Proverbiorum 2

1 fili mi si susceperis sermones meos et mandata mea absconderis penes te

Fili mi, si susceperis sermones meos, et mandata mea absconderis penes te,

2 ut audiat sapientiam auris tua inclina cor tuum ad noscendam prudentiam

ut audiat sapientiam auris tua: inclina cor tuum ad cognoscendam prudentiam.

3 si enim sapientiam invocaveris et inclinaveris cor tuum prudentiae

Si enim sapientiam invocaveris, et inclinaveris cor tuum prudentiae:

4 si quaesieris eam quasi pecuniam et sicut thesauros effoderis illam

si quaesieris eam quasi pecuniam, et sicut thesauros effoderis illam:

5 tunc intelleges timorem Domini et scientiam Dei invenies

tunc intelliges timorem Domini, et scientiam Dei invenies:

6 quia Dominus dat sapientiam et ex ore eius scientia et prudentia

quia Dominus dat sapientiam: et ex ore eius prudentia, et scientia.

7 custodiet rectorum salutem et proteget gradientes simpliciter

Custodiet rectorum salutem, et proteget gradientes simpliciter,

8 servans semitas iustitiae et vias sanctorum custodiens

servans semitas iustitiae, et vias sanctorum custodiens.

9 tunc intelleges iustitiam et iudicium et aequitatem et omnem semitam bonam

Tunc intelliges iustitiam, et iudicium, et aequitatem, et omnem semitam bonam.

10 si intraverit sapientia cor tuum et scientia animae tuae placuerit

Si intraverit sapientia cor tuum, et scientia animae tuae placuerit:

11 consilium custodiet te prudentia servabit te

consilium custodiet te, et prudentia servabit te,

12 ut eruaris de via mala ab homine qui perversa loquitur

ut eruaris a via mala, et ab homine, qui perversa loquitur:

13 qui relinquunt iter rectum et ambulant per vias tenebrosas

qui relinquunt iter rectum, et ambulant per vias tenebrosas:

14 qui laetantur cum malefecerint et exultant in rebus pessimis

qui laetantur cum malefecerint, et exultant in rebus pessimis:

15 quorum viae perversae et infames gressus eorum

quorum viae perversae sunt, et infames gressus eorum.

16 ut eruaris a muliere aliena et ab extranea quae mollit sermones suos

Ut eruaris a muliere aliena, et ab extranea, quae mollit sermones suos,

17 et relinquit ducem pubertatis suae

et relinquit ducem pubertatis suae,

18 et pacti Dei sui oblita est inclinata est enim ad mortem domus eius et ad impios semitae ipsius

et pacti Dei sui oblita est. inclinata est enim ad mortem domus eius, et ad inferos semitae ipsius. (questioned)

19 omnes qui ingrediuntur ad eam non revertentur nec adprehendent semitas vitae

omnes, qui ingrediuntur ad eam, non revertentur, nec apprehendent semitas vitae.

20 ut ambules in via bona et calles iustorum custodias

Ut ambules in via bona: et calles iustorum custodias.

21 qui enim recti sunt habitabunt in terra et simplices permanebunt in ea

Qui enim recti sunt, habitabunt in terra, et simplices permanebunt in ea.

22 impii vero de terra perdentur et qui inique agunt auferentur ex ea

Impii vero de terra perdentur: et qui inique agunt, auferentur ex ea.