Liber Numeri 26
1 postquam noxiorum sanguis effusus est dixit Dominus ad Mosen et Eleazarum filium Aaron sacerdotem
Postquam noxiorum sanguis effusus est, dixit Dominus ad Moysen et Eleazarum filium Aaron sacerdotem:
2 numerate omnem summam filiorum Israhel a viginti annis et supra per domos et cognationes suas cunctos qui possunt ad bella procedere
Numerate omnem summam filiorum Israël a viginti annis et supra, per domos et cognationes suas, cunctos qui possunt ad bella procedere.
3 locuti sunt itaque Moses et Eleazar sacerdos in campestribus Moab super Iordanem contra Hierichum ad eos qui erant
Locuti sunt itaque Moyses et Eleazar sacerdos, in campestribus Moab super Jordanem contra Jericho, ad eos qui erant
4 a viginti annis et supra sicut Dominus imperarat quorum iste est numerus
a viginti annis et supra, sicut Dominus imperaverat, quorum iste est numerus.
5 Ruben primogenitus Israhel huius filius Enoch a quo familia Enochitarum et Phallu a quo familia Phalluitarum
Ruben primogenitus Israël: hujus filius, Henoch, a quo familia Henochitarum: et Phallu, a quo familia Phalluitarum:
6 et Esrom a quo familia Esromitarum et Charmi a quo familia Charmitarum
et Hesron, a quo familia Hesronitarum: et Charmi, a quo familia Charmitarum.
7 hae sunt familiae de stirpe Ruben quarum numerus inventus est quadraginta tria milia et septingenti triginta
Hæ sunt familiæ de stirpe Ruben: quarum numerus inventus est quadraginta tria millia, et septingenti triginta.
8 filius Phallu Heliab
Filius Phallu, Eliab:
9 huius filii Namuhel et Dathan et Abiram isti sunt Dathan et Abiram principes populi qui surrexerunt contra Mosen et Aaron in seditione Core quando adversum Dominum rebellaverunt
hujus filii, Namuel et Dathan et Abiron: isti sunt Dathan et Abiron principes populi, qui surrexerunt contra Moysen et Aaron in seditione Core, quando adversus Dominum rebellaverunt:
10 et aperiens terra os suum devoravit Core morientibus plurimis quando conbusit ignis ducentos quinquaginta viros et factum est grande miraculum
et aperiens terra os suum devoravit Core, morientibus plurimis, quando combussit ignis ducentos quinquaginta viros. Et factum est grande miraculum,
11 ut Core pereunte filii illius non perirent
ut, Core pereunte, filii illius non perirent.
12 filii Symeon per cognationes suas Namuhel ab hoc familia Namuhelitarum Iamin ab hoc familia Iaminitarum Iachin ab hoc familia Iachinitarum
Filii Simeon per cognationes suas: Namuel, ab hoc familia Namuelitarum: Jamin, ab hoc familia Jaminitarum: Jachin, ab hoc familia Jachinitarum:
13 Zare ab hoc familia Zareitarum Saul ab hoc familia Saulitarum
Zare, ab hoc familia Zareitarum: Saul, ab hoc familia Saulitarum.
14 hae sunt familiae de stirpe Symeon quarum omnis numerus fuit viginti duo milia ducentorum
Hæ sunt familiæ de stirpe Simeon, quarum omnis numerus fuit viginti duo millia ducenti.
15 filii Gad per cognationes suas Sephon ab hoc familia Sephonitarum Aggi ab hoc familia Aggitarum Suni ab hoc familia Sunitarum
Filii Gad per cognationes suas: Sephon, ab hoc familia Sephonitarum: Aggi, ab hoc familia Aggitarum: Suni, ab hoc familia Sunitarum:
16 Ozni ab hoc familia Oznitarum Heri ab hoc familia Heritarum
Ozni, ab hoc familia Oznitarum: Her, ab hoc familia Heritarum:
17 Arod ab hoc familia Aroditarum Arihel ab hoc familia Arihelitarum
Arod, ab hoc familia Aroditarum: Ariel, ab hoc familia Arielitarum.
18 istae sunt familiae Gad quarum omnis numerus fuit quadraginta milia quingentorum
Istæ sunt familiæ Gad, quarum omnis numerus fuit quadraginta millia quingenti.
19 filii Iuda Her et Onan qui ambo mortui sunt in terra Chanaan
Filii Juda, Her et Onan, qui ambo mortui sunt in terra Chanaan.
20 fueruntque filii Iuda per cognationes suas Sela a quo familia Selanitarum Phares a quo familia Pharesitarum Zare a quo familia Zareitarum
Fueruntque filii Juda per cognationes suas: Sela, a quo familia Selaitarum: Phares, a quo familia Pharesitarum: Zare, a quo familia Zareitarum.
21 porro filii Phares Esrom a quo familia Esromitarum et Amul a quo familia Amulitarum
Porro filii Phares: Hesron, a quo familia Hesronitarum: et Hamul, a quo familia Hamulitarum.
