Proverbiorum 31
1 verba Lamuhel regis visio qua erudivit eum mater sua
Verba Lamuelis regis. Visio, qua erudivit eum mater sua.
2 quid dilecte mi quid dilecte uteri mei quid dilecte votorum meorum
Quid dilecte mi, quid dilecte uteri mei, quid dilecte votorum meorum?
3 ne dederis mulieribus substantiam tuam et vias tuas ad delendos reges
Ne dederis mulieribus substantiam tuam, et divitias tuas ad delendos reges.
4 noli regibus o Lamuhel noli regibus dare vinum quia nullum secretum est ubi regnat ebrietas
Noli regibus, o Lamuel, noli regibus dare vinum: quia nullum secretum est ubi regnat ebrietas.
5 ne forte bibat et obliviscatur iudiciorum et mutet causam filiorum pauperis
et ne forte bibant, et obliviscantur iudiciorum, et mutent causam filiorum pauperis.
6 date siceram maerentibus et vinum his qui amaro sunt animo
Date siceram moerentibus, et vinum his, qui amaro sunt animo:
7 bibant ut obliviscantur egestatis suae et doloris non recordentur amplius
ut bibant, et obliviscantur egestatis suae, et doloris sui non recordentur amplius.
8 aperi os tuum muto et causis omnium filiorum qui pertranseunt
Aperi os tuum muto, et causis omnium filiorum qui pertranseunt:
9 aperi os tuum decerne quod iustum est et iudica inopem et pauperem
aperi os tuum, decerne quod iustum est, et iudica inopem et pauperem.
10 aleph mulierem fortem quis inveniet procul et de ultimis finibus pretium eius
Mulierem fortem quis inveniet? procul, et de ultimis finibus pretium eius.
11 beth confidit in ea cor viri sui et spoliis non indigebit
Confidit in ea cor viri sui, et spoliis non indigebit.
12 gimel reddet ei bonum et non malum omnibus diebus vitae suae
Reddet ei bonum, et non malum, omnibus diebus vitae suae.
13 deleth quaesivit lanam et linum et operata est consilio manuum suarum
Quaesivit lanam et linum, et operata est consilia manuum suarum.
14 he facta est quasi navis institoris de longe portat panem suum
Facta est quasi navis institoris, de longe portans panem suum.
15 vav et de nocte surrexit deditque praedam domesticis suis et cibaria ancillis suis
Et de nocte surrexit, deditque praedam domesticis suis, et cibaria ancillis suis.
16 zai consideravit agrum et emit eum de fructu manuum suarum plantavit vineam
Consideravit agrum, et emit eum: de fructu manuum suarum plantavit vineam.
17 heth accinxit fortitudine lumbos suos et roboravit brachium suum
Accinxit fortitudine lumbos suos, et roboravit brachium suum.
18 teth gustavit quia bona est negotiatio eius non extinguetur in nocte lucerna illius
Gustavit, et vidit quia bona est negotiatio eius: non extinguetur in nocte lucerna eius.
19 ioth manum suam misit ad fortia et digiti eius adprehenderunt fusum
Manum suam misit ad fortia, et digiti eius apprehenderunt fusum.
20 caph manum suam aperuit inopi et palmas suas extendit ad pauperem
Manum suam aperuit inopi, et palmas suas extendit ad pauperem.
21 lameth non timebit domui suae a frigoribus nivis omnes enim domestici eius vestiti duplicibus
Non timebit domui suae a frigoribus nivis: omnes enim domestici eius vestiti sunt duplicibus.
22 mem stragulam vestem fecit sibi byssus et purpura indumentum eius
Stragulatam vestem fecit sibi: byssus, et purpura indumentum eius.
23 nun nobilis in portis vir eius quando sederit cum senatoribus terrae
Nobilis in portis vir eius, quando sederit cum senatoribus terrae.
24 samech sindonem fecit et vendidit et cingulum tradidit Chananeo
Sindonem fecit, et vendidit, et cingulum tradidit Chananaeo.
25 ain fortitudo et decor indumentum eius et ridebit in die novissimo
Fortitudo et decor indumentum eius, et ridebit in die novissimo.
26 phe os suum aperuit sapientiae et lex clementiae in lingua eius
Os suum aperuit sapientiae, et lex clementiae in lingua eius.
27 sade considerat semitas domus suae et panem otiosa non comedet
Consideravit semitas domus suae, et panem otiosa non comedit.
28 coph surrexerunt filii eius et beatissimam praedicaverunt vir eius et laudavit eam
Surrexerunt filii eius, et beatissimam praedicaverunt: vir eius, et laudavit eam.
29 res multae filiae congregaverunt divitias tu supergressa es universas
Multae filiae congregaverunt sibi divitias: tu supergressa es universas.
30 sin fallax gratia et vana est pulchritudo mulier timens Dominum ipsa laudabitur
Fallax gratia, et vana est pulchritudo: mulier timens Dominum ipsa laudabitur.
31 thau date ei de fructu manuum suarum et laudent eam in portis opera eius
Date ei de fructu manuum suarum: et laudent eam in portis opera eius.
