Psalmorum 64

1 In finem. Psalmus David. Exaudi, Deus, orationem meam cum deprecor; a timore inimici eripe animam meam.

in finem psalmus David exaudi Deus orationem meam cum deprecor a timore inimici eripe animam meam

2 Protexisti me a conventu malignantium, a multitudine operantium iniquitatem.

protexisti me a conventu malignantium a multitudine operantium iniquitatem

3 Quia exacuerunt ut gladium linguas suas; intenderunt arcum rem amaram,

quia exacuerunt ut gladium linguas suas intenderunt arcum rem amaram

4 ut sagittent in occultis immaculatum.

ut sagittent in occultis inmaculatum

5 Subito sagittabunt eum, et non timebunt; firmaverunt sibi sermonem nequam. Narraverunt ut absconderent laqueos; dixerunt: Quis videbit eos?

subito sagittabunt eum et non timebunt firmaverunt sibi sermonem nequam narraverunt ut absconderent laqueos dixerunt quis videbit eos

6 Scrutati sunt iniquitates; defecerunt scrutantes scrutinio. Accedet homo ad cor altum,

scrutati sunt iniquitates defecerunt scrutantes scrutinio accedet homo et cor altum

7 et exaltabitur Deus. Sagittæ parvulorum factæ sunt plagæ eorum,

et exaltabitur Deus sagittae parvulorum factae sunt plagae eorum

8 et infirmatæ sunt contra eos linguæ eorum. Conturbati sunt omnes qui videbant eos,

et infirmatae sunt contra eos linguae eorum conturbati sunt omnes qui videbant eos

9 et timuit omnis homo. Et annuntiaverunt opera Dei, et facta ejus intellexerunt.

et timuit omnis homo et adnuntiaverunt opera Dei et facta eius intellexerunt

10 Lætabitur justus in Domino, et sperabit in eo, et laudabuntur omnes recti corde.

laetabitur iustus in Domino et sperabit in eo et laudabuntur omnes recti corde