Psalmorum 80

1 In finem, pro iis qui commutabuntur. Testimonium Asaph, psalmus. Qui regis Israël, intende; qui deducis velut ovem Joseph. Qui sedes super cherubim, manifestare

Psalmus, in finem, pro iis, qui commutabuntur, testimonium Asaph. Qui regis Israel, intende: qui deducis velut ovem Ioseph. Qui sedes super cherubim, manifestare

2 coram Ephraim, Benjamin, et Manasse. Excita potentiam tuam, et veni, ut salvos facias nos.

coram Ephraim, Beniamin, et Manasse. Excita potentiam tuam, et veni, ut salvos facias nos.

3 Deus, converte nos, et ostende faciem tuam, et salvi erimus.

Deus converte nos: et ostende faciem tuam, et salvi erimus.

4 Domine Deus virtutum, quousque irasceris super orationem servi tui?

Domine Deus virtutum, quousque irasceris super orationem servi tui?

5 cibabis nos pane lacrimarum, et potum dabis nobis in lacrimis in mensura?

Cibabis nos pane lacrymarum: et potum dabis nobis in lacrymis in mensura?

6 Posuisti nos in contradictionem vicinis nostris, et inimici nostri subsannaverunt nos.

Posuisti nos in contradictionem vicinis nostris: et inimici nostri subsannaverunt nos.

7 Deus virtutum, converte nos, et ostende faciem tuam, et salvi erimus.

Deus virtutum converte nos: et ostende faciem tuam: et salvi erimus.

8 Vineam de Ægypto transtulisti: ejecisti gentes, et plantasti eam.

Vineam de Aegypto transtulisti: eiecisti Gentes, et plantasti eam.

9 Dux itineris fuisti in conspectu ejus; plantasti radices ejus, et implevit terram.

Dux itineris fuisti in conspectu eius: plantasti radices eius, et implevit terram.

10 Operuit montes umbra ejus, et arbusta ejus cedros Dei.

Operuit montes umbra eius: et arbusta eius cedros Dei.

11 Extendit palmites suos usque ad mare, et usque ad flumen propagines ejus.

Extendit palmites suos usque ad mare: et usque ad flumen propagines eius.

12 Ut quid destruxisti maceriam ejus, et vindemiant eam omnes qui prætergrediuntur viam?

Ut quid destruxisti maceriam eius: et vindemiant eam omnes, qui praetergrediuntur viam?

13 Exterminavit eam aper de silva, et singularis ferus depastus est eam.

Exterminavit eam aper de silva: et singularis ferus depastus est eam.

14 Deus virtutum, convertere, respice de cælo, et vide, et visita vineam istam:

Deus virtutum convertere: respice de caelo, et vide, et visita vineam istam.

15 et perfice eam quam plantavit dextera tua, et super filium hominis quem confirmasti tibi.

Et perfice eam, quam plantavit dextera tua: et super filium hominis, quem confirmasti tibi.

16 Incensa igni et suffossa, ab increpatione vultus tui peribunt.

Incensa igni, et suffossa ab increpatione vultus tui peribunt.

17 Fiat manus tua super virum dexteræ tuæ, et super filium hominis quem confirmasti tibi.

Fiat manus tua super virum dexterae tuae: et super filium hominis, quem confirmasti tibi.

18 Et non discedimus a te: vivificabis nos, et nomen tuum invocabimus.

Et non discedimus a te, vivificabis nos: et nomen tuum invocabimus.

19 Domine Deus virtutum, converte nos, et ostende faciem tuam, et salvi erimus.

Domine Deus virtutum converte nos: et ostende faciem tuam, et salvi erimus.