22 istae sunt familiae Iuda quarum omnis numerus fuit septuaginta milia quingentorum
Istæ sunt familiæ Juda, quarum omnis numerus fuit septuaginta sex millia quingenti.
23 filii Isachar per cognationes suas Thola a quo familia Tholaitarum Phua a quo familia Phuaitarum
Filii Issachar per cognationes suas: Thola, a quo familia Tholaitarum: Phua, a quo familia Phuaitarum:
24 Iasub a quo familia Iasubitarum Semran a quo familia Semranitarum
Jasub, a quo familia Jasubitarum: Semran, a quo familia Semranitarum.
25 hae sunt cognationes Isachar quarum numerus fuit sexaginta quattuor milia trecentorum
Hæ sunt cognationes Issachar, quarum numerus fuit sexaginta quatuor millia trecenti.
26 filii Zabulon per cognationes suas Sared a quo familia Sareditarum Helon a quo familia Helonitarum Ialel a quo familia Ialelitarum
Filii Zabulon per cognationes suas: Sared, a quo familia Sareditarum: Elon, a quo familia Elonitarum: Jalel, a quo familia Jalelitarum.
27 hae sunt cognationes Zabulon quarum numerus fuit sexaginta milia quingentorum
Hæ sunt cognationes Zabulon, quarum numerus fuit sexaginta millia quingenti.
28 filii Ioseph per cognationes suas Manasse et Ephraim
Filii Joseph per cognationes suas, Manasse et Ephraim.
29 de Manasse ortus est Machir a quo familia Machiritarum Machir genuit Galaad a quo familia Galaaditarum
De Manasse ortus est Machir, a quo familia Machiritarum. Machir genuit Galaad, a quo familia Galaaditarum.
30 Galaad habuit filios Hiezer a quo familia Hiezeritarum et Elec a quo familia Elecarum
Galaad habuit filios: Jezer, a quo familia Jezeritarum: et Helec, a quo familia Helecitarum:
31 et Asrihel a quo familia Asrihelitarum et Sechem a quo familia Sechemitarum
et Asriel, a quo familia Asrielitarum: et Sechem, a quo familia Sechemitarum:
32 et Semida a quo familia Semidatarum et Epher a quo familia Epheritarum
et Semida, a quo familia Semidaitarum: et Hepher, a quo familia Hepheritarum.
33 fuit autem Epher pater Salphaad qui filios non habebat sed tantum filias quarum ista sunt nomina Maala et Noa et Egla et Melcha et Thersa
Fuit autem Hepher pater Salphaad, qui filios non habebat, sed tantum filias: quarum ista sunt nomina: Maala, et Noa, et Hegla, et Melcha, et Thersa.
34 hae sunt familiae Manasse et numerus earum quinquaginta duo milia septingentorum
Hæ sunt familiæ Manasse, et numerus earum quinquaginta duo millia septingenti.
35 filii autem Ephraim per cognationes suas fuerunt hii Suthala a quo familia Suthalitarum Becher a quo familia Becheritarum Tehen a quo familia Tehenitarum
Filii autem Ephraim per cognationes suas fuerunt hi: Suthala, a quo familia Suthalaitarum: Becher, a quo familia Becheritarum: Thehen, a quo familia Thehenitarum.
36 porro filius Suthala fuit Heran a quo familia Heranitarum
Porro filius Suthala fuit Heran, a quo familia Heranitarum.
37 hae sunt cognationes filiorum Ephraim quarum numerus triginta duo milia quingentorum
Hæ sunt cognationes filiorum Ephraim: quarum numerus fuit triginta duo millia quingenti.
38 isti sunt filii Ioseph per familias suas filii Beniamin in cognationibus suis Bale a quo familia Baleitarum Azbel a quo familia Azbelitarum Ahiram a quo familia Ahiramitarum
Isti sunt filii Joseph per familias suas. Filii Benjamin in cognationibus suis: Bela, a quo familia Belaitarum: Asbel, a quo familia Asbelitarum: Ahiram, a quo familia Ahiramitarum:
39 Supham a quo familia Suphamitarum Hupham a quo familia Huphamitarum
Supham, a quo familia Suphamitarum: Hupham, a quo familia Huphamitarum.
40 filii Bale Hered et Noeman de Hered familia Hereditarum de Noeman familia Noemitarum
Filii Bela: Hered, et Noëman. De Hered, familia Hereditarum: de Noëman, familia Noëmanitarum.
41 hii sunt filii Beniamin per cognationes suas quorum numerus quadraginta quinque milia sescentorum
Hi sunt filii Benjamin per cognationes suas: quorum numerus fuit quadraginta quinque millia sexcenti.
42 filii Dan per cognationes suas Suham a quo familia Suhamitarum hae cognationes Dan per familias suas
Filii Dan per cognationes suas: Suham, a quo familia Suhamitarum. Hæ sunt cognationes Dan per familias suas.
43 omnes fuere Suhamitae quorum numerus erat sexaginta quattuor milia quadringentorum
Omnes fuere Suhamitæ, quorum numerus erat sexaginta quatuor millia quadringenti.
