Psalmorum 75

1 In finem, ne corrumpas. Psalmus cantici Asaph. Confitebimur tibi, Deus, confitebimur, et invocabimus nomen tuum; narrabimus mirabilia tua.

Psalmus Cantici Asaph, in finem, ne corrumpas. Confitebimur tibi Deus: confitebimur, et invocabimus nomen tuum. Narrabimus mirabilia tua:

2 Cum accepero tempus, ego justitias judicabo.

cum accepero tempus, ego iustitias iudicabo.

3 Liquefacta est terra et omnes qui habitant in ea: ego confirmavi columnas ejus.

Liquefacta est terra, et omnes qui habitant in ea: ego confirmavi columnas eius.

4 Dixi iniquis: Nolite inique agere: et delinquentibus: Nolite exaltare cornu:

Dixi iniquis: Nolite inique agere: et delinquentibus: Nolite exaltare cornu:

5 nolite extollere in altum cornu vestrum; nolite loqui adversus Deum iniquitatem.

Nolite extollere in altum cornu vestrum: nolite loqui adversus Deum iniquitatem.

6 Quia neque ab oriente, neque ab occidente, neque a desertis montibus:

Quia neque ab Oriente, neque ab Occidente, neque a desertis montibus:

7 quoniam Deus judex est. Hunc humiliat, et hunc exaltat:

quoniam Deus iudex est. Hunc humiliat, et hunc exaltat:

8 quia calix in manu Domini vini meri, plenus misto. Et inclinavit ex hoc in hoc; verumtamen fæx ejus non est exinanita: bibent omnes peccatores terræ.

quia calix in manu Domini vini meri plenus misto. Et inclinavit ex hoc in hoc: verumtamen faex eius non est exinanita: bibent omnes peccatores terrae.

9 Ego autem annuntiabo in sæculum; cantabo Deo Jacob:

Ego autem annunciabo in saeculum: cantabo Deo Iacob.

10 et omnia cornua peccatorum confringam, et exaltabuntur cornua justi.

Et omnia cornua peccatorum confringam: et exaltabuntur cornua iusti.