Proverbiorum 18
1 occasiones quaerit qui vult recedere ab amico omni tempore erit exprobrabilis
Occasiones quærit qui vult recedere ab amico: omni tempore erit exprobrabilis.
2 non recipit stultus verba prudentiae nisi ea dixeris quae versantur in corde eius
Non recipit stultus verba prudentiæ, nisi ea dixeris quæ versantur in corde ejus.
3 impius cum in profundum venerit peccatorum contemnit sed sequitur eum ignominia et obprobrium
Impius, cum in profundum venerit peccatorum, contemnit; sed sequitur eum ignominia et opprobrium.
4 aqua profunda verba ex ore viri et torrens redundans fons sapientiae
Aqua profunda verba ex ore viri, et torrens redundans fons sapientiæ.
5 accipere personam impii non est bonum ut declines a veritate iudicii
Accipere personam impii non est bonum, ut declines a veritate judicii.
6 labia stulti inmiscunt se rixis et os eius iurgia provocat
Labia stulti miscent se rixis, et os ejus jurgia provocat.
7 os stulti contritio eius et labia illius ruina animae eius
Os stulti contritio ejus, et labia ipsius ruina animæ ejus.
8 verba bilinguis quasi simplicia et ipsa perveniunt usque ad interiora ventris
Verba bilinguis quasi simplicia, et ipsa perveniunt usque ad interiora ventris. Pigrum dejicit timor; animæ autem effeminatorum esurient.
9 qui mollis et dissolutus est in opere suo frater est sua opera dissipantis
Qui mollis et dissolutus est in opere suo frater est sua opera dissipantis.
10 turris fortissima nomen Domini ad ipsum currit iustus et exaltabitur
Turris fortissima nomen Domini; ad ipsum currit justus, et exaltabitur.
11 substantia divitis urbs roboris eius et quasi murus validus circumdans eum
Substantia divitis urbs roboris ejus, et quasi murus validus circumdans eum.
12 antequam conteratur exaltatur cor hominis et antequam glorificetur humiliatur
Antequam conteratur, exaltatur cor hominis, et antequam glorificetur, humiliatur.
13 qui prius respondit quam audiat stultum se esse demonstrat et confusione dignum
Qui prius respondet quam audiat, stultum se esse demonstrat, et confusione dignum.
14 spiritus viri sustentat inbecillitatem suam spiritum vero ad irascendum facilem quis poterit sustinere
Spiritus viri sustentat imbecillitatem suam; spiritum vero ad irascendum facilem quis poterit sustinere?
15 cor prudens possidebit scientiam et auris sapientium quaerit doctrinam
Cor prudens possidebit scientiam, et auris sapientium quærit doctrinam.
16 donum hominis dilatat viam eius et ante principes spatium ei facit
Donum hominis dilatat viam ejus, et ante principes spatium ei facit.
17 iustus prior est accusator sui venit amicus eius et investigavit eum
Justus prior est accusator sui: venit amicus ejus, et investigabit eum.
18 contradictiones conprimit sors et inter potentes quoque diiudicat
Contradictiones comprimit sors, et inter potentes quoque dijudicat.
19 frater qui adiuvatur a fratre quasi civitas firma et iudicia quasi vectes urbium
Frater qui adjuvatur a fratre quasi civitas firma, et judicia quasi vectes urbium.
20 de fructu oris viri replebitur venter eius et genimina labiorum illius saturabunt eum
De fructu oris viri replebitur venter ejus, et genimina labiorum ipsius saturabunt eum.
21 mors et vita in manu linguae qui diligunt eam comedent fructus eius
Mors et vita in manu linguæ; qui diligunt eam comedent fructus ejus.
22 qui invenit mulierem invenit bonum et hauriet iucunditatem a Domino
Qui invenit mulierem bonam invenit bonum, et hauriet jucunditatem a Domino. Qui expellit mulierem bonam expellit bonum; qui autem tenet adulteram stultus est et impius.
23 cum obsecrationibus loquetur pauper et dives effabitur rigide
Cum obsecrationibus loquetur pauper, et dives effabitur rigide.
24 vir amicalis ad societatem magis amicus erit quam frater
Vir amabilis ad societatem magis amicus erit quam frater.