44 filii Aser per cognationes suas Iemna a quo familia Iemnaitarum Iessui a quo familia Iessuitarum Brie a quo familia Brieitarum
Filii Aser per cognationes suas: Jemna, a quo familia Jemnaitarum: Jessui, a quo familia Jessuitarum: Brie, a quo familia Brieitarum.
45 filii Brie Haber a quo familia Haberitarum et Melchihel a quo familia Melchihelitarum
Filii Brie: Heber, a quo familia Heberitarum: et Melchiel, a quo familia Melchielitarum.
46 nomen autem filiae Aser fuit Sara
Nomen autem filiæ Aser fuit Sara.
47 hae cognationes filiorum Aser et numerus eorum quinquaginta tria milia quadringentorum
Hæ cognationes filiorum Aser, et numerus eorum quinquaginta tria millia quadringenti.
48 filii Nepthalim per cognationes suas Iessihel a quo familia Iessihelitarum Guni a quo familia Gunitarum
Filii Nephthali per cognationes suas: Jesiel, a quo familia Jesielitarum: Guni, a quo familia Gunitarum:
49 Iesser a quo familia Iesseritarum Sellem a quo familia Sellemitarum
Jeser, a quo familia Jeseritarum: Sellem, a quo familia Sellemitarum.
50 hae sunt cognationes filiorum Nepthalim per familias suas quorum numerus quadraginta quinque milia quadringentorum
Hæ sunt cognationes filiorum Nephthali per familias suas: quorum numerus quadraginta quinque millia quadringenti.
51 ista est summa filiorum Israhel qui recensiti sunt sescenta milia et mille septingenti triginta
Ista est summa filiorum Israël, qui recensiti sunt, sexcenta millia, et mille septingenti triginta.
52 locutusque est Dominus ad Mosen dicens
Locutusque est Dominus ad Moysen, dicens:
53 istis dividetur terra iuxta numerum vocabulorum in possessiones suas
Istis dividetur terra juxta numerum vocabulorum in possessiones suas.
54 pluribus maiorem partem dabis et paucioribus minorem singulis sicut nunc recensiti sunt tradetur possessio
Pluribus majorem partem dabis, et paucioribus minorem: singulis, sicut nunc recensiti sunt, tradetur possessio:
55 ita dumtaxat ut sors terram tribubus dividat et familiis
ita dumtaxat ut sors terram tribubus dividat et familiis.
56 quicquid sorte contigerit hoc vel plures accipient vel pauciores
Quidquid sorte contigerit, hoc vel plures accipiant, vel pauciores.
57 hic quoque est numerus filiorum Levi per familias suas Gerson a quo familia Gersonitarum Caath a quo familia Caathitarum Merari a quo familia Meraritarum
Hic quoque est numerus filiorum Levi per familias suas: Gerson, a quo familia Gersonitarum: Caath, a quo familia Caathitarum: Merari, a quo familia Meraritarum.
58 hae sunt familiae Levi familia Lobni familia Hebroni familia Mooli familia Musi familia Cori at vero Caath genuit Amram
Hæ sunt familiæ Levi: familia Lobni, familia Hebroni, familia Moholi, familia Musi, familia Core. At vero Caath genuit Amram:
59 qui habuit uxorem Iochabed filiam Levi quae nata est ei in Aegypto haec genuit viro suo Amram filios Aaron et Mosen et Mariam sororem eorum
qui habuit uxorem Jochabed filiam Levi, quæ nata est ei in Ægypto. Hæc genuit Amram viro suo filios, Aaron, et Moysen, et Mariam sororem eorum.
60 de Aaron orti sunt Nadab et Abiu et Eleazar et Ithamar
De Aaron orti sunt Nadab et Abiu, et Eleazar et Ithamar:
61 quorum Nadab et Abiu mortui sunt cum obtulissent ignem alienum coram Domino
quorum Nadab et Abiu mortui sunt, cum obtulissent ignem alienum coram Domino.
62 fueruntque omnes qui numerati sunt viginti tria milia generis masculini ab uno mense et supra quia non sunt recensiti inter filios Israhel nec eis cum ceteris data possessio
Fueruntque omnes qui numerati sunt, viginti tria millia generis masculini ab uno mense et supra: quia non sunt recensiti inter filios Israël, nec eis cum ceteris data possessio est.
63 hic est numerus filiorum Israhel qui descripti sunt a Mosen et Eleazaro sacerdote in campestribus Moab supra Iordanem contra Hiericho
Hic est numerus filiorum Israël, qui descripti sunt a Moyse et Eleazaro sacerdote, in campestribus Moab supra Jordanem contra Jericho:
64 inter quos nullus fuit eorum qui ante numerati sunt a Mose et Aaron in deserto Sinai
inter quos, nullus fuit eorum qui ante numerati sunt a Moyse et Aaron in deserto Sinai:
65 praedixerat enim Dominus quod omnes morerentur in solitudine nullusque remansit ex eis nisi Chaleb filius Iepphonne et Iosue filius Nun
prædixerat enim Dominus quod omnes morerentur in solitudine. Nullusque remansit ex eis, nisi Caleb filius Jephone, et Josue filius Nun.
