuis ut non confundar
Fiat cor meum immaculatum in justificationibus tuis, ut non confundar.
81 caf defecit in salutare tuum anima mea in verbum tuum supersperavi
Caph Defecit in salutare tuum anima mea, et in verbum tuum supersperavi.
82 defecerunt oculi mei in eloquium tuum dicentes quando consolaberis me
Defecerunt oculi mei in eloquium tuum, dicentes: Quando consolaberis me?
83 quia factus sum sicut uter in pruina iustificationes tuas non sum oblitus
Quia factus sum sicut uter in pruina; justificationes tuas non sum oblitus.
84 quot sunt dies servo tuo quando facies de persequentibus me iudicium
Quot sunt dies servi tui? quando facies de persequentibus me judicium?
85 narraverunt mihi iniqui fabulationes sed non ut lex tua
Narraverunt mihi iniqui fabulationes, sed non ut lex tua.
86 omnia mandata tua veritas inique persecuti sunt me adiuva me
Omnia mandata tua veritas: inique persecuti sunt me, adjuva me.
87 paulo minus consummaverunt me in terra ego autem non dereliqui mandata tua
Paulominus consummaverunt me in terra; ego autem non dereliqui mandata tua.
88 secundum misericordiam tuam vivifica me et custodiam testimonia oris tui
Secundum misericordiam tuam vivifica me, et custodiam testimonia oris tui.
89 lamed in aeternum Domine verbum tuum permanet in caelo
Lamed In æternum, Domine, verbum tuum permanet in cælo.
90 in generationem et generationem veritas tua fundasti terram et permanet
In generationem et generationem veritas tua; fundasti terram, et permanet.
91 ordinatione tua perseverat dies quoniam omnia serviunt tibi
Ordinatione tua perseverat dies, quoniam omnia serviunt tibi.
92 nisi quod lex tua meditatio mea est tunc forte perissem in humilitate mea
Nisi quod lex tua meditatio mea est, tunc forte periissem in humilitate mea.
93 in aeternum non obliviscar iustificationes tuas quia in ipsis vivificasti me
In æternum non obliviscar justificationes tuas, quia in ipsis vivificasti me.
94 tuus sum ego salvum me fac quoniam iustificationes tuas exquisivi
Tuus sum ego; salvum me fac: quoniam justificationes tuas exquisivi.
95 me expectaverunt peccatores ut perderent me testimonia tua intellexi
Me exspectaverunt peccatores ut perderent me; testimonia tua intellexi.
96 omni consummationi vidi finem latum mandatum tuum nimis
Omnis consummationis vidi finem, latum mandatum tuum nimis.
97 mem quomodo dilexi legem tuam tota die meditatio mea est
Mem Quomodo dilexi legem tuam, Domine! tota die meditatio mea est.
98 super inimicos meos prudentem me fecisti mandato tuo quia in aeternum mihi est
Super inimicos meos prudentem me fecisti mandato tuo, quia in æternum mihi est.
99 super omnes docentes me intellexi quia testimonia tua meditatio mea est
Super omnes docentes me intellexi, quia testimonia tua meditatio mea est.
100 super senes intellexi quia mandata tua quaesivi
Super senes intellexi, quia mandata tua quæsivi.
101 ab omni via mala prohibui pedes meos ut custodiam verba tua
Ab omni via mala prohibui pedes meos, ut custodiam verba tua.
102 a iudiciis tuis non declinavi quia tu legem posuisti mihi
A judiciis tuis non declinavi, quia tu legem posuisti mihi.
103 quam dulcia faucibus meis eloquia tua super mel ori meo
Quam dulcia faucibus meis eloquia tua! super mel ori meo.
104 a mandatis tuis intellexi propterea odivi omnem viam iniquitatis
A mandatis tuis intellexi; propterea odivi omnem viam iniquitatis.
105 nun lucerna pedibus meis verbum tuum et lumen semitis meis
Nun Lucerna pedibus meis verbum tuum, et lumen semitis meis.
106 iuravi et statui custodire iudicia iustitiae tuae
Juravi et statui custodire judicia justitiæ tuæ.
107 humiliatus sum usquequaque Domine vivifica me secundum verbum tuum
Humiliatus sum usquequaque, Domine; vivifica me secundum verbum tuum.
108 voluntaria oris mei beneplacita fac Domine et iudicia tua doce me
Voluntaria oris mei beneplacita fac, Domine, et judicia tua doce me.
109 anima mea in manibus meis semper et legem tuam non sum oblitus
Anima mea in manibus meis semper, et legem tuam non sum oblitus.
110 posuerunt peccatores laqueum mihi et de mandatis tuis non erravi
Posuerunt peccatores laqueum mihi, et de mandatis tuis non erravi.
111 hereditate adquisivi testimonia tua in aeternum quia exultatio cordis mei sunt
Hæreditate acquisivi testimonia tua in æternum, quia exsultatio cordis mei sunt.
112 inclinavi cor meum ad faciendas iustificationes tuas in aeternum propter retributionem
Inclinavi cor meum ad faciendas justificationes tuas in æternum, propter retributionem.
