Deuteronomii 14
1 filii estote Domini Dei vestri non vos incidetis nec facietis calvitium super mortuo
Filii estote Domini Dei vestri: non vos incidetis, nec facietis calvitium super mortuo.
2 quoniam populus sanctus es Domino Deo tuo et te elegit ut sis ei in populum peculiarem de cunctis gentibus quae sunt super terram
quoniam populus sanctus es Domino Deo tuo: et te elegit ut sis ei in populum peculiarem de cunctis gentibus, quae sunt super terram.
3 ne comedatis quae inmunda sunt
Ne comedatis quae immunda sunt.
4 hoc est animal quod comedere debetis bovem et ovem et capram
Hoc est animal, quod comedere debetis, Bovem, et ovem, et capram,
5 cervum capream bubalum tragelaphum pygargon orygem camelopardalum
cervum et capream, bubalum, tragelaphum, pygargum, orygem, camelopardalum.
6 omne animal quod in duas partes ungulam findit et ruminat comedetis
Omne animal quod in duas partes findit ungulam, et ruminat, comedetis.
7 de his autem quae ruminant et ungulam non findunt haec comedere non debetis camelum leporem choerogyllium quia ruminant et non dividunt ungulam inmunda erunt vobis
De his autem, quae ruminant, et ungulam non findunt, comedere non debetis, ut camelum, leporem, choerogryllum: haec quia ruminant, et non dividunt ungulam, immunda erunt vobis.
8 sus quoque quoniam dividit ungulam et non ruminat inmunda erit carnibus eorum non vescemini et cadavera non tangetis
Sus quoque quoniam dividat ungulam, et non ruminat, immunda erit. carnibus eorum non vescemini, et cadavera non tangetis.
9 haec comedetis ex omnibus quae morantur in aquis quae habent pinnulas et squamas comedite
Haec comedetis ex omnibus quae morantur in aquis: Quae habent pinnulas et squamas, comedite:
10 quae absque pinnulis et squamis sunt ne comedatis quia inmunda sunt
quae absque pinnulis et squamis sunt, ne comedatis, quia immunda sunt.
11 omnes aves mundas comedite
Omnes aves mundas comedite.
12 inmundas ne comedatis aquilam scilicet et grypem et alietum
Immundas ne comedatis: aquilam scilicet, et gryphem, et haliaeetum,
13 ixon et vulturem ac milvum iuxta genus suum
ixion, et vulturem ac milvum iuxta genus suum:
14 et omne corvini generis
et omne corvini generis,
15 strutionem ac noctuam et larum atque accipitrem iuxta genus suum
et struthionem, ac noctuam, et larum, atque accipitrem iuxta genus suum:
16 herodium et cycnum et ibin
herodium ac cygnum, et ibin,
17 ac mergulum porphirionem et nycticoracem
ac mergulum, porphyrionem, et nycticoracem,
18 onocrotalum et charadrium singula in genere suo upupam quoque et vespertilionem
onocrotalum, et charadrium, singula in genere suo: upupam quoque et vespertilionem.
19 et omne quod reptat et pinnulas habet inmundum erit nec comedetur
Et omne quod reptat et pennulas habet, immundum erit, et non comedetur.
20 omne quod mundum est comedite
Omne quod mundum est, comedite.
21 quicquid morticinum est ne vescamini ex eo peregrino qui intra portas tuas est da ut comedat aut vende ei quia tu populus sanctus Domini Dei tui es non coques hedum in lacte matris suae
Quidquid autem morticinum est, ne vescamini ex eo. Peregrino, qui intra portas tuas est, da ut comedat, aut vende ei: quia tu populus sanctus Domini Dei tui es. Non coques hoedum in lacte matris suae.
22 decimam partem separabis de cunctis frugibus tuis quae nascuntur in terra per annos singulos
Decimam partem separabis de cunctis fructibus tuis qui nascuntur in terra per annos singulos,
23 et comedes in conspectu Domini Dei tui in loco quem elegerit ut in eo nomen illius invocetur decimam frumenti tui et vini et olei et primogenita de armentis et ovibus tuis ut discas timere Dominum Deum tuum omni tempore
et comedes in conspectu Domini Dei tui in loco, quem elegerit, ut in eo nomen illius invocetur, decimam frumenti tui, et vini, et olei, et primogenita de armentis et ovibus tuis: ut discas timere Dominum Deum tuum omni tempore.
24 cum autem longior fuerit via et locus quem elegerit Dominus Deus tuus tibique benedixerit nec potueris ad eum haec cuncta portare
Cum autem longior fuerit via, et locus quem elegerit Dominus Deus tuus, tibique benedixerit, nec potueris ad eum haec cuncta portare,
25 vendes omnia et in pretium rediges portabisque manu tua et proficisceris ad locum quem elegerit Dominus Deus tuus
vendes omnia, et in pretium rediges, portabisque manu tua, et proficisceris ad locum, quem elegerit Dominus Deus tuus:
26 et emes ex eadem pecunia quicquid tibi placuerit sive ex armentis sive ex ovibus vinum quoque et siceram et omne quod desiderat anima tua et comedes coram Domino Deo tuo et epulaberis tu et domus tua
et emes ex eadem pecunia quidquid tibi placuerit, sive ex armentis, sive ex ovibus, vinum quoque et siceram, et omne quod desiderat anima tua: et comedes coram Domino Deo tuo, et epulaberis tu et domus tua:
27 et Levita qui intra portas tuas est cave ne derelinquas eum quia non habet aliam partem in possessione tua
et Levites qui intra portas tuas est, cave ne derelinquas eum, quia non habet aliam partem in possessione tua.
28 anno tertio separabis aliam decimam ex omnibus quae nascuntur tibi eo tempore et repones intra ianuas tuas
Anno tertio separabis aliam decimam ex omnibus quae nascuntur tibi eo tempore: et repones intra ianuas tuas.
29 venietque Levites qui aliam non habet partem nec possessionem tecum et peregrinus et pupillus ac vidua qui intra portas tuas sunt et comedent et saturabuntur ut benedicat tibi Dominus Deus tuus in cunctis operibus manuum tuarum quae feceris
Venietque Levites qui aliam non habet partem nec possessionem tecum, et peregrinus ac pupillus et vidua, qui intra portas tuas sunt, et comedent et saturabuntur: ut benedicat tibi Dominus Deus tuus in cunctis operibus manuum tuarum quae feceris.