113 samech iniquos odio habui et legem tuam dilexi
Samech Iniquos odio habui, et legem tuam dilexi.
114 adiutor meus et susceptor meus es tu in verbum tuum supersperavi
Adjutor et susceptor meus es tu, et in verbum tuum supersperavi.
115 declinate a me maligni et scrutabor mandata Dei mei
Declinate a me, maligni, et scrutabor mandata Dei mei.
116 suscipe me secundum eloquium tuum et vivam et non confundas me ab expectatione mea
Suscipe me secundum eloquium tuum, et vivam, et non confundas me ab exspectatione mea.
117 adiuva me et salvus ero et meditabor in iustificationibus tuis semper
Adjuva me, et salvus ero, et meditabor in justificationibus tuis semper.
118 sprevisti omnes discedentes a iustitiis tuis quia iniusta cogitatio eorum
Sprevisti omnes discedentes a judiciis tuis, quia injusta cogitatio eorum.
119 praevaricantes reputavi omnes peccatores terrae ideo dilexi testimonia tua
Prævaricantes reputavi omnes peccatores terræ; ideo dilexi testimonia tua.
120 confige timore tuo carnes meas a iudiciis enim tuis timui
Confige timore tuo carnes meas; a judiciis enim tuis timui.
121 ain feci iudicium et iustitiam non tradas me calumniantibus me
Ain Feci judicium et justitiam: non tradas me calumniantibus me.
122 suscipe servum tuum in bonum non calumnientur me superbi
Suscipe servum tuum in bonum: non calumnientur me superbi.
123 oculi mei defecerunt in salutare tuum et in eloquium iustitiae tuae
Oculi mei defecerunt in salutare tuum, et in eloquium justitiæ tuæ.
124 fac cum servo tuo secundum misericordiam tuam et iustificationes tuas doce me
Fac cum servo tuo secundum misericordiam tuam, et justificationes tuas doce me.
125 servus tuus sum ego da mihi intellectum et sciam testimonia tua
Servus tuus sum ego: da mihi intellectum, ut sciam testimonia tua.
126 tempus faciendi Domino dissipaverunt legem tuam
Tempus faciendi, Domine: dissipaverunt legem tuam.
127 ideo dilexi mandata tua super aurum et topazion
Ideo dilexi mandata tua super aurum et topazion.
128 propterea ad omnia mandata tua dirigebar omnem viam iniquam odio habui
Propterea ad omnia mandata tua dirigebar; omnem viam iniquam odio habui.
129 fe mirabilia testimonia tua ideo scrutata est ea anima mea
Phe Mirabilia testimonia tua: ideo scrutata est ea anima mea.
130 declaratio sermonum tuorum inluminat et intellectum dat parvulis
Declaratio sermonum tuorum illuminat, et intellectum dat parvulis.
131 os meum aperui et adtraxi spiritum quia mandata tua desiderabam
Os meum aperui, et attraxi spiritum: quia mandata tua desiderabam.
132 aspice in me et miserere mei secundum iudicium diligentium nomen tuum
Aspice in me, et miserere mei, secundum judicium diligentium nomen tuum.
133 gressus meos dirige secundum eloquium tuum et non dominetur mei omnis iniustitia
Gressus meos dirige secundum eloquium tuum, et non dominetur mei omnis injustitia.
134 redime me a calumniis hominum et custodiam mandata tua
Redime me a calumniis hominum ut custodiam mandata tua.
135 faciem tuam inlumina super servum tuum et doce me iustificationes tuas
Faciem tuam illumina super servum tuum, et doce me justificationes tuas.
136 exitus aquarum deduxerunt oculi mei quia non custodierunt legem tuam
Exitus aquarum deduxerunt oculi mei, quia non custodierunt legem tuam.
137 sade iustus es Domine et rectum iudicium tuum
Sade Justus es, Domine, et rectum judicium tuum.
138 mandasti iustitiam testimonia tua et veritatem tuam nimis
Mandasti justitiam testimonia tua, et veritatem tuam nimis.
139 tabescere me fecit zelus meus quia obliti sunt verba tua inimici mei
Tabescere me fecit zelus meus, quia obliti sunt verba tua inimici mei.
140 ignitum eloquium tuum vehementer et servus tuus dilexit illud
Ignitum eloquium tuum vehementer, et servus tuus dilexit illud.
141 adulescentulus sum ego et contemptus iustificationes tuas non sum oblitus
Adolescentulus sum ego et contemptus; justificationes tuas non sum oblitus.
142 iustitia tua iustitia in aeternum et lex tua veritas
Justitia tua, justitia in æternum, et lex tua veritas.
143 tribulatio et angustia invenerunt me mandata tua meditatio mea
Tribulatio et angustia invenerunt me; mandata tua meditatio mea est.
144 aequitas testimonia tua in aeternum intellectum da mihi et vivam
Æquitas testimonia tua in æternum: intellectum da mihi, et vivam.
145 cof clamavi in toto corde exaudi me Domine iustificationes tuas requiram
Coph Clamavi in toto corde meo: exaudi me, Domine; justificationes tuas requiram.
146 clamavi te salvum me fac et custodiam mandata tua
Clamavi ad te; salvum me fac: ut custodiam mandata tua.
147 praeveni in maturitate et clamavi in verba tua supersperavi
Præveni in maturitate, et clamavi: quia in verba tua supersperavi.
148 praevenerunt oculi mei ad diluculum ut meditarer eloquia tua
Prævenerunt oculi mei ad te diluculo, ut meditarer eloquia tua.
149 vocem meam audi secundum misericordiam tuam Domine secundum iudicium tuum vivifica me
Vocem meam audi secundum misericordiam tuam, Domine, et secundum judicium tuum vivifica me.
150 adpropinquaverunt persequentes me iniquitate a lege autem tua longe facti sunt
Appropinquaverunt persequentes me iniquitati: a lege autem tua longe facti sunt.
151 prope es tu Domine et omnes viae tuae veritas
Prope es tu, Domine, et omnes viæ tuæ veritas.
152 initio cognovi de testimoniis tuis quia in aeternum fundasti ea
Initio cognovi de testimoniis tuis, quia in æternum fundasti ea.
153 res vide humilitatem meam et eripe me quia legem tuam non sum oblitus
Res Vide humilitatem meam, et eripe me, quia legem tuam non sum oblitus.
154 iudica iudicium meum et redime me propter eloquium tuum vivifica me
Judica judicium meum, et redime me: propter eloquium tuum vivifica me.
155 longe a peccatoribus salus quia iustificationes tuas non exquisierunt
Longe a peccatoribus salus, quia justificationes tuas non exquisierunt.
156 misericordiae tuae multae Domine secundum iudicia tua vivifica me
Misericordiæ tuæ multæ, Domine; secundum judicium tuum vivifica me.
157 multi qui persequuntur me et tribulant me a testimoniis tuis non declinavi
Multi qui persequuntur me, et tribulant me; a testimoniis tuis non declinavi.
158 vidi praevaricantes et tabescebam quia eloquia tua non custodierunt
Vidi prævaricantes et tabescebam, quia eloquia tua non custodierunt.
159 vide quoniam mandata tua dilexi Domine in misericordia tua vivifica me
Vide quoniam mandata tua dilexi, Domine: in misericordia tua vivifica me.
160 principium verborum tuorum veritas et in aeternum omnia iudicia iustitiae tuae
Principium verborum tuorum veritas; in æternum omnia judicia justitiæ tuæ.
161 sen principes persecuti sunt me gratis et a verbis tuis formidavit cor meum
Sin Principes persecuti sunt me gratis, et a verbis tuis formidavit cor meum.
162 laetabor ego super eloquia tua sicut qui invenit spolia multa
Lætabor ego super eloquia tua, sicut qui invenit spolia multa.
163 iniquitatem odio habui et abominatus sum legem autem tuam dilexi
Iniquitatem odio habui, et abominatus sum, legem autem tuam dilexi.
164 septies in die laudem dixi tibi super iudicia iustitiae tuae
Septies in die laudem dixi tibi, super judicia justitiæ tuæ.
165 pax multa diligentibus legem tuam et non est illis scandalum
Pax multa diligentibus legem tuam, et non est illis scandalum.
166 expectabam salutare tuum Domine et mandata tua dilexi
Exspectabam salutare tuum, Domine, et mandata tua dilexi.
167 custodivit anima mea testimonia tua et dilexi ea vehementer
Custodivit anima mea testimonia tua, et dilexit ea vehementer.
168 servavi mandata tua et testimonia tua quia omnes viae meae in conspectu tuo
Servavi mandata tua et testimonia tua, quia omnes viæ meæ in conspectu tuo.
169 thau adpropinquet deprecatio mea in conspectu tuo Domine iuxta eloquium tuum da mihi intellectum
Tau Appropinquet deprecatio mea in conspectu tuo, Domine; juxta eloquium tuum da mihi intellectum.
170 intret postulatio mea in conspectu tuo secundum eloquium tuum eripe me
Intret postulatio mea in conspectu tuo; secundum eloquium tuum eripe me.
171 eructabunt labia mea hymnum cum docueris me iustificationes tuas
Eructabunt labia mea hymnum, cum docueris me justificationes tuas.
172 pronuntiabit lingua mea eloquium tuum quia omnia mandata tua aequitas
Pronuntiabit lingua mea eloquium tuum, quia omnia mandata tua æquitas.
173 fiat manus tua ut salvet me quoniam mandata tua elegi
Fiat manus tua ut salvet me, quoniam mandata tua elegi.
174 concupivi salutare tuum Domine et lex tua meditatio mea
Concupivi salutare tuum, Domine, et lex tua meditatio mea est.
175 vivet anima mea et laudabit te et iudicia tua adiuvabunt me
Vivet anima mea, et laudabit te, et judicia tua adjuvabunt me.
176 erravi sicut ovis quae periit quaere servum tuum quia mandata tua non sum oblitus
Erravi sicut ovis quæ periit: quære servum tuum, quia mandata tua non sum oblitus.]
